Muvhunjo Jo Vaverengi
Ndiyani “mwanakaji” anobhuiwa pa Isaia 60:1, ‘wakamukisa kudini’ no ‘kusiya ruvheneko hwake hwecivheneka’?
Isaia 60:1 inoti: “Mukai iwewe mwanakaji, siyai ruvheneko hwako huvheneke ngokuti ruvheneko hwako hwaguma. Rukujo hwa Jehovha huri kukuvhenekera.” Apa pari kuvonesa kuti “mwanakaji” ndi Ziyoni kana kuti Jerusarema, dhorobha ro Judha mu nguva yokare. a (Isaia 60:14; 62:1, 2) Dhorobha, rinoimirira majinja ese. Magama a Isaya anomusa shwiro mbiri. Yokutanga, ndirini Jerusarema ‘rakamuka’ no kuvheneka ngo ruvheneko hwaro wo kumujimu? Yocipiri, magama a Isaya kureva kuti ari kukwanirisika maningi mu njiku jedu jino?
Ndirini Jerusarema ‘rakamuka’ no kuvheneka ngo ruvheneko hwaro wo kumujimu? Vajudha povainga ku uranda ku Bhabhironi, ko makore anokwana kuita 70, Jerusarema no themberi zvainga zviri mathere. Bhabhironi porakahwiswa ngo Vamedho no Persiya, Vaiziraeri vese vainga mu Bhabhironi vakava vakasujunuka kuti vahwirire ku nyika yovakabarihwa kuti vamusijire kunamata ko cokwadi. (Esdra 1:1-4) Kutangira mu gore ra 537 Kristu Acito Aviya, vese vainga vakagondeka vaivha ku majinja anokwana kuita 12, vakaita zvimwezvo. (Isaia 60:4) Ivona vakatanga kuita mupiro jo kupira kuna Jehovha, kuita mabuso no kuvakisa themberi. (Esdra 3:1-4, 7-11; 6:16-22) Nga papsa, goja ra Jehovha rakatanga kumonikira ku Jerusarema, zvinoreva kumusijihwa ko vandhu va Mwari. Ivona vakava cinyuke co ruvheneko co majinja aingaya mu cidima ku divi ro umwari.
Ngo kudaro, zviporofita zva Isaya zvinobhuya ngo pamusoro po kumusijihwa, zvakakwanirisika ku Jerusarema ro kare. Vaiziraeri vazinji, avazivi kwenderera mberi vecizwira Mwari. (Neemia 13:27; Marakiya 1:6-8; 2:13, 14; Mateu 15:7-9) Pa kufamba ko nguva, ivona vakazoramba Jesu uwo wainga Mesiya. (Mateu 27:1, 2) Mu gore ra 70 Kristu Aviya, Jerusarema no themberi zvakaparajwazve wocipiri.
Jehovha wainga akananga kuti izvi zvaizoitika. (Dhanyeri 9:24-27) Zvakajeka kuti zviporofita zvinobhuiwa mu bhuku ra Isaya cipauko 60 ngo pamusoro po kumusijihwa, azvicaingepi cidisiso ca Jehovha kuti zvikwanirisike mukuperera ku Jerusarema rokare.
Kureva kuti magama a Isaya ari kukwanirisika maningi mu njiku jedu jino? Hina, mukuzwirana no mwanakaji wo kuezanisira iro riri “Jerusarema ro kumatenga.” Mupostori Pauro wakatara kudari ngo pamusoro paro: “Ndirona mai wedu.” (Vagaratiya 4:26) Jerusarema ro kumatenga i sangano ra Mwari rino zvisikwa zvo kumujimu zvakagondeka. “Vana” varo vanobatanija Jesu no vo 144.000 vari Makristu akazojwa ngo mujimu mucena avo vokuti vano vetero yokuti Pauro anayovo, vetero yokudenga. Makristu okuzojwa anoumba “jinja rakacena”—“Iziraeri ya Mwari.”—1 Pedhru 2:9; Vagaratiya 6:16.
Kuitisa kudini Jerusarema ‘rakamuka’ no kuvheneka ngo ruvheneko hwaro? Iyena wakaita kudaro ecishandisa vana vake vokuzojwa vo pasi pano. Ezanisanyi zvamunoziva no zvakaporofithwa ndi Isaya cipauko 60.
