Nichʼooní bił iiná haołtʼiʼgo, ałʼąą ádaatʼéego ańdahaztʼiʼ hólǫ́ǫ doo. Nitsóhkeesgi ałʼąą átʼé, dóó nihidiʼneesdzą́ągi łahda biniinaa ańdahaztʼiʼ haleeh. Doodaiiʼ náádaa łahdę́ę́ʼ dóó tʼáadoo hooyání haada hootʼįįhgo ałdóʼ biniinaa ańdahaztʼiʼ haleeh.

Anáhóótʼiʼ haleehgo doo baa nídíitʼįįł da dínóohsįįłgo da átʼé. Ákondi Diyin Bizaad áníigo éí ańdahaztʼiʼ haleehgo éí hashtʼezhdoolííł. (Matthew 5:23, 24) Nichʼįʼ anáhóótʼiʼ haleehgo éí Diyin Bizaad bikʼehgo íʼiinilaago bee hashtʼe hodooníiłgo átʼé.

DIYIN BIZAAD KÓNÍ: “Yátiʼ baa hwiilzhíísh.” (Ecclesiastes 3:1, 7) Anáhóótʼiʼ haleehgo bá náhoołʼaahgo baa yáłtiʼ. Éí baa nitsíníkeesgi nichʼooní hazhóʼó bee bił hólneʼ. Tʼáá áłahájįʼ “saad tʼáá aaníinii” nichʼooní bee bichʼįʼ yáníłtiʼ. (Ephesians 4:25) Tʼahdoo saad haleehdą́ą́ʼ, hodoochįįłígíí bitsʼąą ádíínílzin. Hazhóʼó nátʼą́ą́ʼ hááʼoodzíiʼgo éí baa hwiinítʼínígíí doo biniinaa ałchʼįʼ hodoochįįł da.​—Proverbs 15:4; 26:20.

Azhą́ shı̨́ı̨́ nichʼooní ánínígíí doo nił ákótʼée da ndi jiiníbaʼ. Nichʼooní ayóóʼóʼóʼní dóó nił nilínígíí béénílniih. (Colossians 4:6) Saad haleehgo tʼáá tsı̨́łígo hashtʼedoohłííł, ałchʼįʼ yáłtiʼgi niʼ kóhłééh lágo.​—Ephesians 4:26.

DÍÍ BIKʼEH ÁDÍÍNÍÍŁ:

• Ańdahaztʼiʼígíí hazhóʼó baa nídóohtʼįįł biniyé bá náhoołʼaah

• Nichʼooní bíniʼdii yáłtiʼ hazhóʼó yíísíníłtsʼą́ąʼ, hadíídzihgi náhwiidooʼaałgo átʼé

DIYIN BIZAAD KÓNÍ: “Tʼáá łaʼ haʼoojééʼ kʼehgo ayóóʼádaʼahíínóhʼní, nihił daʼílı̨́įgo náánáłaʼ nihiláahdi ádaatʼéego baa nitsídaahkees.” (Romans 12:10) Íísíníłtsʼą́ąʼgi éí tʼáá íiyisí yáʼátʼééh. Nichʼooní yaa nitsíkeesígíí baa ákonínízingo ‘baa aʼááh nínízin . . . índa aʼohgo ádaa nitsíníkees.’ (1 Peter 3:8; James 1:19) Tʼáadoo tʼóó íísíníłtsʼą́ą́ʼ áhodílʼíní. Baa nanináhígíí áłtsé nahjįʼ nidííʼáałgo nichʼooní áłtsé bá hwiidííłʼaał. Doodaiiʼ áłtsé tʼah hazhóʼó baa nídíitʼįįł bididíiniił. Nichʼooní tʼáá łáhíjí bił nílı̨́ ałkʼijįʼ éí ndagaʼ, ákótʼéego nitsíníkeesgo éí doo ‘hání síníʼą́ą’ da doo.​—Ecclesiastes 7:9.

DÍÍ BIKʼEH ÁDÍÍNÍÍŁ:

• Azhą́ shı̨́ı̨́ nichʼooní ánínígíí doo nił ákótʼée da ndi, hazhóʼó yíísíníłtsʼą́ą́ʼ

• Nichʼooní íiyisí yaa yáłtiʼígíí bíká íísíníłtsʼą́ą́ʼ, áátʼįįłgi dóó bizaad yee hahadziihgi bee hanisííd

DIYIN BIZAAD KÓNÍ: “Yéego naʼanish tʼáá ałtso bee ínáʼiideełii átʼé, nidi tʼóó yátiʼígíí éí téʼéʼı̨́ áhwiiłʼįįh.” (Proverbs 14:23) Anáhóótʼiʼígíí hazhóʼó hashtʼe doolníiłgi bee ałghaʼdoohtʼą́ągo éí doo tʼáá ákódí da. Bee lą́ asoołı̨́ı̨́ʼígíí bikʼeh áʼdoołííł. Díí éí ayóó binaʼanishgo átʼé, ndi tʼáá ákónéehee bindoołnish. (Proverbs 10:4) Tʼáá ánóhła binaałnishgo éí ‘yáʼátʼéehii nihichʼįʼ ninádoolyééł.’​—Ecclesiastes 4:9.

DÍÍ BIKʼEH ÁDÍÍNÍÍŁ:

• Nihichʼįʼ anáhóótʼiʼígíí hashtʼe dohłíiłgi bee ałghaʼdidoohtʼááł

• Tʼáá ahą́ą́h łaʼ yohłaaígíí nánółʼįįh