MUŴENGE MASO!
Kasi Nkhondo Zizamumara Pawuli?—Kasi Baibolo Likuti Wuli?
Pakuyowoyapo pa ivyo charu cha Iran chikachita pakuwukira charu cha Israel pa Chisulo, April 13, 2024, Mulembi Mulara wa Wupu wa United Nations António Guterres wakayowoya kuti: “Sono ni nyengo yakutimbana na kunanga vinthu yayi, zikiskani mitima pasi. Sono ni nyengo iyo tikukhumbikwira kujikora chomene.”
Nkhondo iyo yikuchitika ku Middle East njimoza mwa nkhondo izo zikuchitika pa charu chose chapasi.
“Pasono pa charu chapasi pakuchitika nkhondo zinandi chomene izo zindachitikepo kufuma waka pa nyengo ya Nkhondo Yachiŵiri ya pa Charu Chose. Ŵanthu 2 biliyoni ŵakhwaskika na nkhondo izi, ndipo ichi chikung’anamura kuti munthu yumoza pa ŵanthu ŵanayi ŵaliwose wakukhwaskika na nkhondo izi.”—United Nations Security Council, January 26, 2023.
Vyaru ivyo pasono kuli nkhondo ni Israel, Gaza, Syria, Azerbaijan, Ukraine, Sudan, Ethiopia, Niger, Myanmar, na Haiti. a
Kasi nkhondo zizamumara pawuli? Kasi ŵalongozgi ŵa charu ŵangiziska mtende? Kasi Baibolo likuti wuli?
Charu chili pa nkhondo
Nkhondo izo zikuchitika pa charu chose ntchimanyikwiro chakuti nkhondo zose zili pafupi kumara. Nkhondo izi zikufiska uchimi uwo Baibolo likayowoyerathu wakuyowoya za nyengo iyo tilimo. Baibolo likuzunura nyengo iyi kuti “umaliro wa charu.”—Mateyu 24:3.
“Muzamupulika zinkhondo na malumbiri gha zinkhondo. . . . Pakuti mtundu uzamuwukirana na mtundu unyake, ufumu na ufumu unyake.”—Mateyu 24:6, 7.
Kuti muwone umo nkhondo izi zikufiskira uchimi wa mu Baibolo, ŵazgani nkhani ya mutu wakuti, “Kasi Chimanyikwiro cha ‘Mazuŵa Ghaumaliro’ Panji Kuti ‘Nyengo Zaumaliro’ Ntchivichi?”
Nkhondo iyo yizamumazga nkhondo zose
Baibolo likuyowoyerathu umo nkhondo zizamumalira. Kasi vizamuchitika wuli? Nkhondo izi wazamumazga ni munthu yayi, kweni Aramagedoni iyo ni “nkhondo ya zuŵa likuru la Chiuta Wankhongonozose.” (Chivumbuzi 16:14, 16) Para nkhondo iyi yajumpha, Chiuta wazamufiska ivyo wali kulayizga, ndipo ŵanthu ŵazamukhala mwamtende kwamuyirayira.—Salimo 37:10, 11, 29.
Kuti mumanye vinandi pa nkhani ya nkhondo ya Chiuta iyo yizamumazga nkhondo zose, ŵazgani nkhani yakuti “Kasi Nkhondo ya Aramagedoni Ni Vichi?”
a ACLED Conflict Index, “Ranking violent conflict levels across the world,” January 2024
Panji Mungatemwa Kuŵerengaso Nkhani Izi
GONGWE LA MULINDA
Kasi “Umaliro” Ni Vichi?
Kasi mukumanya kuti “umaliro” uwo Baibolo likuyowoya ni nkhani yiwemi?
VISAMBIZGO VYAKUZIRWA VYA MU BAIBOLO
Chifukwa Wuli Chiuta Walekelera Uheni na Suzgo?
Ŵanthu ŵanandi ŵakufumba kuti ‘chifukwa wuli ŵanthu ŵakusuzgika?’ Baibolo lili na zgoro la fumbo ili.
MUWENGE MASO!
Kasi Nkhondo ya Aramagedoni Yizamwambira ku Israyeli?—Kasi Baibolo Likuti Wuli?
Ivyo buku la Chivumbuzi likuvumbura pa nkhani ya Aramagedoni vikutipa zgoro.
NKHANI ZINYAKE
Chigomezgo Chakuti Kunthazi Vinthu Vizamusintha
Chifukwa wuli ivyo Baibolo likulayizga vikupambana chomene na ivyo ŵanthu ŵakulayizga panji kuyowoyerathu?
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.
