Nkhondo ya Aramagedoni ni nkhondo yaumaliro iyo yizamuŵa pakati pa maboma gha ŵanthu na Chiuta. Nanga ni sono nthena, maboma agha na ŵanthu ŵake ŵakususka Chiuta na kukana kujilambika ku muwuso wake. (Salimo 2:2) Nkhondo ya Aramagedoni yizamumazga maboma ghose gha ŵanthu.​—Daniyeli 2:44.

 Mazgu ghakuti “Aramagedoni” ghakusangika pa malo ghamoza mu Baibolo, pa Chivumbuzi 16:16. Uchimi wa mu buku la Chivumbuzi ukulongora kuti ku “malo agho mu Chihebere ghakuchemeka Aramagedoni,” “mathemba gha charu chose” ghazamuwunganyika ghose “pamoza ku nkhondo ya zuŵa likuru la Chiuta Wankhongonozose.”​—Chivumbuzi 16:14.

 Kasi mbanjani ŵazamurwa nkhondo ya Aramagedoni? Yesu Khristu ndiyo wazamudangilira gulu la ŵankhondo ŵakuchanya na kuthereska ŵalwani wose ŵa Chiuta. (Chivumbuzi 19:11-16, 19-21) Ŵalwani aŵa ŵakusazgapo wose awo ŵakususka muwuso wa Chiuta na awo ŵakuleka kumuchindika.​—Ezekiyeli 39:7.

 Kasi nkhondo iyi yizamuchitikira ku Middle East? Yayi. Nkhondo ya Aramagedoni yizamuchitika ku chigaŵa chimoza pera yayi, kweni yizamuchitika pa charu chose chapasi.​—Yeremiya 25:32-34; Ezekiyeli 39:17-20.

 Mazgu ghakuti Aramagedoni, agho nyengo zinyake ghakulembeka kuti “Haramagedoni” (mu Chihebere Har Meghiddohnʹ), ghakung’anamura “Phiri la Megido.” Megido yikaŵa tawuni yakale ku Israel. Mbiri yikulongora kuti nkhondo zinandi zakofya zikachitikiranga mu tawuni yeneyiyi, kusazgapo nkhondo zinyake izo zili kulembeka mu Baibolo. (Ŵeruzgi 5:19, 20; 2 Mathemba 9:27; 23:29) Ndipouli, mazgu ghakuti Aramagedoni ghakung’anamura malo gheneko agho ghakaŵa pafupi na Megido yayi. Ku chigaŵa ichi kulije phiri likuru ilo wose awo ŵazamurwa na Chiuta ŵangazakakwanapo nanga vingaŵa kuti tasazga malo ghose gha mu Dambo la Jezreel. Ntheura Aramagedoni ni vinthu ivyo vizamuchitika pa charu chose chapasi apo maboma gha ŵanthu ghazamuwungana kuti ghalimbane kaumaliro na muwuso wa Chiuta.

 Kasi vinthu vizamuŵa wuli pa nkhondo ya Aramagedoni? Nangauli tikumanya yayi umo Chiuta wazamugwiliskira ntchito nkhongono zake pa nyengo iyi, kweni tikumanya vilwero ivyo wakagwiliskirapo ntchito kumanyuma uku, nga vula yamalibwe, vindindindi, vula ya mchapwachapwa, moto na sulefure, ŵaleza, kweniso nthenda. (Yobu 38:22, 23; Ezekiyeli 38:19, 22; Habakuku 3:10, 11; Zekariya 14:12) Ŵalwani ŵanyake ŵa Chiuta ŵazamutimbanizgika nakwamba kukomana ŵekhaŵekha, ndipo paumaliro ŵazamumanya kuti ŵakurwa na Chiuta.—Ezekiyeli 38:21, 23; Zekariya 14:13.

 Kasi nkhondo ya Aramagedoni ndiyo yizamuŵa umaliro wa charu? Charu chizamumara yayi, chifukwa Chiuta wali kupangira ŵanthu kuti ŵakhalengemo kwamuyirayira. (Salimo 37:29; 96:10; Mupharazgi 1:4) Kweniso pa nkhondo ya Aramagedoni ni wose yayi awo ŵazamuparanyika chifukwa Baibolo likuti “mzinda ukuru” wa ŵateŵeti ŵa Chiuta uzamupona pa nkhondo iyi.​—Chivumbuzi 7:9, 14; Salimo 37:34.

 Nangauli mu Baibolo kanandi mazgu ghakuti “charu” ghakung’anamura charu chapasi, kweni nyengo zinyake mazgu agha ghakung’anamura ŵanthu ŵaheni awo ŵakususka Chiuta. (1 Yohane 2:15-17) Ntheura, nkhondo ya Aramagedoni yizamuŵa “umaliro wa charu.”​—Mateyu 24:3.

 Kasi nkhondo ya Aramagedoni yizamuchitika pawuli? Apo ŵakadumbiskananga vya “suzgo yikuru” iyo yizamulongozgera ku nkhondo ya Aramagedoni, Yesu wakati: “Palije munthu uyo wakumanya vya zuŵa na ora ilo, nanga mbangelo ŵakuchanya, nesi Mwana, kweni Adada pera ndiwo ŵakumanya.” (Mateyu 24:21, 36) Ndipouli, Baibolo likulongora kuti nkhondo ya Aramagedoni yizamuchitika mu nyengo ya kuŵapo kwa Yesu ndipo nyengo iyi yikamba mu 1914.​—Mateyu 24:37-39.