Nicolas ni Céline yaahoolela nikacamiho noohiyana. Efiliyali yo Fransa yaahaarumihela mmuloko muvyaani. Awo aaloca: “Woopaceryani naahitepa ohakalala nave voocharela naahikhalano munkhela mutokweene wa asinthamwene ahu. Nlelo neera nihaakumve okhalano asinthamwene ancipale mmuloko yoola muvyaani.” a Muni nwerye hai okhala oohakalala ni weeriha matorokelo anyu okhala oohakalaliha mmuloko muvyaani? Tiheeni akina anaphwanelaaya weera wi ekhaviherye? Nave mareeliho taani oomunepani munahaalaanyu waakhela ni waalipiha akina mmuloko muvyaani?

ICHU XEXE INAHAALA WOOKHAVIHERYAANI MU WIIKHOVELELIHA

1. Mmuroromele Yehova. (Sal. 37:5) Murokora awiichaniwa Kazumi o Xapawu, aahimaliha iyaakha 20 mmuloko awe, nave aiyawe yaahitransferiiriwa mmuteko aya wi yalapeke makupa makina. Ti mwawiihai owo ‘aamunnyerenryeiye Yehova ephiro awe’? Owo ooloca: “Miyaano kaahivekela vancipale wa Yehova nave kimuleela mukhalelo kiisoonaaka; miyaano kaanoova, kiisoona okhala meekhaaka nave kaari awuukhuwa. Nyenya vaavaa kaavekelaaka wa Yehova, owo aanakivaha ikuru seiyo kaachunaaka.”

Tiheeni munaphwanelaanyu weera wi mmuroromeleke vancipale Yehova? Hiiha ntoko mwiri onachunaaya maahi ni wuucelana wa echaya wi wunnuwe, hiiha tho nroromelo nahu nnaphwanela olyiha phaama wi ninnuwe. Nicolas yoowo olociwe woopaceryani, aahilipiha omuroromela wawe Yehova moorweela wa wuupuwelela sootakiherya ntoko sa—Aparahamu, Yesu ni murummwa Paulo—yaawo yaapanke wiilipixerya otokweene wi epake yookhwela ya Yehova. Marehereryo a yoohuserya ya muchu mukhateiye, tahi pahiru enahaala wookhaviheryaani ovootha makacamiho mookumini,  nyenya tho enahaala wookhaviheryaani ohuserya ichu seiyo munahaalaanyu opharihela wi mwaalipihe akina mmuloko muvyaani.

2. Muhilikanyiheke. (Ekl. 7:10) Jules aahithaamela o Benin, o Afrika ni Ostatu Unitu nave aahoona wi sookhovelela saari soohiyana vancipale. Owo ooloca: “Miyaano kaahikhalano muupuwelo wa ochuna oloca yaweereya aka ya okumi wa achu oothene kaaphwanyaaka”. Wanthowa na ohiyana yoola owo aahipacerya wiivalaanya ni anna a mmulokoni. Nyenya amanle waasuwela phaama anna, owo aahitoroka mukhalelo awe. Owo ooloca: “Miyaano kinneemererya wi moohipwacha weiwo nnakhalaahuwo oothene naamoharu. Pahiru nnaloca mmukhalelo woohiyana. Echu yoochuneya ori oweemererya achu hiiha ntoko awo aryaaya.” Ti nthowa nene oryaaya woochuneya ohilikanyihaka muloko muvyaani ni muloko woopacerya. Piyoneera awiichaniwa Anne-Lise ooloca: “Miyaano nkaathaamme mmulokoni wi kiphwanye ichu seiyo kaahin’yaaka muculi, nyenya kaathaamme wi koone ichu ivyaani.”

Atokweene tho hanaphwanela olikanyihaka muloko muvyaani ni muloko wakhalai. Pahiru nthowa nawi anna a muloko muvyaani annapaka ichu mmukhalelo woohiyana, nyenya eyo henataphulela wi awo anamuhesa. Enamukhala ya miruku osuwela phaama mikhalelo sa vanipuroni muhaakumve ovaha moonelo. (Ekl. 3:1, 7b) Ti waphaamaxa waahusiha anna orweela wa yootakiherya ohiya waakhinyererya wuupuwelaka hiiha ntoko hiyaano nnuupuwelaahu.—2 Ako. 1:24.

