Kingdom bilong God hem wanfala gavman wea Jehovah God nao startim. Narafala wei wea Bible talem disfala toktok “kingdom bilong God” hem “kingdom bilong heven”, from datfala kingdom hem stap long heven. (Mark 1:14, 15; Matthew 4:17, King James Version) Datfala kingdom hem olsem olketa gavman bilong man long samfala wei, bat hem barava gud winim olketa.

•   Olketa wea Rul. God chusim Jesus Christ for hem nao King bilong datfala Kingdom and hem givim hem paoa wea winim wanem eni man wea rul savve garem. (Matthew 28:18) Jesus iusim paoa bilong hem for duim nomoa olketa gud samting. Hem showimaot finis hao hem leader wea iumi fit for trustim and wea tingim iumi. (Matthew 4:23; Mark 1:40, 41; 6:31-34; Luke 7:11-17) For fitim wanem God laekem, Jesus hem chusim samfala pipol from olketa difren kantri for “kamap olketa king for rulim disfala earth” witim hem.—Revelation 5:9, 10.

•   Hao Long Datfala Kingdom Bae Rul. Olketa gavman bilong man savve change olowe, bat Kingdom bilong God “nating savve finis.”—Daniel 2:44.

•   Pipol wea Kingdom Rul Ovarem. Nomata wanem kantri nao man hem kam from, sapos hem duim wanem God laekem hem savve stap anda long Kingdom bilong God.—Acts 10:34, 35.

•   Olketa Law. Olketa law (or komandment) bilong Kingdom bilong God hem no just for stopem pipol duim nogud samting, bat hem for helpem pipol for garem gudfala wei. Olsem example, Bible hem sei: “‘Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.’ Disfala law nao first wan, and no eni nara law important winim hem. Nara law wea barava important nao hem: ‘Iu mas lovem narawan long sem wei wea iu lovem iuseleva.’” (Matthew 22:37-39) Wei for lovem God and narawan hem helpem olketa wea stap anda long Kingdom for duim gud samting for narawan.

•   Education. Kingdom bilong God hem markem hae standard for olketa pipol, and hem teachim olketa hao for followim olketa standard hia tu.—Isaiah 48:17, 18.

•   Goal. Kingdom bilong God hem no gavman wea olketa wea rul nomoa bae kasem gud samting and pipol wea stap anda long olketa no kasem eni gud samting. Bat taem datfala Kingdom hem rul bae hem duim samting wea God laekem, olsem wei wea pipol wea lovem God bae kasem laef olowe long paradaes earth.—Isaiah 35:1, 5, 6; Matthew 6:10; Revelation 21:1-4.