Jesus okwa hupitha aantu aadhiginini, sho a gandja omwenyo gwe gu ninge iikulila. (Mateus 20:28) Kungawo, Ombiimbeli otayi popi Jesus e li “Omukulili guuyuni.” (1 Johannes 4:14) Otayi ti wo kutya: “Omuye awike tamu tu zileehupitho; oshoka muuyuni auhe kamu na nando ogumwe gwedhina Kalunga e li hololela aantu, tatu vulu okuhupithilwa muye.” — Iilonga 4:12.

Jesus okwa “sile aantu ayehe” mboka haya ulike eitaalo muye. (Aahebeli 2:9; Johannes 3:16) Konima yaashono, “Kalunga okwe mu yumudha kuusi,” na Jesus okwa shuna megulu e li oshishitwa shopambepo. (Iilonga 3:15) Ngashingeyi ota vulu “okuhupitha mboka taye ya kuKalunga taa pitile muye. Oshoka oku na omwenyo aluhe note ya galikanene koshipala shaKalunga.” — Aahebeli 7:25.

Omolwashike twa pumbwa Jesus e tu galikanene?

Omolwaashoka atuhe aalunde. (Aaroma 3:23) Uulunde owa tula einda pokati ketu naKalunga, nohawu tu etele eso. (Aaroma 6:23) Ihe Jesus oha yakula e li “omupopili” gwaamboka ye na eitaalo mekuliloyambo lye. (1 Johannes 2:1) Oha galikana pehala lyawo, ta pula Kalunga a uve omagalikano gawo noku dhime po oondjo dhawo pakankameno lyeso lyeyambo lye. (Mateus 1:21; Aaroma 8:34) Kalunga oha yamukula omagalikano ngoka haga galikanwa kuJesus, molwaashoka oge li metsokumwe nehalo lye. Kalunga okwa tumu Jesus kombanda yevi, opo “uuyuni u hupithwe kuye.” — Johannes 3:17.

Mbela okwiitaala muJesus okwo owala kwa pumbiwa opo tu ka hupithwe?

Aawe. Nonando otu na okwiitaala muJesus opo tu hupithwe, otwa pumbwa okuninga oshindji. (Iilonga 16:30, 31) Ombiimbeli otayi ti: “Ngaashi naanaa omuntu ngele ke na omufudho, ta talwa a sa, osho wo neitaalo lyaa na iilonga, olya sa.” (Jakob 2:26) Opo tu ka hupithwe, otu na:

• Okwiilonga kombinga yaJesus naHe, Jehova. — Johannes 17:3.

• Okukala tu na eitaalo muyo. — Johannes 12:44; 14:1.

• Okuulika eitaalo lyetu mokuvulika kiipango yawo. (Lukas 6:46; 1 Johannes 2:17) Jesus okwa longa aantu kutya hakehe ngoka te mu ithana “Omuwa” ta ka hupithwa, ihe oyo mboka owala taya ‘gwanitha ehalo lyaHe gwomegulu.’ — Mateus 7:21.

• Tsikila okuulika eitaalo nonando owu li muudhigu. Jesus okwe shi popi sha yela sho a ti: “Ngoka ti idhidhimike sigo ehulilo, ota hupithwa.” — Mateus 24:13.