PaJohannes 14:1-31
14 “Inamu kala mu na oomwenyo dha ziyalala. Ulikeni kutya omu na eitaalo muKalunga; ulikeni kutya omu na wo eitaalo mungame.
2 Megumbo lyaTate omu na omahala ogendji* gokukala. Andola hasho, ando shoka inandi shi mu lombwela. Ihe ngashingeyi otandi yi, ndi ke mu longekidhile ehala.
3 Shimwe ishewe, ngele onda yi, ndi ke mu longekidhile ehala, otandi ka galuka, ndi mu ile, ndi mu fale kegumbo, opo nane mu ka kale hoka ndi li.
4 Ondjila yaahoka tandi yi, omu yi shi.”
5 Tomas okwa ti kuye: “Omuwa, ondjila ndjoka otatu yi tseya ngiini, ngele katu shi hoka to yi?”
6 Jesus okwa ti kuye: “Ongame ondjila, noshili nomwenyo. Kapu na ngoka te ya kuTate, okuninga ta pitile mungame.
7 Andola ne omwa li mu shi ndje, ando naTate omu mu shi wo. Okuza ngashingeyi omu mu shi, nomwe mu mona.”
8 Filippus okwa ti kuye: “Omuwa, tu ulukila Ho, notashi kala she tu gwanena.”
9 Jesus okwa ti kuye: “Filippus, onda kala nane ethimbo ele, ihe sigo ongashingeyi ku shi ndje? Kehe ngoka a mona ndje okwa mona wo Tate. Ihe omolwashike to ti, ‘Ulukila ndje Ho’?
10 Mbela ino itaala kutya ngame onda hangana naTate nosho wo kutya Tate okwa hangana nangame? Oohapu, ndhoka tandi mu lombwele, kadhi shi dhandje mwene, ihe Tate, ngoka a hangana nangame, oye ta longo iilonga ye.
11 Itaaleni ndje, sho tandi mu lombwele kutya onda hangana naTate nosho wo kutya Tate okwa hangana nangame. Ngele hasho, itaaleni omolwiilonga mbyoka tandi longo.
12 Oshili tandi mu lombwele, kehe ngoka ta ulike kutya oku na eitaalo mungame, ota ka longa wo iilonga mbyoka handi longo; nota ka longa iilonga iinene yi vule mbika, oshoka otandi yi kuTate.
13 Shimwe ishewe, kehe shoka tamu indile medhina lyandje, otandi shi ningi, Opo Omwana a simanekithe He.
14 Ngele omwa indile sha medhina lyandje, otandi shi ningi.
15 “Ngele omu hole ndje, otamu vulika kiipango yandje.
16 Otandi ka indila Tate, note ke mu pa omukwathi* gulwe, e mu kwathele sigo aluhe,
17 ano ombepo ondjapuki, ndjoka tayi holola oshili, ndjoka uuyuni itaawu yi pewa, molwaashoka inawu yi mona, nokawu yi shi. Ne omu yi shi, molwaashoka oyi li mune, notayi kala pamwe nane.
18 Itandi mu thigi po one amuke.* Otandi galukile kune.
19 Masiku uuyuni itawu ka mona ndje we, ihe ne otamu ka mona ndje, molwaashoka ondi na omwenyo, nane wo otamu ka kala nomwenyo.
20 Mesiku ndyoka, otamu ka tseya kutya ngame onda hangana naTate nosho wo kutya nane omwa hangana nangame, nangame onda hangana nane.
21 Kehe ngoka ta taamba ko iipango yandje nokuvulika kuyo oku hole ndje. Nakehe ngoka e hole ndje ota kala e holike kuTate, notandi kala ndi mu hole, notandi ke mu ihololela.”
22 Judas, haangoka yaIskariot, okwe mu pula ta ti: “Omuwa, oshike sha ningwa po, opo wu kale wa hala oku tu ihololela, ihe hauyuni?”
23 Jesus okwe mu yamukula ta ti: “Kehe ngoka e hole ndje ota vulika koohapu dhandje, na Tate ota kala e mu hole, notatu ke ya kuye e tatu kala puye.
24 Kehe ngoka kee hole ndje iha vulika koohapu dhandje. Oohapu, ndhoka mwa uvu te popi, kadhi shi dhandje, ihe odhaTate, ngoka a tuma ndje.
25 “Iinima mbika otandi yi mu lombwele, manga ndi li nane.
26 Ihe omukwathi, ano ombepo ondjapuki, ndjoka Tate te ke yi tuma medhina lyandje, yi mu kwathele, otayi ke mu longa iinima ayihe, notayi ke mu dhimbulukitha iinima ayihe, mbyoka nde mu lombwela.
27 Otandi mu thigile ombili; otandi mu pe ombili yandje. Itandi yi mu pe, ngaashi uuyuni hawu yi gandja. Inamu kala mu na oomwenyo dha ziyalala, ne inamu etha dhi mbandapale.
28 Omwa uvu sho nde mu lombwelele nda ti: ‘Otandi yi, notandi mu galukile.’ Ngele omu hole ndje, otamu kala mwa nyanyukwa, sho tandi yi kuTate, oshoka Tate oku vule ndje.
29 Onkee ano otandi shi mu lombwele ngashingeyi, manga inaashi ningwa, opo mu itaale, ngele sha ningwa.
30 Itandi popi we nane odhindji, oshoka omupangeli gwuuyuni mbuka okwe ya, noke na oonkondo dhokupangela ndje.*
31 Ihe opo uuyuni wu tseye kutya ondi hole Tate, otandi ningi naanaa ngaashi Tate a lombwela ndje. Thikameni, tu zeni po mpaka.
Omanyolo gopevi
^ Nenge “omalukalwa ogendji.”
^ Nenge “omuhekeleki.”
^ Nenge “onga oothigwa.”
^ Nenge “ke na mo sha mungame.”
