PaMateus 24:1-51
-
ENDHINDHILIKO LYOKUKALA PO KWAKRISTUS (1-51)
24 Sho Jesus a li ta zi motempeli, aalongwa ye oye ya kuye e ta ye mu ulukile omatungo gotempeli.
2 Okwa ti kuyo: “Iinima ayihe mbika omu yi wete? Oshili tandi mu lombwele, kapu na nando emanya tali ka thigwa po mpaka lya londa kekwawo, inaali kumunwa po.”
3 Manga Jesus a li a kuutumba kOndundu yOoholivi, aalongwa oye ya kuye oyo ayeke, taya ti: “Tu lombwela kutya iinima mbika otayi ka ningwa uunake, nendhindhiliko lyokukala po* kwoye otali ka kala lini nolyomasiku gahugunina guuyuni mbuka?”*
4 Jesus okwe ya yamukula a ti: “Kotokeni, mwaa pukithwe nando okomuntu,
5 oshoka oyendji otaye ke ya medhina lyandje, taya ti, ‘Ongame Kristus,’ notaya ka pukitha oyendji.
6 Otamu ka uva iita nosho wo oonkundana kombinga yiita. Ihe inamu kwatwa kuumbanda, oshoka iinima mbika oyi na okuningwa, ihe ehulilo inali ya natango.
7 “Oshoka iigwana otayi ka kondjithathana, nomaukwaniilwa otaga ka ponokelathana, notaku ka kala oondjala nomakakamo gevi koombinga noombinga.
8 Iinima ayihe mbika oyi li ongetameko lyoshitheta, sho okanona ke li pokuvalwa.
9 “Opo nduno aantu otaye ke mu gandja mu hepekwe, noku mu dhipaga, notamu ka kala mu tondike kiigwana ayihe omolwedhina lyandje.
10 Opo ihe oyendji otaya ka pundukithwa, otaya ka kengelelathana, notaya ka kala ye tondathane.
11 Otaku ka holoka aahunganeki aafundja oyendji, notaya ka pukitha oyendji;
12 molwaashoka uukolokoshi otawu ka indjipala, ohole yoyendji otayi ka talala.
13 Ihe ngoka ta idhidhimike sigo ehulilo ota ka hupithwa.
14 Shimwe ishewe, onkundana ndjika ombwanawa yUukwaniilwa otayi ka uvithilwa uuyuni awuhe, opo aantu yomiigwana ayihe ye yi uve,* opo ihe ehulilo tali ya.
15 “Onkee ano uuna mwa mono oshinima oshitondithi sha thikama mehala eyapuki, shoka tashi etitha ehanagulo, ngaashi sha popiwa komuhunganeki Daniel (omuleshi na longithe oondunge dhe dhokuyoolola),
16 mboka ye li muJudea naya ye ontuku koondundu.
17 Ngoka ta adhika kontala yegumbo ina za ko a ye megumbo a ka pitule mo iinima ye,
18 naangoka ta adhika mepya ina shuna megumbo a ka tale onguwo ye yokombanda.
19 Yayee, aamwali nosho wo aakiintu mboka taya adhika ye li momategelelo pethimbo ndyoka!
20 Kaleni tamu galikana, opo esiku ndyoka kaali ye pethimbo lyokufu,* nenge mesiku lyEsabati;
21 oshoka otaku ke ya uudhigu uunene, inaawu kala ko nando onale, okuza keshito lyuuyuni sigo ongashingeyi, noitawu ka kala ko we.
22 Odhoshili kutya ngele omasiku ngoka itaga fupipikwa, ando kapu na ngoka ta ka hupa, ihe omolwaahogololwa, omasiku ngoka otaga ka fupipikwa.
23 “Ihe ngele gumwe ote mu lombwele ta ti: ‘Tala, Kristus oye nguka,’ nenge ‘Oye ngwiyaka,’ inamu mu itaala.
24 Oshoka otaku ke ya ooKristus naahunganeki aafundja, notaya ka longa iikumithalonga iinene, opo ya pukithe aantu, nongele otashi vulika naahogololwa wo.
25 Taleni, ngame onde mu londodha komeho yethimbo.
26 Onkee ano ngele aantu otaye mu lombwele taya ti: ‘Tala, oku li mombuga,’ inamu ya ko; nenge taya ti, ‘Tala, oku li mondunda,’ inamu shi itaala.
27 Oshoka ngaashi owala olwaadhi talu adhima okuza kuuzilo sigo okuuninginino, osho wo tashi ka kala pokukala po* kwOmuna gwomuntu.
