Main wei wea mifala kasem selen for sapotim waka blo mifala raonem world hem from olketa donation wea Olketa Jehovah’s Witness givim. a Olketa contribution box stap lo olketa ples wea mifala garem meeting, and tu, lo datfala page Olketa Donation mifala listim samfala nara wei for givim donation. Man savve chus for givim donation for sapotim waka blo mifala raonem world, or for peim expenses lo Kingdom Hall, or for tufala evriwan.

Olketa Jehovah’s Witness no givim tithe lo kongregeson blo olketa, and mifala no markem wanfala amount wea olketa mas donatem or sei olketa mas givim part lo wages blo olketa. (2 Corinth 9:7) Mifala no duim eni kolekson lo olketa meeting blo mifala, or sei pipol mas pei for attendim meeting. And tu, olketa minister blo mifala no sei man mas peim fee for olketa duim baptism, funeral, wedding, or olketa nara samting olsem. Mifala no duim eni fund raising, olsem example, for salem olketa cake or nara samting, pleim bingo game, duim bigfala hapitaem or party, arrangem olketa kaikai, olketa lucky draw, or nara samting olsem, and mifala no askem pipol for givim donation. Mifala no talem lo eniwan information abaotem hu nao givim donation. (Matthew 6:2-4) Olketa website and pablikeson blo mifala no garem eni advertisement for olketa bisnis or wea pipol peim mifala for putim.

Evri month, evri kongregeson blo Olketa Jehovah’s Witness savve givim report abaotem olketa expenses blo olketa and olketa donation wea olketa kasem. Eniwan savve attendim olketa meeting hia. Samwan bae evritaem duim audit lo olketa accounts record blo each kongregeson for mek sure kongregeson duim stret samting witim olketa donation wea olketa kasem.—2 Corinth 8:20, 21.

•   Olketa contribution box: Iu savve putim selen or check wea iu laek donatem insaed olketa contribution box wea stap lo evri Kingdom Hall, Assembly Hall, or olketa nara ples wea mifala garem olketa meeting.

•   Givim donation online: Lo staka kantri, iu savve iusim disfala page “Givim Donation lo Olketa Jehovah’s Witness” for givim donation witim credit card, debit card, bank transfer, and olketa nara kaen electronic donation. b Samfala Jehovah’s Witness disaed for “keepim lelebet selen” and olketa mekem arrangement lo website for donatem datwan evri month.—1 Corinth 16:2.

•   Plan for givim samting: Samfala wei for givim donation man mas planim gud and maet hem needim advaes from wanfala lawyer tu. Kaen wei for plan olsem maet minim iu savve sevem selen saed lo tax blo kantri. Staka pipol kasem gud samting from olketa lane abaotem olketa law wea deal witim wei for givim samting taem man laef yet or bihaen hem dae. Plis contactim branch office blo Olketa Jehovah’s Witness lo kantri blo iu sapos iu laek givim donation wea join witim:

  •   bank account

  •   insurance and retirement plan

  •   land

  •   olketa stock and bond

  •   olketa will and trust

For moa information abaotem olketa wei for givim donation lo ples wea iu stap, lukim page “Givim Donation lo Olketa Jehovah’s Witness.”