PaMateus 20:1-34
20 “Uukwaniilwa womegulu otawu faathanithwa namwene gwegumbo, ngoka a meneka ongula onene, a ka konge aaniilonga, ya ka longe moshikunino* she shomandjembele.
2 Konima sho a uvathana nayo e ya fute ondenari yimwe mesiku, okwe ya tumu ya ka longe moshikunino she shomandjembele.
3 Sho a piti mo lwopotundi ontitatu,* okwa mono yalwe ya thikama pomalandithilo kaaye na iilonga,
4 nokwa ti kuyo: ‘Nane wo indeni moshikunino shomandjembele, notandi ke mu futa sha eleka.’
5 Opo nduno oya yi mo. Natango okwa piti mo lwopotundi ontihamano,* nokwa ningi sha faathana lwopotundi ontimugoyi.*
6 Hugunina, lwopotundi ontimulongo nayimwe,* okwa piti mo ishewe e ta adha yalwe ya thikama, nokwe ya pula ta ti: ‘Omolwashike mwa thikama owala mpaka esiku alihe kaamu na iilonga?’
7 Oya ti kuye: ‘Oshoka kapu na ngoka e tu kuta.’ Oye okwa ti kuyo: ‘Nane wo indeni mu ka longe moshikunino shandje shomandjembele.’
8 “Sho kwa toko, mwene gwoshikunino shomandjembele okwa lombwele omutonateli gwiilonga a ti: ‘Ithana aaniilonga e to ya futu oondjambi dhawo, to tamekele kumboka ya tameke okulonga hugunina e to hugunine naamboka ya tameke okulonga tango.’
9 Sho mboka ya longo okuza potundi 11 ye ya, kehe gumwe gwomuyo okwa futwa ondenari yimwe.
10 Onkee ano sho mboka ya kutwa tango ye ya, oya li taya dhiladhila kutya otaya futwa oshindji, ihe nayo oya futwa owala ondenari yimwe.
11 Sho ya pewa oondjambi dhawo, oya tameke okungungutulila mwene gwegumbo,
12 taya ti: ‘Aalumentu mbaka ya tameke okulonga hugunina oya longo owala uule wowili yimwe, ihe owe ya futu shi thike pamwe natse, nonando tse otwa longo esiku alihe moshanga shomutenya!’
13 Ihe okwa yamukula gumwe gwomuyo, a ti: ‘Kuume kandje, inandi ku lila. Inatu uvathana nani ndi ku fute ondenari yimwe?
14 Taamba ondjambi yoye e to yi. Onda hala okupa mbaka yahugunina ondjambi yi thike puyoye.
15 Mbela kandi na uuthemba nani wokuninga shoka nda hala niinima yandje mwene? Nenge owa tsila ndje ondumbo, molwaashoka nde ya longela uuwanawa?’*
16 Ano mboka yahugunina otaya ka kala aatango, naamboka aatango, otaya ka kala yahugunina.”
17 Manga ya li mondjila ya uka kuJerusalem, Jesus okwa ithana po aalongwa ye 12, nokwe ya lombwele ta ti:
18 “Otatu yeni kuJerusalem, nOmuna gwomuntu ota ka gandjwa miikaha yaayambi naalongimpango. Oyo otaye ke mu tokolela eso,
19 nota ka gandjwa miikaha yaantu yomiigwana, opo ye mu sheke, noku mu dhenga nonyanya, noye mu alele komuti, nomesiku etitatu ota ka yumudhwa.”
20 Opo nduno yina yoyanamati yaSebedeus okwe ya kuye pamwe nayo, nokwe mu tsile oongolo, a hala oku mu indila sha.
21 Jesus okwa ti kuye: “Owa hala shike?” Okwa ti: “Pitika aamwandjemati mbaka yaali ya ka kuutumbe pamwe nangoye mUukwaniilwa woye, gumwe okolulyo lwoye, namukwawo okolumoho lwoye.”
22 Jesus okwe mu yamukula ta ti: “Kandi wete mu shi shoka tamu pula. Otamu vulu ngaa okunwa moshitenga shoka ndi li pokunwa?” Oya ti kuye: “Eeno, otatu vulu.”
23 Okwa ti kuyo: “Otamu ka nwa shili moshitenga shandje, ihe okukuutumba kolulyo lwandje, nenge kolumoho lwandje, hangame tandi shi utha, ihe Tate oye te shi utha.”*
24 Sho aalongwa yalwe omulongo ye shi uvu, oya li ya geela noonkondo aamwayinamati mboka yaali.
25 Ihe Jesus okwa ithana aalongwa ye kuye e ta ti kuyo: “Omu shi shi kutya aapangeli yiigwana ohaya kala yi itala ko ya simana ye vule aalelwa yawo, naanenentu ohaye ya pangele ngaashi ya hala.
26 Ne hasho mu na okukala ngaaka. Ihe kehe ngoka a hala oye a kale omunene mokati keni, na kale omuyakuli gweni,
27 nakehe ngoka a hala okukala omutango mokati keni, na kale omupiya gweni.
28 Oshoka nOmuna gwomuntu ine ya okuyakulwa, ihe okuyakula nokugandja omwenyo gwe gu li iikulila omolwoyendji.”
29 Sho ya li taya yi kuJeriko, ongundu onene yaantu oye mu landula.
30 Opo nduno sho aalumentu yaali aaposi, mboka ya li ya kuutumba pooha dhondjila, ya uvu kutya Jesus oye ta ende po, oya igidha mokule taya ti: “Omuwa, Omuna gwaDavid, tu sila ohenda!”
31 Ihe ongundu yaantu oye ya ganda, ya kale ya mwena; ihe oya tsikile okwiigidha mokule taya ti: “Omuwa, Omuna gwaDavid, tu sila ohenda!”
32 Onkee ano Jesus okwa thikama, te ya ithana e te ya pula ta ti: “Omwa hala ndi mu ningile shike?”
33 Oya ti kuye: “Omuwa, tsikulula omeho getu.”
34 Molwaashoka Jesus okwa li e ya etela ohenda, okwa gumu omeho gawo e taga tsikuluka nziya, noya tameke oku mu landula.
Omanyolo gopevi
^ nenge “oshitsambe.”
^ Sha hala okutya, lwopomugoyi gwongula.
^ Sha hala okutya, lwopomulongo nambali gwomutenya.
^ Sha hala okutya, lwopondatu yomutenya.
^ Sha hala okutya, lwopontano yokomatango.
^ Nenge “sho handi gandja.”
^ Nenge “oye te ya hogolola.”
