Olketa Jehovah’s Witness trae for followim wanem Jesus teachim olketa disaepol bilong hem for duim. Bae iumi storyim samfala main biliv bilong mifala.

1. God. Mifala worshipim nomoa datfala Olmaeti God wea wakem evri samting, wea nem bilong hem Jehovah. (Psalm 83:18; Revelation 4:​11) Hem nao God bilong Abraham, Moses, and Jesus.​—Exodus 3:6; 32:11; John 20:17.

2. Bible. Mifala luksavve Bible hem kam from God. (John 17:17; 2 Timothy 3:​16) Olketa biliv bilong mifala kam from full Bible. Wanfala savveman Professor Jason BeDuhn sei Olketa Jehovah’s Witness “no chusim seleva wanem olketa laek for bilivim, bat olketa bilivim evri samting wea stap long Bible.”

   Nomata mifala bilivim evri samting long Bible, mifala luksavve samfala toktok long Bible hem piksarem nara samting.​—Revelation 1:1.

3. Jesus. Mifala followim wanem Jesus teachim and followim example bilong hem, and mifala luksavve hem sevem mifala and hem Son bilong God. (Matthew 20:28; Acts 5:​31) Datwan showimaot mifala olketa Christian. (Acts 11:26) Bat mifala luksavve Bible no teachim Jesus hem Olmaeti God and hem no part long wanfala Trinity.​—John 14:28.

4. Kingdom bilong God. Hem wanfala gavman long heven. Hem no stap long heart bilong olketa Christian. Datfala Kingdom bae mekem plan bilong God kamap tru for disfala earth. (Daniel 2:​44; Matthew 6:​9, 10) Klosap nao datwan bae happen, bikos olketa profesi long Bible showimaot iumi stap long “olketa last day.”​—2 Timothy 3:​1-5; Matthew 24:​3-​14.

   Jesus hem King bilong Kingdom bilong God long heven. Hem start for rul long 1914.​—Revelation 11:15.

5. Wei for sev. Dae bilong Jesus mekem iumi man for garem chance for laef olowe and for kamap perfect. (Matthew 20:28; Acts 4:​12) For kasem diswan, pipol mas showimaot faith long hem, and tu, olketa mas changem laef bilong olketa and baptaes. (Matthew 28:19, 20; John 3:​16; Acts 3:​19, 20) Gudfala samting wea man duim pruvim hem garem faith. (James 2:​24, 26) Nomata olsem, iumi no savve sev bikos long samting wea iumi duim bat from ‘God hem kaen tumas long iumi.’​—Galatia 2:​16, 21.

6. Heven. Jehovah God, Jesus Christ, and olketa angel stap long heven. a (Psalm 103:19-​21; Acts 7:​55) Bible sei 144,000 pipol nomoa bae laef bak for stap long heven for rul witim Jesus long Kingdom.​—Daniel 7:​27; 2 Timothy 2:​12; Revelation 5:​9, 10; 14:​1, 3.

7. Earth. God wakem disfala earth for olketa man for stap long hem. (Psalm 104:5; 115:16; Ecclesiastes 1:4) Plan bilong God hem for olketa man wea obeyim hem for healthy and laef olowe long paradaes long earth.​—Psalm 37:11, 34.

8. Wei for safa and olketa nogud samting wea kasem iumi. Diswan hem start taem wanfala angel bilong God kamap bighed. (John 8:​44) Disfala angel, wea gogo hem kasem nem “Satan” and “Devil,” switim Adam and Eve for againstim God, and datwan nao mekem iumi olketa pikinini bilong tufala for kasem nogud samting. (Genesis 3:​1-6; Rome 5:​12) Nomata God letem diswan gohed for lelebet taem mekem pipol luksavve God nomoa garem raet for rul, gogo bae hem finisim olketa nogud samting wea mekem iumi safa.

9. Dae. Olketa wea dae finis no gohed laef long eni nara ples. (Psalm 146:4; Ecclesiastes 9:​5, 10) Olketa no safa or bone long hell.

   God bae mekem staka billion pipol for laef bak. (Acts 24:15) Bat olketa wea no laek for followim olketa wei bilong God bihaen olketa laef bak bae dae for olowe and bae no garem chance for laef bak moa.​—Revelation 20:14, 15.

