Ewiade Amuala Kpɔkɛdelɛ Fane (WHO) ka kɛ: “Menli yɛ mraalɛ basabasa wɔ ewiade amuala. Yedɛlɛ kɛ ewulenzane bie la na ɔhyia kɛ bɛyɛ nwolɛ debie bɛfa bɛsi ye adenle ndɛndɛ.” Fane ne ka kɛ mraalɛ ɛya ko ngyɛnu 30 “mɔɔ bɛgya anzɛɛ bɛ nee mrenyia de la ahu mɔ yɛ bɛ basabasa.” Eza UN ne ka kɛ wɔ ɛvolɛ ko bie anu, kunlima anzɛɛ busuanli bie hunle mraalɛ 137 kenle ko biala wɔ ewiade amuala. a

 Mgbondabulɛ bahola amaa yɛanwu kɛzi ngyegyelɛ ne le kpole la, noko ɔmmaa yɛnnwu nyane mɔɔ ahenle mɔɔ bɛyɛ ye basabasa di la.

 Asoo bɛyɛ wɔ basabasa wɔ sua nu? Anzɛɛ ɛze awie mɔɔ bɛyɛ ye basabasa la ɔ? Saa ɔle zɔ a, ɛnee suzu edwɛkɛ ɛhye mɔ mɔɔ wɔ Baebolo ne anu mɔɔ bahola aboa wɔ la anwo.

  Tɛ wɔ nvonleɛ ti a bɛyɛ wɔ basabasa a

  Moalɛ wɔ ɛkɛ

  Ɔtɛkale ɛ ngomekye

  Bɛnrɛyɛ menli basabasa wɔ sua nu bieko

  Kɛzi ɛbahola wɔaboa awie mɔɔ bɛyɛ ye basabasa la

 Mɔɔ Baebolo ne ka la: “Yɛ nuhua ko biala babu ye mgbonda ahile Nyamenle.”​—Wulomuma 14:12.

 Kakye ɛhye: Ahenle mɔɔ yɛ wɔ basabasa la di ye nyɛleɛ ne anwo ɛzonle.

 Saa nrenyia mɔɔ ɛ nee ye de la ka kɛ wɔ nyɛleɛ ti a, ɔyɛ wɔ basabasa a, ɔnle nɔhalɛ. Ɔwɔ kɛ kunlima kulo bɛ ye mɔ, na ɔnle kɛ bɛyɛ bɛ basabasa.​—Kɔlɔsaema 3:19.

 Ɔdwu mekɛ ne bie a, ɔbahola yeara ye kɛ ahenle mɔɔ yɛ wɔ basabasa ne la lɛ adwenle nu ewule, bɛtetele ye wɔ ɛleka mɔɔ bɛyɛ mraalɛ basabasa la anzɛɛ ɔbo nza. Saa ɔle zɔ bɔbɔ a, ɔbabu ye nyɛleɛ ne anwo mgbonda yeahile Nyamenle. Na ɔdaye a ɔwɔ kɛ ɔbɔ mɔdenle biala ɔkakyi ye subane a.

 Mɔɔ Baebolo ne ka la: “Folɛdulɛma dɔɔnwo wɔ nwo a ɔwie boɛ.”​—Mrɛlɛbulɛ 15:22.

 Kakye ɛhye: Saa ɛte nganeɛ kɛ ɛnlɛ banebɔlɛ anzɛɛ ɛnnwu mɔɔ ɛyɛ a, awie mɔ bahola aboa wɔ.

 Duzu ati a ɔwɔ kɛ ɛmaa awie mɔ boa wɔ a? Saa bɛyɛ wɔ basabasa a bie a ɛbadwenle ninyɛne dɔɔnwo anwo. Saa ɛlɛsi mɔɔ ɛbayɛ la anwo kpɔkɛ a, ɔbahola yeayɛ se ɔluakɛ bie a ɛnnwu ninyɛne mɔɔ doɔdoa zo la anu mɔɔ hyia kpalɛ a.

