Proverbs 24:1-34
24 Diné doo yáʼádaashóonii tʼáadoo yiníłchʼı̨́dí; bił nijildeeh laanaa tʼáadoo níníziní.
2 Háálá doo atsʼííd bijéí biiʼ dahólǫ́ǫgo yindahaʼá, áádóó ádílááh yaa yádaałtiʼ.
3 Hódzą́ bee kin niitʼááh, áádóó bee akʼidiʼyiitįįhii bee niłdzilgo niitʼááh.
4 Éí biiʼ ahą́ą́h dahodíʼnilgóó ił ééhózin bee jitʼíinii daʼílíinii índa tsʼídá danizhóníii hadadilbı̨́ı̨́h.
5 Diné hóyáanii bidziil; tʼáá aaníí, diné bił ééhózinii bidziil bá náás áániił.
6 Háálá hódzą́ bee nandiʼneestą́ąʼgo bíninilʼą́ągo dííbah, áádóó tʼóó ahayóí kótʼéego daaníinii hólǫ́ǫgi hasih hazʼą́.
7 Doo áhályáanii éí hódzą́ yiʼoh nitsíkos; dáńʼdítı̨́įhgi doo yáłtiʼ da doo.
8 Doo yáʼáshǫʼ ádeeshnííł nízingo nahaʼáii éí bee ádíláhí bidiʼníi doo.
9 Doo áháyą́ bee nitsáhákees bąąhági átʼéii átʼé, áádóó diné ánahałtʼiʼii éí diné doo bił nidaʼíłdįįh da.
10 Bikʼee tiʼhooʼníihii nikʼiildogo nąąh nááhákaʼgo tsʼídá doo nidziil da.
11 Dadínóonééłgóó dabiʼdéetʼéeshii yisdáhínííł áádóó kʼadę́ę nidabidiʼtseedii tʼą́ą́ʼ ádeínísin.
12 Shoo, díí doo nihił bééhózin da lá, diníigo, Daʼ Diyin God éí diné bijéí haisíidiísh doo yaa nitsíkees da? Áádóó Diyin God éí niiʼ sizíinii yaa áhályáaniísh doo bił bééhózin da? Éí diné tʼááłáʼí jinítínígo baa nidadziskaii bikʼehgo hachʼįʼ ninádiʼyoodlééł.
13 Shiyeʼ, tsésʼná bitłʼizh niyą́, háálá éí yáʼátʼééh, áádóó tsésʼná bitłʼizh bitsʼaʼ bąąhdę́ę́ʼ tsésʼná bitłʼizh nidahidilchʼą́łígíí éí niyą́; jó, éí nił łikan.
14 Éigi átʼéego niiʼ sizíinii bá hódzą́ nił bééhózin doo, hódzą́ bikʼííníyáago náás ná honítʼiʼ doo, áádóó nił chohooʼíinii doo nahjįʼ kódoolníił da.
15 Diné doo yáʼáshóonii nílíinii, diné tʼáá ákogi ádaaníiłgo kéédahatʼínígíí tʼáadoo baa hínítíní; bighan tʼáadoo bitsʼą́ą́ʼ nihíłchǫǫhí.
16 Háálá diné tʼáá ákogi átʼéii tsostsʼidi naaʼiigoh, nidi tʼáá bíighahdi nídiiʼnah, nidi diné doo yáʼádaashóonii bichʼįʼ hodiiʼnáahgo dahidigeeh.
17 Niʼanaʼí bide áhoodzaago tʼáadoo baa nił nihoozhǫǫhí; bikʼeh hodidleehgo nijéí tʼáadoo baa bił hózhóní.
18 Éí doodaléiʼ Bóhólníihii niidoołtsééł, áko doo bił hodííshǫǫł da áádóó tʼóó báhádzidgo yee atéʼéłʼíinii yitsʼą́ąjįʼ kónéidoodlííł.
19 Doo yáʼátʼééh ádaaníiłii biniinaa tʼáadoo bikʼee ádił náhodílchiłí, índa diné doo yáʼádaashóonii tʼáadoo yiníłchʼı̨́dí.
20 Háálá diné doo yáʼáshóonii doo náás bá honítʼiʼ da doo, diné doo yáʼáshóonii bibee hoolʼiní diltłiʼii dínóoltsis.
21 Shiyeʼ, Bóhólníihii áádóó aláahgo naatʼáanii díínísin; nahatʼá łahgo ándayoodlíiłii tʼáadoo béédiilwoʼí.
22 Háálá tʼáá hooʼneehee báhádzidgo áhooníiłii hakʼiidootʼih; éí tʼáá áłah bitsʼą́ą́dóó atídahodiʼdoolníłígíí háísh bił bééhózin?
23 Díí ałdóʼ diné dahóyáanii dabizaad.
Diné ałʼoh átʼéego baa nízhdóotʼįįłgo doo yáʼátʼéeh da.
24 Diné doo yáʼáshóonii, Tʼáá ákogi ánítʼé, yiłníinii éí diné dahódziih doo; diné tʼáá kééhatʼı̨́ı̨́ nítʼééʼ tʼóó haaʼih danízin doo.
25 Nidi diné doo yáʼáshóonii deideeztehii bił dahózhǫ́ǫ doo, áádóó yáʼátʼéehii bee bikʼidahozhdoodliił.
26 Tʼáá ákogi átʼéego hááhádziihii éí adaaʼ deiztsʼǫs nahalin.
27 Dáʼákʼehdi ninaanish dooleełii tʼáá áłdįįłtʼéego hashtʼedíílííł, áko índída kin nidííʼááł.
28 Bił kééhótʼíinii tʼáadoo átʼéégóó doo baa chʼíhodííʼáał da, índa doo niyoochʼíídgóó baa hodíílnih da.
29 Áshijiilaaígi átʼéego shí ałdóʼ tʼáá ákóhodeeshłííł; ájíítʼįįdii tʼáá éí bikʼehgo kʼééhodideeshdlííł, doo didííniił da.
30 Bił hóyéeʼii bidáʼákʼeh áádóó diné doo akʼiʼdootą́ą́ átʼéii bichʼil naʼatłʼoʼii yílʼáago bíighahgóó chʼíníyá.
31 Áko, shoo, bidáʼákʼehgóó tʼáá átʼé hosh tʼéí yílʼá, áádóó chʼil deeníní tʼáá átʼé bił yílʼá, índa tsé binaagóó ahénátłʼinii naaʼahineezkaad lá.
32 Áko éí yiiłtsą́ągo baa nitsísékééz, áádóó nééłʼı̨́įʼgo nashineeztą́ą́ʼ.
33 Tʼóó kónígháníjįʼ nááʼiideeshhosh; tʼóó kónígháníjįʼ ánáádínéeshyił; tʼóó kónígháníjįʼ shijaatʼah díníshniiʼgo adínéeshyił.
34 Ákónítʼı̨́įgo aghaʼiiʼníiłii nahalingo téʼéʼı̨́ nikʼi hwiidooleeł, áádóó téʼéʼı̨́ éí diné bee naʼabaahii neijaahgo haatįįh yíyá nahalin doo.
