Ephesians 4:1-32
4 Éí bąągo shí, Bóhólníihii baa hashneʼgo biniinaa awáalyaaí nishłíinii nánihooshkąąh, Diyin God yiniyé nihíká ádííniidii bą́ą́h daʼnohłı̨́įgo dayínóhkááh.
2 Tʼáá ałtsojįʼ aʼohgo ádanohtʼée leʼ, nihaʼátʼeʼ ádaadin leʼ, áádóó nízaadgóó hadaʼíínółní. Ałchʼįʼ hadaʼíínółníigo ayóóʼádaʼahíínóhʼní.
3 Níłchʼi Diyinii bee łáʼí nohłı̨́įgo kʼé bee daʼahíínóhtąʼgo ádaʼdíínółzin.
4 Ił chohooʼı̨́ tʼááłáʼíígíí biniyé Diyin God nihíká ádííniidígi átʼéego daʼoodlání tʼáá łaʼ bizhiʼee atsʼíís nilı̨́, índa Níłchʼi Diyinii tʼááłáʼí,
5 áádóó Bóhólníihii tʼááłáʼí, áádóó oodlą́ tʼááłáʼí, áádóó bee alzı̨́įhii tʼááłáʼí,
6 índa Diyin God tʼááłáʼí, éí diné tʼáá ałtso yiTaaʼ nilı̨́, tsʼídá tʼáá ałtso bee bóhólnííh, tʼáá ałtso yił hólǫ́, índa tʼáá ałtso yiiʼ hólǫ́.
7 Tʼááłáʼí niitínígo ajoobaʼ nihaa dadeestʼánígíí éí Christ nihaidiníʼánígi áníłtsogo bee há nideiilʼaʼ,
8 Diyin God bizaad bee akʼeʼashchíinii ánínígi átʼéego:
Aghánáhóóʼáajįʼ hahodzizleʼgo yisnááh tʼáadoo bee néelą́ʼígóó ajííʼeezh,áádóó aa deetʼáanii diné bitaazdeezʼą́.
9 Aghánáhóóʼáajįʼ hahodzizleʼ haʼnínígíishąʼ, haʼátʼíí ááhyiłní? Jó, nahasdzáán biyiʼgóó áłtsé nahodzizleʼ.
10 Díí yaago nahodzizleʼígíí tʼáá éí dego yádiłhił tʼáá ałtso bilááhgóó hahodzizleʼ, tsʼídá tʼáá ałtsogóó hojílǫ́ǫ doo biniyé.
11 Áko łaʼ daalʼaadii dadooleeł, łaʼ Diyin God yá dahalneʼ doo, łaʼ haneʼ yáʼátʼéehii yaa dahalneʼ doo, łaʼ daʼoodlání yá naazı̨́ dadooleeł, áádóó łaʼ naʼnitiní danilı̨́į doogo Christ hataideezʼą́.
12 Diyin God bidiyı̨́ı̨́ʼ tsʼídá yáʼátʼéehgo hashtʼedahodoolíiłgo, éí daʼoodlání Christ bá dajílníish dooleeł, áko Diyin God bidiyı̨́ı̨́ʼ tʼáá łaʼ bizhiʼee Christ yitsʼíís nilíinii bidziil dooleeł biniyé hataideezʼą́.
13 Áko tʼáá áníiltso niheʼoodląʼ bee łáʼí dadiidleełgo, índa Diyin God biYeʼ bééhoniilzin bee łáʼí dadiidleełgo diné nininísáanii dadiidleeł, Christ nininísą́ yę́ęgi átʼéego nidadíníilzééł.
14 Áko kodóó áłchíní nahalingo naʼnitin ałtah áátʼeełii tʼáadoo bee nídahííníilghaałí, diné binaʼadloʼii áádóó bindahagiz dayiichįįhii tʼáadoo tʼáá ádzaagóó nihíniʼ ádahaleʼí.
15 Nidi ayóóʼíʼííníiʼníigo tʼáá aaníígóó yéiiltiʼgo tʼáá ałtsojįʼ Christ éí nihá atsiiʼ jílíinii hwiiʼjįʼ niilzéeł dooleeł.