3. Mukhaleke ooweiwa. (Afi. 1:27) Othaama onnamaliha elukuluku yincipale ni ikuru, nyenya ti woochuneya ophwanyeyaka mmithukumano—mmuloko muvyaani—wakhala wooweryeya. Mwawiihiiha, wakhala wi anna a muloko muvyaani hananoona mu Empa ya Omwene, ti mwawiihai awo enahaalaaya onikhaviherya? Murokora awiichaniwa Lucinda, yoowo onakhala Wafrika tu Suli aahithaamela epooma etokweene vamoha ni anamwane awe eeli aasithiyana. Owo ooloca: “Asinthamwene aka yaahikikhaviherya otikitheryeya mu waapaka asithamwene mmuloko muvyaani, moorweela wa olapa ni yaawo mmuteko woolaleerya ni ophwanyeyaka mmithukumano. Hiyaano tho nnamweeriha vaate vahu othukumanakavo anna ntakhara muteko woolaleerya.”

Echu enahaala wookhaviheryaani okhala oolipa ni akina, ori wiilipixerya ‘olapa vamoha’ ni anna ni arokora mmiteko sa muloko muvyaani.” Atokweene a muloko wa Anne-Lise, olociwe woopaceryani, yaanamuceenyerya okhuma mmuteko woolaleerya vamoha ni anna ni arokora a mmulokoni. Tiivi yaari yookhumelela? Owo ooloca: “Mu elukuluku vakhaani, kaahoona wi weerano yeela waari mukhalelo waphaama wa woona wi kinnapaka makupa a muloko muvyaani”. Ohiya yeeyoru tho, wakhala wi nyuwaano munnapaka makupa a limpeesa ni oreherwerya Empa ya Omwene, munahaala wooniherya wi muloko muvyaani vano muloko anyu. Vaavaa nyuwaano muniivoliiheryaanyu mmiteko seiha, mwawaakuveya anna a mmulokoni anahaala okhalaka ootaphuwa ni nyuwaano. Nave nyuwaano munahaala wiisoona okhala mmakupa a emusi yeela evyaani.

4. Mwaapake asinthamwene avyaani. (2 Ako. 6:11-13) Mukhalelo mmoha wa owaavya asinthamwene  ori wooniherya nchuno wa achu, mwawiihiiha mwaavyeke elukuluku ihaakumve ni imanle mithukumano wi nwaacamele akina ni waasuwela yaawo. Mwiilipixerye wi musuwele masina aya. Wuupuwela masina a anna, okhala muchu aphaama ni awaacameleya, enamweeriha wi akina ekhaleke ootaphuwa nave onamukhala wookhweya waapaka asinthamwene aphaama.

Ohiya wuukhuwa wakhanle wi munahaala weemereryiwa, mweerihe wi anninyu avyaani yoosuweleeni wi mwa muchu a mukhalelo taani. Mweereno hiiha ntoko murokora Lucinda olonceiye: “Hiyaano nookhalano onthamwene waphaama ni anna nthowa nawi nnapaceriha waawopa wi erwe owaani.”

“MWAAKHELANEKE MUKINA NI MUKHWAAWE”

Achu akina ananwerya okhala awoova ovolowa mu Empa ya Omwene erimo achu ancipale ehaasuwenlaaya. Vano ti mwawiihai muneeraanyu mwaakhaviherye avyaani enaphiya mmulokoni wiikhoveleliha? Murummwa Paulo olonce wi nnaphwanela ‘waakhelanaka mukina ni mukhwaawe, hiihaa ntoko Kristu tho onaakhenleiye.’ (Aro. 15:7) Atokweene ananwerya waakhaviherya avyaani wiisoona okhala awaakheliwa, mmukhalelo yoola, awo anamutakiherya Yesu. (Moone ekaaxa “ Muni Mweerihe Hai Othaamela Wanyu Mmuloko Muvyaani Okhala Wookhweya?”) Anna oothene a mmulokoni ophitaanyerya anamwane, ananwerya waakhaviherya avyaani wiisoona ntoko wi ari owaani.