10. Famili. Mifala followim wanem God talem for tufala wea marit for stap tugeta. Wei for durong nomoa hem reason for tufala savve divorce. (Matthew 19:​4-9) Mifala savve taem mifala followim wanem Bible talem, datwan bae helpem famili for hapi.​—Ephesus 5:22–​6:1.

11. Worship bilong mifala. Mifala no worshipim cross or olketa idol. (Deuteronomy 4:​15-​19; 1 John 5:​21) Olketa main samting wea mifala duim:

    • Prea long God.​—Philippi 4:6.

    • Readim and studyim Bible.​—Psalm 1:​1-3.

    • Ting raonem wanem mifala lanem long Bible.​—Psalm 77:12.

    • Kam long olketa meeting for prea, studyim Bible, singsing, givim koment, and encouragem olketa nara Witness and olketa narawan wea kam.​—Colossae 3:​16; Hebrew 10:23-​25.

    • Preachim datfala “gud nius abaotem Kingdom.”​—Matthew 24:14.

    • Helpem olketa wea kasem hard taem.​—James 2:​14-​17.

    • Wakem and repairim olketa Kingdom Hall, olketa Assembly Hall, and olketa nara building wea mifala iusim for duim olketa waka wea sapotim Bible teaching waka wea gohed evriwea long world.​—Psalm 127:1.

    • Duim relief waka long taem bilong disaster.​—Acts 11:27-​30.

12. Organization bilong mifala. Mifala garem olketa kongregeson wea olketa elder nao lukaftarem. Nomata olketa elder duim disfala waka, olketa no winim olketa narawan long kongregeson, and olketa no kasem pei for waka wea olketa duim. (Matthew 10:8; 23:8) Mifala no tithe and mifala no duim kolekson long taem bilong meeting. (2 Corinth 9:7) Donation wea pipol givim nao hem sapotim evri waka wea mifala duim.

    Governing Body hem wanfala smol grup bilong olketa mature Christian wea waka long main branch office long New York long America. Olketa nao givim direction for Olketa Jehovah’s Witness evriwea long world.​—Matthew 24:45.

13. Mifala wan mind. Nomata mifala stap evriwea long world, mifala garem sem biliv. (1 Corinth 1:​10) And tu, nomata mifala kam from olketa difren kantri, tribe, garem difren kala skin, and samfala rich or poor mifala waka hard for stap gud tugeta. (Acts 10:34, 35; James 2:4) Nomata mifala wan mind, hem fitim for mifala garem difren tingting abaotem olketa samting, sapos datwan no againstim wanem Bible talem.​—Rome 14:​1-4; Hebrew 5:​14.

14. Wei bilong mifala. Mifala traem best for showimaot love long evriwan. (John 13:34, 35) Mifala no laek for duim eni samting wea God no hapi long hem, olsem example, mifala no acceptim blood transfusion. (Acts 15:28, 29; Galatia 5:​19-​21) Mifala laek for stap gud witim olketa narawan and mifala no join insaed long war. (Matthew 5:9; Isaiah 2:4) Mifala respectim olketa wea rul and mifala obeyim olketa law bilong kantri sapos datwan no againstim wanem God laekem mifala for duim.​—Matthew 22:21; Acts 5:​29.

15. Tingting bilong mifala abaotem olketa wea no Witness. Jesus sei: “Iu mas lovem narawan long sem wei wea iu lovem iuseleva.” Hem sei tu olketa Christian “no olsem pipol long world.” (Matthew 22:39; John 17:16) So mifala traem best for “duim gudfala samting long evriwan,” bat mifala no teksaed long politik and no worship tugeta witim olketa nara religion. (Galatia 6:​10; 2 Corinth 6:​14) Bat mifala respectim raet bilong narawan for disaed seleva long olketa samting hia.​—Rome 14:12.

Sapos iu garem olketa nara kwestin abaotem wanem mifala Olketa Jehovah’s Witness bilivim, iu savve readim moa samting abaotem mifala long web site bilong mifala, iu savve raet kam long office bilong mifala, kam long wanfala meeting long Kingdom Hall wea stap klosap long iu, or iu savve story witim eni Jehovah’s Witness.