Makristu okuzojwa akadikana ‘kumuka’ ngokuti ainga mu cidima ku divi ro kumujimu ngo ndava yo vapanduki vainga vandhandhanika pakupera kufa ko vapostori. (Mateu 13:37-43) Vakava varanda vo Bhabhironi guru sangano ro nyika yese yo zviyara zvokunyepa. Vokuzojwa vakaenderera mberi vari varanda mbhera pa mukuvo wo “kupera ko nyika” wakatanga mu gore ra 1914. (Mateu 13:39, 40) No papera mukuvo mushomani mu gore ra 1919, ivona vakasujunuhwa, ruvheneko hwavo wo kumujimu wotanga kuvheneka mu basa ro kucumaera. b No papera makore akati kuti, vandhu vese vo majinja, vakazoviya mu ruvheneko uwu, kubatanijavo no “majimambo” o Iziraeri ainga akasara a Mwari anonangwa pa bhuku ra Isaia 60:3.—Apokaripsi 5:9, 10.
Kumbejiyo, Makristu okuzojwa anozogara mu ruvheneko uwu wa Mwari mu njira yakakurisisa. Kuitisa kudini? Pavanozopera kufa pasi pano, ivona vanozoita divi ro “Jerusarema Ibza” kana kuti murovohwi wa Kristu wo 144.000 avo vanozova majimambo no vapiri.—Apokaripsi 14:1; 21:1, 2, 24; 22:3-5.
Jerusarema ibza rinozova rinosisira maningi pa kukwanirisika ko ciporofita ca Isaya cinowanika pana Isaia 60:1. (Ezanisanyi Isaia 60:1, 1, 3, 5, 11, 19, 20 na Apokaripsi 21:2, 9-11, 22-26) Kudari inga Jerusarema rokare ro pasi pano, ndimona mainga makaumbwa utongi hwese wo Vaiziraeri, Jerusarema ibza pamwepo na Jesu Kristu, rinozovavo utongi wo zviro zvipsa. Jerusarema ibza, rinozobzukisa kudini “[kuvha] kudenga kuna Mwari?” Ngo kutema zvivaringo zvinopsasa nyika. Vandhu vanothya Mwari wo majinja ese ‘vanozofamba mu ruvheneko hwaro.’ Ivona vanozosujunuhwa kuvha ku cishaishi no rufu. (Apokaripsi 21:3, 4, 24) Muviyo unozova wo “kumusijira zviro zvese,” inga zvainga zvakanangwa ngo vaporofeti vese kubatanijavo na Isaya. (Mabasa o Vapostori 3:21) Kumusijihwa kukuru uku kwakatangari Jesu paakava Mambo, kunozopera kumbhiri ko ciuru co kutonga kwake.
a Pana Isaia 60:1 mu Sandujo yo Nyika Imbza, inoshandisa gama rokuti “mwanakaji” kusiyapo “Ziyoni” kana kuti “Jerusarema,” ngokuti magama o Cihebheru okuti “mukai” no okuti “ruvheneko hwako huvheneke,” anorevera maningi mwanakaji inga zviri kubhuiwa pa vhesipo kuti “iwewe.” Gama rokuti “mwanakaji,” rinobesera muverengi anovereketa ndumi yo Cingezi kuti azwisise kuti mwanakaji ari kunangwari apa ngo wo kuezanisira.
b Kumusijihwa ko kumujimu kwakaitikari mu gore ra 1919, kwakatahwavo mu bhuku ra Ezekieli 37:1-14 na Apokaripsi 11:7-12. Ezekiyeri wakabhuya ngo pamusoro po kumusijihwa ko Makristu ese okuzojwa pa kupera mukuvo wakareba novari kuuranda. Ciporofita ciri pa bhuku ra Apokaripsi cinoreva kumusijihwa ko kumujimu ko cikwata cidoko co hama jakazojwa, jakatungamirira pakutonga, pakupera mukuvo mushomani vacizivi kushandira Jehovha novakasujunuka ngokuti vainga vakadihwa mu kadheya novacina ndava. Mu gore ra 1919, ivona vakagajwa inga “muranda wakagondeka no wakangwara.”—Mateu 24:45; Vonanyi bhuku rinoti: “Jehovha Anodzorera Kunamata Kwakachena!” pheji 118.