16 Jó, ajoodlánígíí Christ bitsʼíís jílı̨́. Atsʼíís tʼáá átʼé ahadaditʼą́ą́góó daʼahótąʼígi átʼéego Christ bee ahídajóltąʼ, áko tʼáá ádzíłtso yáʼátʼéehgo ahinidajilnishgo Christ bitsʼíís dajílı̨́įgo índa ayóóʼádaʼahijóʼníigo ahinidajilnishgo Christ bitsʼíís bidziil jooleeł.
Christ bee iiná ániidíii
17 Éí bąą Bóhólníihii bá haasdziihgo nihiyahoniishłįįhgo ánihidishní, Kodóó doo oodlání danilíinii tʼáá ádzaagóó nitsídaakeesgo dahinánígi átʼéego tʼáadoo dahinohnání.
18 Éí bił daatłʼééʼ bąą doo akʼidaʼdiitįįh da. Dabijéí doo nabídaʼdidzilgóó bąą doo bił éédahózin dago biniinaa Diyin God bee iiná yitsʼą́ądi naaldeeh.
19 Éí bąąhági ádaaníił nidi doo yaa yádanízin da, áádóó badaaʼihii tʼáá ałtso bíchą́hwíídéeniʼgo bee tsiʼnidaʼaldeehii yaa ádadeestʼą́.
20 Nidi nihí doo éigi átʼéego Christ bitsʼą́ą́dóó bídahoołʼą́ąʼ da!
21 Tʼáá shı̨́ı̨́ aaníí haa dahosidootsʼą́ąʼgo Jesus binahjįʼ naʼnitin tʼáá aaníinii bíndanihidiʼneestą́ą́ʼ.
22 Áko átséédą́ą́ʼ ádanohtʼéé nítʼééʼ yę́ę bitsʼą́ąjįʼ hahohkááh. Jó, éí átséédą́ą́ʼ ádanohtʼéé nítʼééʼ yę́ę badaaʼihii bił nidaatʼiʼii átʼé, áko éí adáhonooní naʼadloʼ nilíinii yee nidanihiiłchxǫǫh.
23 Áko nihintsíkees ániidígo nihá ánídaolneʼ,
24 áádóó iiná ániidíii biih hohkááh. Éí Diyin God tʼáá bináłtʼéego ályaa, tsʼídá tʼáá ákogi átʼé índa tʼáá aaníí dílyinii átʼé.
25 Ákótʼé bąą woochʼííd yóóʼadahidohʼaahgo, tʼááłáʼí nootínígo bił kéédahohtʼíinii saad tʼáá aaníinii bee bił ałchʼįʼ yádaałtiʼ, háálá ahidiníłnáago Christ bił tʼááłáʼí niidlı̨́.
26 Nihádahachįįhgo tsʼídá bąąhági ádaohnééh lágo; tʼáá nihádahachįʼgo oʼóʼááł lágo.
27 Tʼááká níłchʼi bidaʼiiníziinii binanitʼaʼí bá ashjaʼoohłééh yíilaʼ.
28 Azhniʼįįhii tsʼídá doo náázhdíʼnóoʼı̨́įł da, nidi hanaanish ílı̨́įgo joołtʼihgo éí bee badahojoobáʼíígíí baa jijoobaʼ doo.
29 Saad nichǫ́ʼí tʼáadoo bee yádaałtiʼí, nidi ashjaʼoolíiłgi saad bidahónéedzáanii bee yádaałtiʼ, áko éí deidiitsʼaʼii bee bikʼidahojidlíigo dadínóosééł.
30 Áádóó Diyin God biNíłchʼi Diyinii tʼáadoo bíniʼ nídaołʼaahí, háálá nihéédadidoochił beiníłką́ąjįʼ Diyin God bííʼ danohłı̨́įgo Níłchʼi Diyinii bee nihéédahózin.
31 Anáháshchʼííʼ, hashkéhwiindzin, áháchįʼ, azahóchįʼ, tʼáá ádzaagóó aa haneʼ índa áká naatʼá tʼáá ałtso átsʼá dahidohtʼaah.
32 Áádóó ahidiníłnáago ahaa dajiinohbaʼ, índa Diyin God éí Christ yee nihibąąhági átʼéii nihá yóóʼiidííʼánígi átʼéego nihí ałdóʼ ahaa aʼááh danohsingo ałchʼįʼ bąąhági ádaahníiłii ahá yóóʼanídahidohʼaah.
