Iyyoob 1:1-22
1 Biyya Uuz keessa namichi Iyyoob*+ jedhamu tokko jira ture. Inni nama qajeelaa fi amanamaa* ture;+ akkasumas nama Waaqa sodaatuu fi wanta hamaa taʼe irraa fagaatu ture.+
2 Inni ijoollee dhiiraa torbaa fi ijoollee durbaa sadii qaba ture.
3 Horiiwwan isaa hoolota 7,000, gaalota 3,000, loon 1,000* fi harroota* 500 kan taʼan yeroo taʼu, tajaajiltoota baayʼee hedduu taʼanis qaba ture; kanaafuu, inni namoota Bahaa hundumaa caalaa guddaa ni taʼe.
4 Ilmaan isaa tokkoon tokkoon isaanii guyyaa dabaree isaaniitti mana isaanii keessatti affeerrii ni qopheessu turan. Isaanii wajjin akka nyaatanii fi akka dhuganiifis obboleettota isaanii sadan ni affeeru turan.
5 Guyyoonni dabareedhaan itti wal affeeran erga xumuramanii booda, Iyyoob isaan qulqulleessuuf ergee isaan waamsisa ture. Achiis ganama bariidhaan kaʼee tokkoon tokkoon isaaniitiif aarsaawwan gubaman dhiheessa ture.+ Iyyoob akkana kan godhu, “Tarii ilmaan koo cubbuu hojjetanii, garaa isaaniittis Waaqayyoon arrabsanii taʼuu dandaʼa” jedhee waan yaaduufi. Iyyoob yeroo hundumaa akkana godha ture.+
6 Guyyaan ilmaan Waaqa dhugaa*+ Yihowaa dura dhaabbachuuf itti seenan ni gaʼe;+ Seexannis+ isaan gidduu ni seene.+
7 Achiis Yihowaan, “Eessaa dhufte?” jedhee Seexana gaafate. Seexannis, “Lafa irra naannaʼee, ishii irras asii fi achi deemeen dhufe”+ jedhee Yihowaadhaaf deebise.
8 Yihowaanis Seexanaan, “Tajaajilaa koo Iyyoob hubattee ilaalteettaa?* Lafa irra namni akka isaa tokko iyyuu hin jiru. Inni nama qajeelaa fi amanamaa*+ dha; akkasumas nama Waaqa sodaatuu fi wanta hamaa taʼe irraa fagaatu dha” jedhe.
9 Yeroo kanatti Seexanni akkana jedhee Yihowaadhaaf deebise: “Iyyoob waa malee Waaqa sodaatee ree?+
10 Ati isatti, mana isaattii fi wanta inni qabu hundumaatti naannessitee dallaa eegumsaa hin ijaarree ree?+ Hojii harka isaa eebbisteetta;+ horiiwwan isaas lafa irra guutaniiru.
11 Garuu, mee harka kee diriirsiitii wanta inni qabu hundumaa rukuti; dhugumaan inni ijuma* kee duratti si arrabsa.”
12 Achiis Yihowaan Seexanaan, “Kunoo, wanti inni qabu hundi harka kee* keessa jira. Isa garuu hin tuqin!” jedhe. Kanaafuu, Seexanni Yihowaa* duraa baʼee deeme.+
13 Guyyaa ijoolleen dhiiraa fi ijoolleen durbaa isaa mana obboleessa isaanii isa angafaa keessatti nyaachaa, wayiniis dhugaa turanitti+
14 ergamaan tokko gara Iyyoob dhufee akkana jedhe: “Utuu loon qotaa jiranii fi harroonni isaan biratti dheedaa jiranii,
15 namoonni Saabaa miidhaa geessisanii isaan fudhatan; tajaajiltoota sanas goraadeedhaan ajjeesan. Kan miliqe ana qofa dha; kunoo, amma sitti himuuf dhufeera.”
16 Utuma inni dubbachaa jiruu inni kan biraan dhufee akkana jedhe: “Ibiddi samii irraa Waaqayyo biraa buʼee* hoolotaa fi tajaajiltoota sana gidduutti bobaʼee nyaatee isaan fixe. Kan miliqe ana qofa dha; kunoo, amma sitti himuuf dhufeera.”
17 Utuma inni dubbachaa jiruu inni kan biraan dhufee akkana jedhe: “Kaladoonni+ garee sadiin dhufanii gaalota weeraranii fudhatan; tajaajiltoota sanas goraadeedhaan ajjeesan. Kan miliqe ana qofa dha; kunoo, amma sitti himuuf dhufeera.”
18 Utuma inni dubbachaa jiruu inni kan biraan dhufee akkana jedhe: “Ijoolleen dhiiraa fi ijoolleen durbaa kee mana obboleessa isaanii isa angafaa keessatti nyaachaa, wayiniis dhugaa turan.
19 Akkuma tasaas bubbeen cimaan tokko lafa onaatii dhufee golee manichaa arfan rukute; manichis ijoollee kee irratti jigee isaan ajjeese. Kan miliqe ana qofa dha; kunoo, amma sitti himuuf dhufeera.”
20 Yeroo kanatti Iyyoob kaʼee uffata isaa tarsaase; mataa isaas ni haaddate; achiis lafatti gombifamee sagadee
21 akkana jedhe:
“Gadameessa haadha tiyyaa keessaa qullaa koon baʼe,Qullaa koos nan deebiʼa.+
Yihowaatu kenne,+ Yihowaatu fudhate.
Maqaan Yihowaa yeroo hundumaa haa jajamu.”
22 Kun hundi kan isa irra gaʼe taʼus, Iyyoob cubbuu hin hojjenne yookiin dogoggora raawwateera jedhee Waaqayyoon hin yakkine.*
Miiljaleewwan
^ Tarii, “Kan Jibbame” jechuu dha.
^ Ykn., “nama balleessaa hin qabnee fi qajeelaa.”
^ Kal., “loon cimdii 500.”
^ Kal., “harroota dhaltuu.”
^ Jechama Afaan Ibrootaa maleekota warra ilmaan Waaqayyoo taʼan argisiisu.
^ Ykn., “nama balleessaa hin qabnee fi qajeelaa.”
^ Kal., “garaa kee irra keesseettaa?”
^ Kal., “fuula.”
^ Ykn., “toʼannaa kee jala.”
^ Kal., “fuula Yihowaa.”
^ Ykn tarii, “Bakakkaan samii irraa buʼee.”
^ Ykn., “Waaqayyo wanta sirrii hin taane akkamii iyyuu akka raawwatetti hin dubbanne.”