Owaakhela akina onaphitaanyerya wooniherya owaakhela aleco, nave tho ovahererya nikhavihero mmikhalelo sawooneya. Ntoko yootakiherya, murokora mmoha aahimukhaviherya murokora mukina yoowo aari muleco mmulokoni, moorweela wa omooniha epooma ni mukhalelo wa ompharihela xaapa. Murokora yoole aari muleco mmulokoni aahikhala ootikhiniheya wa yeeyo murokora ole enreeiye, nave eyo yaahimukhaviherya wiikhoveleliha mmuloko yoole muvyaani.

MUKHALELO MMOHA WA WINNUWA

Wi musope oweryeke ohula makuphelo aya ni owerya ovava, ti woochuneya ikhwaha sincipale otorokaka nrapala naya. Mmukhalelo mmoha moha, wakhala  wi nyuwaano moothaamela muloko mukina munaphwanela ohiya woova vyakala yoowo onaweerihaani wooceela ohula makuphelo anyu wi mvave, mmuteko wa Yehova. Nicolas ni Céline yaawo aromoliwe wuupaceryani anlonce wi: “Othaamela muloko muvyaani ovyakiha waphaama. Wi niwerye wiikhoveleliha mmuloko muvyaani ni anna oohiyanahiyana hiyaano nnaphwanela winnuwiha mikhalelo mivyaani.” Jean-Charles yoowo olociwe wuupacerani ooloca mukhalelo yene ni emusi awe ephunraaya: “Mmuloko ahu muvyaani aniihu yaahikhala awiichelavo omunepani nave yaahinnuwiha onthamwene woolipaxa ni Yehova. Ivinrevo miyeeri vakhaani mwanihu amwaamuthiyana aahipacerya opakaka makupa mmithukumano sa veeri va esumaana nave mwanihu amwaamulopwana aahikhala mulaleeryi oohipatisiwa.”

Tiheeni munapwanelaanyu weera wakhala wi munnachuna othaamela weiwo oriwo othowa otokweene nave mikhalelo sanyu sihinaweemereryaani? Mmukhalelo yoola, mpharihele mikhalelo sa mwaha yoola mmuloko yoowo muryaanyuwo. Weerano hiiha, munanwerya wiisoona ntoko munathaamela muloko muvyaani. Mwawihiiha, mmuroromele Yehova mukhale oweiwaxa mmiteko sa muloko, moorweela wa oya mmuteko woolaleerya ni anna ancipale. Nyuwaano munanwerya waakhaviherya avyaani naari yaale athoiwe, moorwela wa ovaherera nikhavihero vyakala nawooneya. Weerano yeela enahaala wookhaviheryaani okhala oolipaxa omunepani, woona wi osivela mukhalelo mmoha yoowo onansuwanyeiha ntoko Akristu eeparipari. (Yoh. 13:35) Muroromele wi “Muluku onasiveliwa ni mikucho ntoko seiho.”—Ahe. 13:16.

Moohipwacha makacamiho, anna aawerya wiikhoveleliha phaameene mmuloko muvyaani—nave tho nyuwo munanwera! Anne-Lise ooloca: “Othaamela muloko mukina wookikhaviherya waapaka asinthamwene avyaani.” Kazumi vano ari oolekecheya wi othaamela muloko mukina “woomukhaviherya woona nikhaviheryo na Yehova mmukhalelo owo ahintonkeiye waanyiherya opacerya khalai.” Hanka vooloca sa Jules? Owo ooloca: “Onthamwene yoowo kapankaaka wookikhaviherya wiisoona ntoko kiri owaani. Vano kinniisoona opaka makupa mmuloko muvyaani nave onaahaala okhala woovila othaama mmuloko yoola.”