Kansi Ufumu wa Mulungu uzayambe nthawe yanji kutonga ichi chalo?
Ayakine mwa ophunzila a Yesu enzefuna kuziŵa kuti ni nthawe yanji yati uzayambe Ufumu wa Mulungu kutonga ichi chalo. Yesu elaŵila kuti ove enzefunikila lini kuziŵa nsiku ngayo-ngayo yati vizachitike vamene ivi. (Machitidwe 1:6, 7) Koma poyamba Yesu enze elaŵila kuti, vinthu viyakine vikezeyamba kuchitika mokonkhejana-konkhejana kusogolo, “ove enzefunikila kuzindikila kuti Ufumu wa Mulungu [wenze] pafupi” komasoti kuti kwalombapano ufumu wamene uyu uyambe kutonga chino chalo.—Luka 21:31.
KANSI NI VINTHU VOTYANI VECHILAŴILA YESU KUTI VIZACHITIKE?
Yesu enena kuti: “Ntundu uzawukilane na ntundu uyakine, ufumu uzawukilane na ufumu uyakine. Kuzaŵe kunyang’anya kwa mphamvu kwa chalo, komasoti kuzaŵe milili na njala m’malo osiyana-siyana.” (Luka 21:10, 11) Monga ni mwatuziŵila kuti chimuti chitwale tikawona maluŵa, vizindikilo vechipeleka Yesu vutiyavya kuziŵa kuti Ufumu wa Mulungu uli pafupi. Vinthu vechinena Yesu kuti vizachitike, vonse vuchitika pa nthawe imozi pachalo chonse. Kansi vuchitika chendi? Tiyeni tiwone.
1. NKHONDO
Mu 1914, kwiyambika nkhondo ikulu ngako yosiyana na nkhondo zonse zamene zenze zichitikapo kale mu mbili yonse ya ŵanthu! Ofotokoza mbili, onena kuti chaka cha 1914 chenze chaka cha padela chifukwa niye peyiyamba nkhondo yoyamba ya pachalo chonse. Kufumila kale ngako kwenze kukaliye katishiliwako ntchito mabomba am’mululu, mfuti za mashini, mfuti za chusi cha poizoni, na vinthu viyakine vopailako ŵanthu pa nkhondo. Pavuli pake ichizawela nkhondo yachiŵili ya pa chalo chonse, yamene enzekatishila ntchito mfuti za poizoni. Kufumila mu 1914 nkhondo zankhala zuchitika mu madela osiyana-siyana komasoti zapaya ŵanthu mamiliyoni anyinji.
2. KUNYANG’ANYA KWA MPHAMVU KWA CHALO
Buku ya Britannica Academic yunena kuti chaka chilichonse kuchitika ngozi ya kunyang’anya kwa mphamvu kwa chalo, pafupi-fupi maulwendo okwana 100, vamene ivi vuwononga “vinthu vinyinji” ngako. A ntchito yowona za nyengo ku United States, onena kuti “molingana na malipoti owonesha kuti, (kufumila mu 1900), kuchitika ngozi za kunyang’anya kwa mphamvu kwa chalo maulwendo 16 chaka chilichonse.” Ayakine onena kuti namba ikuya yukwelela-kwelela ya kunyang’anya kwa mphamvu kwa chalo chifukwa masiku ŵano nikosavuta kuzindikila kuti kuchitike ngozi zamene izi. Komalomba mavuto okonkhapo kamba ka kunyang’anya kwa mphamvu kwa chalo, na kuyangijilika kwa masoka amene aŵa ni kuwonongeka kukulu kwa vinthu na imfwa.
3. KUSOŴA KWA CHAKULYA
Pa chalo chonse, pali kusoŵa kwa vakulya kwamene kuchitishiwa na nkhondo, ukhuluku, mavuto akulu a zachuma komasoti kachitidwe kaipa ka ulimi. Pulogilamu ya Bungwe Yuwona pa nkhani ya Vakulya ya chaka cha 2018 inena kuti: “Pachalo chonse, ŵanthu okwanila 821 milioni okumana na njala, komasoti pa ŵanthu 124 milioni amene aŵa ovutika na njala ikulu ngako.” Chaka chilichonse kusoŵa kwa chakulya kwachitisha kuti ŵana okwanila 3.1 milioni akokufwa. M’chaka cha 2011, kusoŵa kwa chakulya kwechitisha kuti hafu ya ŵana afwe pachalo chonse.
4. MATENDA KOMASOTI MILILI
Buku ya World Health Organization (Bungwe ya pachalo chonse yuwona za umoyo) yunena kuti: “Vyaka 20 vapita vawoneka kuti matenda apaka ngako. Matenda akale monga—kolela, maleliya amutomfwe—vichepako, koma kwiyambika soti matenda ayakine, monga chifuŵa, Ebola, Zika komasoti matenda opasilana.” Mulili uyakine walombapano ni COVID-19. Olo kuti madokota afwana njila zinyinji zangayavyile ŵanthu, vankhala vovuta kuti akwanishe kupojeka matenda onse.
5. KULALIKILA PACHALO CHONSE
Yesu elaŵila soti za mbali iyakine ya chizindikilo enena kuti: “Uthenga uweme uyu wa Ufumu uzalalikiliwe pachalo chonse kuli ŵanthu, kuti unkhale umboni ku mitundu yonse, pamene apo mapeto azafwike.” (Mateyu 24:14) Olo kuti mavuto apaka ngako pano pachalo, ŵanthu opitilila 8 milioni olallikila za uthenga uweme wa Ufumu wa Mulungu mu vyalo na madela opitilila 240 komasoti mu vilaŵilo chifupi-fupi 1.000. Ivi venze vikaliye chitikapo mu mbili yonse ya ŵanthu!
KANSI VAMENE IVI VUTANTHAUZACHINJI KULI SEWO?
Vinthu vechilaŵila Yesu kuti vizachitike, vuchitika chendi masiku ŵano. Ndaŵa yanji ni chinthu chofunika ngako kuziŵa vamene ivi? Chifukwa Yesu enena kuti: “Mukezewona vamene ivi vuchitika, muzaziŵe kuti ufumu wa Mulungu wavwendelela.”—Luka 21:31.
Kwalombapano, Ufumu uzachitishe kuti chifunilo cha Mulungu chichitike pano pachalo
Vizindikilo vinenewa na Yesu komasoti mbali ziyakine za m’Baibolo vutiyavya kumvwisha kuti Mulungu enkhazikisha Ufumu wake kululu mu 1914. a Chamene ichi niye chaka chechinkhazikishiwa Yesu kunkhala Mfumu ya Ufumu wa Mulungu. (Salimo 2:2, 4, 6-9) Lombapano, Ufumu wa Mulungu uyambe kutonga chino chalo ndipo uzasilije maufumu onse a ŵanthu nochinja chalo kunkhala paladaiso, kuti ŵanthu azankhalemo kosasila.
Mawu amu pemphelo yachisanzo yechiphunzisa Yesu akwanilishiwe kwalombapano: “Ufumu wanu uwele. Kufuna kwanu kuchitike, monga n’kululu, chimozi-mozi soti na pano pansi.” (Mateyu 6:10) Koma kansi Ufumu wa Mulungu wachita chinji kufumila mu 1914? Lomba n’chinji chatingayembekezele Ufumu wamene uyu ukazasilija kufumyapo maboma onse a ŵanthu?
a Kuti muziŵe vinyinji polaŵila za chaka cha 1914 onani buku yakuti: mutu 32 mʼbuku ya Sangalalani na moyo kosasila! yofalisiwa na Mboni za Yehova .
