Mabasa o Vapostori 3:1-26
3 Pedhru na Johani vainga vecienda ku themberi pa nguva yo kuita mukumbiro, nguva ndhatu jo madeko.*
2 Mwanarume umweni wakabahwa akaremara wainga akathwahwa. Njiku jese waidihwa phedo no musuvo wo themberi waidanijwa kuti musuvo Wakaseja, kuti akumbire zimora ku vandhu vainghwina mu themberi.
3 Paakavona Pedhru na Johani vecida kunghwina mu themberi, iyena wakavakumbira zimora.
4 Asi Pedhru na Johani vakamusotesesa, perapo Pedhru womuvhunja kuti: “Tisotei.”
5 Iyena wakavasotesesa ecirangarira kuti waizopuwa ciricese ndivona.
6 Asi Pedhru wakati: “Inini andina sirivha no goridhi, asi ndinokupa zvandinazvo. Ngo zina ra Jesu Kristu wo Nazareta, fambai!”
7 Ngo kudaro, iyena wakamubata ngo mukono muho womumusa. Ngo kukasika, murenje jake no shoro* jo soka jake jakavanga;
8 iyena wakaphuka woima, wotanga kufamba ecinghwina navo mu themberi, ecifamba, eciphuka no kukuja Mwari.
9 Vandhu vese vakamuvona ecifamba pomwe no kukuja Mwari.
10 Ivona vakazviziva kuti mwanarume uwu ndiyena waigaraya eciimira kupuwa ciri cese pa musuvo waidanijwa kuti Musuvo Wakaseja wo themberi. Ivona vakakahamara maningi ngo kuvona zvainga zvaitika kwaari.
11 Mwanarume uwu paainga acakabata Pedhru na Johani, vandhu vese vakakahamara maningi, vogogoma pamwepo vecienda kwavari kunodanijwa kuti Berere* ra Soromona.
12 Pedhru paakazvivona, wakavhunja vandhu kuti: “Vandhu vo Muiziraeri, ngenyi muri kukahamara kudaro? Ngenyi muri kutisota inga kuti tamurapa ngo simba redu kamare kana ngo kunamata kwedu Mwari?
13 Mwari wa Abhirahama, Izaki na Jakobe, Mwari wo majicekuru edu, wakakuja Mushandiri wake, Jesu, wamakapa Pirato perapo momunyenya. Asi Pirato wainga ecida kumusujunura.
14 Imwimwi makaramba mundhu wakacena no wakarurama, mokumbira kupuwa mundhu wainga muurayi,
15 mouraya Muimiriri Mukuru wo upenyu. Asi Mwari wakamumusa ko vakafa kwatiri kuitari ucapupu hwazvo.
16 Mwanarume wamuri kuvonari no kumuziva, wavanga ngo zina ra Jesu, pomwe no kutenda kwedu zina rake. Kutenda kwatinomuita, kwaita kuti mundhu uwu avange kamare pamberi penyu mwese.
17 Waro hama, ndinozviziva kuti pamakauraya Jesu, makazviita ngo kutama kuziva, inga zvakaithwavo ngo vatongi venyu.
18 Ngo kuita kudaro, Mwari wakakwanirisa zvaakazivisa zvicito zvaitika ecishandisa vaporofeti vese kuti, Kristu waizotambujika.
19 “Ngo kudaro, khauyanyi mutendeuke kuti zvishaishi zvenyu zvipfujuhwe. Mukaita kudaro Jehovha* anozomutondhoja.
20 Iyena anozotumazve Kristu, Jesu, waakagaja kuti aviye kwamuri.
21 Iyena anodikana kugara kudenga mbhera ukwane mukuvo wo kumusijira zviro zvese zvakanangwa ndi Mwari ecishandisa vaporofeti vake vokare vakagondeka.
22 Mosi wakati: ‘Jehovha* Mwari wenyu anozomumusira muporofeti wakaezana na inini pakati po hama jenyu. Munodikana kupurutana zvaanomuvhunja.
23 Zvokadi, mundhu wese anotama kuzwira muporofeti uwu, anozoparajwa kamare pakati po vandhu.’
24 Vaporofeti vese kutanga ndi Samueri na vaya vakatevera sure kwake, vakatokotesavo pambhene ngo pamusoro po njiku iji.
25 Imwimwi muri vana vo vaporofeti no vo citenderano cakaithwa ndi Mwari no majicekuru enyu, ecivhunja Abhirahama kuti: ‘Mbhuri jese jo pasi pano jinozokomborehwa ngo ndava yo mubarihwana* wako.’
26 Mwari paakapera kumusa Mushandiri wake, wakamutumira kwamuri pakutanga kuti amukomborere ngo kutendeuja umwe na umwe wenyu kuvha mu zviito zvake zvakashata.”
Masoko o Pasi
^ Gama ngo Gama: “nguva yocipfumbamwe.”
^ Kana: “majiso o soka.”
^ Kana: “vharanda.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “mbeu.”
