Ecclesiastes 3:1-22
3 Tsʼídá tʼáá ałtsoní baa hwiilzhíísh áádóó yádiłhił biyaagi ádahooníiłii tʼáá ałtso bá dahwéelzhíísh.
2 Niʼiichííh baa hwiilzhíísh áádóó aniné baa hwiilzhíísh; kʼéédaʼdilyééh baa hwiilzhíísh áádóó kʼéédadilyéehii daagizh baa hwiilzhíísh.
3 Naʼatseed baa hwiilzhíísh áádóó náádiʼyiidlááh baa hwiilzhíísh; tááʼiyoolchǫǫh baa hwiilzhíísh áádóó habįʼ baa hwiilzhíísh.
4 Atíńdiʼnidleeh baa hwiilzhíísh áádóó dloh hasin baa hwiilzhíísh; yínííł baa hwiilzhíísh áádóó azhish baa hwiilzhíísh.
5 Tsé yóóʼadahaltłʼiid baa hwiilzhíísh áádóó tsé áłah álʼı̨́ baa hwiilzhíísh; ałzééʼ ásniiʼ baa hwiilzhíísh áádóó doo ałzééʼ ásniiʼ da baa hwiilzhíísh.
6 Háʼdéestʼı̨́ı̨́ʼ baa hwiilzhíísh áádóó yóóʼiʼiideeł baa hwiilzhíísh; wótąʼ baa hwiilzhíísh áádóó yóóʼahilghan baa hwiilzhíísh.
7 Niʼiildlaad baa hwiilzhíísh áádóó náʼálkad baa hwiilzhíísh; adéesyéél baa hwiilzhíísh áádóó yátiʼ baa hwiilzhíísh.
8 Ayóóʼóʼóʼní baa hwiilzhíísh áádóó akʼediniih baa hwiilzhíísh; anaaʼ baa hwiilzhíísh áádóó kʼé baa hwiilzhíísh.
9 Haʼátʼíísh bee naalnishí yinaalnishii bá bínáʼayiideeł?
10 Nihokááʼ dineʼé ádił niʼíníísh yee naa ádídantaah doo biniyé Diyin God beidiníʼą́ągo yiiłtsą́.
11 Tʼáá ałtsoní nizhónígo baa hwiilzhíishgo áyiilaa áádóó ałdóʼ dabijéí biiʼ hoolʼáágóó dahólǫ́ǫ doogo bił béédahózingo áyiilaa; azhą́ ákótʼée nidi, hodeeyáádóó nihoníyáajįʼ Diyin God binaanish áyiilaaígíí doo hoł béédahoozı̨́ı̨́ʼ átʼée da.
12 Díí shił bééhózin: hódayéełkaahgo hoł nidahoozhǫǫh áádóó yáʼátʼééh ádajooníłígíí náábíláahgo há yáʼánáánátʼéeh dooígíí doo łaʼ há nááhódlǫ́ǫ da.
13 Áádóó ałdóʼ diné tʼááłáʼí jinítínígo dazhdooyı̨́įłii áádóó dazhdoodlı̨́įłii índa hanaanish baa hoł dahózhónígíí éí Diyin God ainíláii átʼé.
14 Tʼáá haʼátʼíhída Diyin God tʼáá bí ááníiłgo éí hoolʼáágóó hólǫ́ǫgo shił bééhózin; tʼáadoo bóoltsódí da, doodaiiʼ tʼáadoo bitsʼą́ą́dóó hadoolyéłí da, áádóó diné éí Diyin God deidósin doo biniyé ábiʼdiilyaa.
15 Kʼad hólóonii éí tʼáá náshiinídą́ʼídi hólǫ́, áádóó hodooleełii éí tʼáá íídą́ą́ʼ hólǫ́, áádóó Diyin God éí bił yóóʼahóóyáii yitʼíní áyoolííł.
Iiná doo ákǫ́ǫ́ átʼée da
16 Áádóó ałdóʼ ooʼáłígíí biyaagi doo haada yitʼéego ánihwiitʼaah dooleeł yę́ęgi doo yáʼáshónígi áhoonííł, áádóó tʼáá ákogi áhoonííł dooleeł yę́ęgi doo yáʼáshónígi áhooníiłgo yiiłtsą́.
17 Ákohgo tʼáá shiyiʼídi ádíshní, Diyin God éí tʼáá ákogi ádaatʼéii áádóó doo yáʼádaashóonii yeinítʼı̨́į dooleeł, háálá áhooníiłii áádóó naanish danilíinii tʼáá ałtso baa dahwiilzhíísh.
18 Tʼáá shiyiʼídi ádííniid, Nihokááʼ dineʼé ádaatʼéegi Diyin God ííshją́ą́ ábidoolííł, áko tʼáá bí naaldlooshii danilı̨́įgo ádadidooltsééł.
19 Háálá nihokááʼ dineʼé bił áhooníłígi átʼéego naaldlooshii ałdóʼ bił áhoonííł; tsʼídá tʼááłáhígo hazʼą́ ákótʼéego bił áhoonííł: tʼááłáʼí daatsaahígi átʼéego łaʼígíí ałdóʼ daniné; tʼáá aaníí, tʼáá ałtso aheełtʼéego nídídzih; éí bąą diné éí naaldlooshii doo yiláahgo átʼée da, háálá tsʼídá tʼáá ałtsoní tʼáadoo nídandlíní da.
20 Tʼáá ałtso tʼááłáhíjįʼ ahikááh; tʼáá ałtso łeezh łibáhí bitsʼą́ą́dóó ádaatʼı̨́, áádóó tʼáá ałtso łeezh łibáhí nídadoodleeł.
21 Diné biníłchʼi dego ahwiileehígíí áádóó naaldlooshii biníłchʼi yaago nahasdzáán bichʼįʼ ahwiileehígíí háísh bił bééhózin?
22 Éí bąągo diné tʼáá bí binaanish yaa bił nihoozhǫǫhígíí biláahgo yáʼátʼéehii ádingo baa ákoniizı̨́ı̨́ʼ, háálá éí tʼáá bíiʼii átʼé; éí bikééʼdóó átʼée dooleełígíí háísh bił ííshją́ą́ íidoolííł?