•   Ɛ nwo banebɔlɛ

•   Mɔɔ baboa ɛ mra ne mɔ la

•   Wɔ ezukoa gyinlabelɛ

•   Ɛlɔlɛ mɔɔ ɛlɛ ɛmaa ɛ hu la

•   Ɛhulolɛ mɔɔ ɛlɛ kɛ ɛ hu kakyi ye subane a ɛbazia ɛ nee ye adɛnla la

 Saa ɛnnwu mɔɔ ɔwɔ kɛ ɛyɛ anzɛɛ ɛ nye zo ta wɔ a, mmamaa ɔgyegye wɔ. Nwane mɔ a bahola aboa wɔ a?

 Ɛ gɔnwo anzɛɛ wɔ busuanli bie mɔɔ ɛdie ye ɛdi la bahola ava moalɛ mɔɔ ɛhyia la yeamaa wɔ amaa wɔagyinla wɔ nyanelilɛ ne anloa. Saa ɛka wɔ edwɛkɛ ɛkile awie mɔɔ dwenle ɛ nwo la a, ɔbaboa wɔ kpalɛ.

 Nɔma mɔɔ menli mɔɔ bɛyɛ bɛ basabasa wɔ sua nu fɛlɛ zo kpondɛ moalɛ ndɛndɛ la wɔ ɛkɛ. Ɛfɛlɛ nɔma ɛhye mɔ azo a ɛbanyia menli mɔɔ baboa wɔ bɛamaa wɔayɛ ngyehyɛleɛ mɔɔ bamaa wɔanyia banebɔlɛ la. Saa ɛ hu die ye nvonleɛ to nu na ɔkulo kɛ ɔkakyi a, ɛbahola wɔavɛlɛ nɔma ɛhye mɔ bie na bɛahile ye mɔɔ ɔwɔ kɛ ɔdimoa ɔyɛ la.

 Menli gyɛne noko bahola aboa wɔ wɔ mekɛ mɔɔ ɛhyia moalɛ ndɛndɛ la. Menli ɛhye mɔ bie a le dɔketama, nɛɛsema anzɛɛ menli gyɛne mɔɔ bɛtete bɛ wɔ nwolɛ la.

 Mɔɔ Baebolo ne ka la: “Gyihova b bikye bɛdabɛ mɔɔ bɛ ahonle ɛbubu la; na ɔdie bɛdabɛ mɔɔ bɛ sa nu ɛdo la.”​—Edwɛne 34:18.

 Kakye ɛhye: Nyamenle ɛbɔ ɛwɔkɛ kɛ ɔbaboa wɔ.

 Gyihova dwenle ɛ nwo kpalɛ. (1 Pita 5:7) Ɔte wɔ ahonle nu edwɛkɛ nee wɔ nganeɛdelɛ bo. Ɔbahola yealua ye Edwɛkɛ Baebolo ne azo yeakyekye ɛ rɛle. Eza ɔkulo kɛ ɛyɛ asɔne. Ɛbahola wɔazɛlɛ ye kɛ ɔmaa wɔ nrɛlɛbɛ nee anwosesebɛ mɔɔ ɛbava wɔagyinla tɛnlabelɛ ne anloa la wɔ asɔneyɛlɛ nu.​—Ayezaya 41:10.

 Mɔɔ Baebolo ne ka la: “Bɛ nuhua ko biala badɛnla ye vanye nee ye feege baka bo, na awie biala ɛnrɛha bɛ ɛzulolɛ.”​—Maeka 4:4.

 Kakye ɛhye: Baebolo ne bɔ ɛwɔkɛ kɛ ɔnrɛhyɛ biala awie biala banyia anzodwolɛ wɔ ye sua nu.

 Gyihova Nyamenle ala a bahola ali yɛ ngyegyelɛ kɔsɔɔti anwo gyima bɔkɔɔ a. Baebolo ne bɔ ɛwɔkɛ kɛ: “Ɔbakyikyi bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko.” (Yekile 21:4) Zɔhane mekɛ ne, yɛ rɛle bavi ninyɛne mɔɔ maa yɛdi nyane la ɔluakɛ ninyɛne mgbalɛ a yɛbahakye a. (Ayezaya 65:17) Anzodwolɛ ɛhye a Baebolo ne ɛbɔ nwolɛ ɛwɔkɛ kɛ ɛbanyia ye kenle bie a.