28 Kehe mpoka pu na omutuntu* opo wo hapu kala pwa gongala omakodhi*.
29 “Nziya konima yuudhigu womasiku ngoka, etango otali ka luudhikwa, omwedhi itagu ka minikila we, oonyothi otadhi ka gwa ko kegulu, niikwagulu otayi ka kakama.
30 Opo nduno endhindhiliko lyOmuna gwomuntu otali ka holoka kegulu, niigwana ayihe kombanda yevi otayi ka lilagana, notayi ka mona Omuna gwomuntu te ya miikogo yokegulu, e na oonkondo neadhimo enene.
31 Ota ka tuma aayengeli ye taya hiki omankuma mokule notaya ka gongela aahogololwa ye koombinga ne dhevi, okuza komunkulo gumwe gwegulu sigo okomunkulo omukwawo.
32 “Ilongeni kethaneko ndika lyomukwiyu: Ngele iitayi yagwo tayi hapuka, nomafo gagwo taga mbunyuka, ohamu kala mu shi kutya othinge oyi li popepi.
33 Sha faathana, nane wo uuna mu wete iinima mbika, tseyeni kutya Omuna gwomuntu oku li popepi, posheelo.
34 Oshili tandi mu lombwele, epipi ndika itali hulu po nando, sigo oosho iinima ayihe mbika ya ningwa.
35 Egulu nevi otayi hulu po, ihe oohapu dhandje kadhi na siku dhi hule po.
36 “Shi na ko nasha nesiku ndyoka notundi, kapu na ngoka e yi shi, kutya nduno aayengeli yomegulu, nenge Omwana, ihe oTate awike.
37 Ngaashi owala sha li pethimbo lyaNoa, osho wo tashi ka kala pokukala po* kwOmuna gwomuntu.
38 Oshoka ngaashi owala aantu ya li pomasiku ngeyaka ga tetekele eyelu, ya li taya li notaya nu, aalumentu taya hokana naakiintu taya hokanwa, sigo esiku ndyoka Noa a yi monguluwato,
39 noinaye shi ndhindhilika, sigo eyelu lye ya e tali ya hanagula po ayehe, osho wo tashi ka kala pokukala po kwOmuna gwomuntu.
40 Pethimbo ndyoka, aalumentu yaali otaya ka adhika ye li mepya, gumwe ota kuthwa po, namukwawo ota thigwa po.
41 Aakiintu yaali otaya ka adhika taya tsu poshini, gumwe ota kuthwa po, nomukwawo ota thigwa po.
42 Onkee ano kaleni mwa tonata, oshoka kamu shi esiku ndyoka Omuwa gweni te ya.
43 “Ihe kaleni mu shi oshinima shika: Andola mwene gwegumbo okwa li e shi kutya omufuthi ote ya pongapi,* ando ota kala a tonata, noita etha egumbo lye li teywe.
44 Onkee ano nane kaleni mwa ilongekidha, oshoka Omuna gwomuntu ote ya potundi, ndjoka inaamu tegelela.
45 “Olye ano omupiya omudhiginini nomunandunge, ngoka omuwa gwe e mu langeke po, a tonatele aapiya ye, noku ya pe iikulya yawo pethimbo lyo opala?
46 Omupiya ngoka ita kala tuu a nyanyukwa, ngele mwene gwe okwe mu adha ta ningi ngawo!
47 Oshili tandi mu lombwele, mwene gwe ote ke mu langeka po, a tonatele iinima ye ayihe.
48 “Ihe ngele omupiya, ngoka omukolokoshi, okwi ipopile momutima ta ti: ‘Mwene gwandje okwa kala ko,’
49 e ta tameke okudhenga aapiya ooyakwawo, ye ta li nokunwa pamwe noonkolwi,
50 nena mwene gwomupiya ngoka ote ya mesiku ndyoka inee mu tegelela, nopotundi ndjoka inee yi tseya;
51 namwene gwe ote ke mu geela negeelo enene e te mu tula mehala limwe naafudhime, moka ta ka lilagana nokwiikokota komayego.
Omanyolo gopevi
^ Tala Omafatululo giitya.
^ Nenge “gonkalelo yiinima yuuyuni mbuka.” Tala Omafatululo giitya.
^ Nenge “Shi ninge uumbangi kuyo, nenge uunzapo.”
^ MuIsraeli pethimbo lyokufu omvula oya li hayi loko nohaku kala olumi, shoka sha li hashi ningitha olweendo lu kale oludhigu.
^ Tala Omafatululo giitya.
^ Oshitya shoka shOshigreka otashi vulu wo okuukithwa komudhimba gwomuntu, nenge koshinamwenyo sha sa.
^ Nenge tashi vulika, “oontsa.”
^ Tala Omafatululo giitya.
^ Nenge “opotundi yini yuusiku.”
