Hama Nikora na Serina, vakasongana no zvineso zvakasiyana. Vakagajwa ngo firiyari yo Fransa, kuti vaende koshandira ku ungano imweni. Ivona vakatendera. Vakati: “Pakutanga, takadakara maningi, asi takazova no cisuvo co shamwari jedu. Tainga ticito taano shamwari ku ungano imbza.” a Pikija no zvineso, mungaitenyi kuti muve no mudakaro no kubudirira pa ungano imbza yamagajwaro? Vamweni vangaitenyivo kuti vabesere? I njira yapi yamungavangisana no hama jiri mu ungano imbza yamuri waro?

NDHUNGAMIRIRO MURONGOMUNA JINGAMUBESERA KUTI MUHWISANE NO CINESO ICI

1. Thembanyi Jehovha. (Nduyo 37:5) Hambzaji Kazumi vanogara ku Jhapau, vakasiya ungano yavo yovaienda ko makore anokwana 20, apo mwamuna wavo wakacinjwa kuti aende koshandira ku ungano imweni. Kuitisa kudini hambzaji iyi yakatendera kuti “Jehovha aitungamirire”? Ivona vakananga kudari: “Ndakadurura mwoyo wangu kuna Jehovha ndomuvhunja zvese zvaindithimwisa-thimwisa no kundisuruvarisa, pondaiita izvi, Jehovha waindipa simba rondaida.”

Imwimwi mungaengejeresa kudini kuthemba kwenyu Jehovha? Kudari inga muti unoda kumwa no ndimo kuti ukure, gonda redu rinodavo kudurujihwa kuti rikure. Hama Nikora votabhuyaya pakutanga, vakavona kuti kurangarijisisa ngo muezaniso wa Abhirahama, Jesu na Pauro, avo vakaita zvese zvavaikwanisa kuti vaite kuda ka Mwari, kwakavangisa maningi rutendo hwavo kuna Jehovha. Kudari mukajija Bhaibheri njiku jese, zvinozomubesera kuhwisana no cinjo jiri jese jingaitika mu upenyu hwenyu no kukwanisa kubesera no kuvangisa hama jimweni ku ungano imbza yamunozoendaro.

2. Amudikani kuezanisa ungano yenyu imbza no yo kare. (Mucumaeri 7:​10) Hama Jhuri vakavona musiyano wakakura maningi wo zvirovejeso, povakavha Bhenin kwenda ku Estadhus Unidhus. Ivona vakananga kudari: “Ndakatanga kurangarira kuti ndaidikana kuverengera vandhu vese zviitiko zvo upenyu hwangu.” Zvecivoneka kuti zvirovejeso izvi zvainga zvakasiyana no zvirovejeso zvavo, vakatanga kugara ndhambo no hama. Pasure po kunasa kuziva ushoni hama, vakacinja mavonero avo. Ivona vakati: “Ndinotenda kuti kwese kwatinoenda pasi pano, vandhu ndivona vondhovo. Musiyano uripo basi ngo wokuti vano mavereketero akasiyana. Kutendera vandhu mu njira yavari waro, zvinosisira maningi.” Ngo kudaro, bhasopanyi kuti mutame kuezanisa ungano yenyu yo kare no imbza yamuri waro. Inga zvakabhuiwa ndi hambzaji Ana Riza inoshanda inga piyona, iyo yakati: “Andizivi kucinja kuti ndiwane zviro zvondakasiya ku ungano yangu yo kare, asi ndakacinja kuti ndiwane zviro zvipsa.”

Vakuru vanodikanavo kubhasopa kuezanisa ungano yavo yokare no imbza. Hama jo mu ungano yedu imbza, pajinoita zviro zvakasiyana no zvaiizwa ku ungano yedu yo kare, azvirevi kuti ijona jiri kushaisha. Zvinosisira maningi, i kuziva mugariro wo unganoyo ticito taguma pa mbhejiso yedu. (Mucumaeri 7:10) Zvinosisira maningi kujijisa hama ngo muezaniso wenyu waushoni kuciripi kuvavangirija kuti varangarire inga ndimwi.—2 Vakorinte 1:24.

3. Ivanyi makabatikana mu ungano yenyu imbza. (Vafiripi 1:27) Pikija zvinonesa maningi kana kutora nguva kwenda ku ungano yenyu imbza, asi zvinosisira maningi kuramba meciendeyo. Hama no hambzaji jo mu ungano yenyu imbza, jinoda kugara phedo na imwimwi no kumuvona nguva jese kuti jikwanise kumubesa. Hambzaji Rusinda no vana vavo vaviri povakathutha kwenda ku dhorobha guru ro Afrika dhu Suri vakananga kudari: “Ndakabesehwa kuti ndibatikane maningi no ungano yangu no kushanda no vandhu vamweni mu basa ro kucumaera no kutopinguravo pa musongano. Cimwenizve, takavhunja hama kuti pamuzi pedu pangashandiswa kuti paitihwepo musongano wo mu basa ro mu munda.”

“Kushanda pamwepo” no hama no hambzaji jo mu ungano yenyu imbza, mu mabasa o umwari, ndi njira yaushoni yo kwenderera mberi “mecitenda masoko akanaka.” Hambzaji Ana Rize vanangwaya, vakavangiswa ngo vakuru vo ungano yavo kuti vaeje kucumaera no vandhu vese. Ngowapi wakava muviyo? Ivona vakati: “Njira iyi ndiyona yaushoni kuti ndiitevo divi ro ungano.” Kusiyapo izvi, pamunonga mecijipira kuti mucenese no kutaja Nyumba yo Umambo, munonga mecitatija kuti muri kuitavo divi ro ungano yenyu imbza. Mukadaro, munozova mundhu anokhwederereka, cimwenizve, munozojizwa kuti muri kuita divi ro mbhuri imbza yo umwari.

4. Psakanyi shamwari jipsa. (2 Vakorinte 6:11-13) Vandhu povanovona kuti munovataja, vanojizwa vakarerukihwa kuti vave shamwari jenyu. Ngo kudaro, gumanyi nguva iciripo pa musongano, paunopera, pejanyi nguva no hama no hambzaji jenyu kuti munase kujiziva. Vangisiranyi kuti muzive mazina avo. Pamunonga meciziva mazina o hama, mova makareruka kuva shamwari, hama zinji jinozoda kumuziva, kangaije munozotova shamwari yaushoni.

Kusiyapo kutama kuvonesa zvamuri kuti vandhu vamudakarire, siyanyi kuti vandhu vese vamuzive ushoni. Itanyi zvakaithwa ndi hambzaji Rusinda. Ivona vakati: “Wari tino shamwari jaushoni ngo ndava yo kukoka hama kuti jiviye kumuzi kwedu.”

“ASHIRANANYI NGOCENYU”

Kunghwina mu Nyumba yo Umambo yakazara ngo vandhu vacikanasi kutiziva, zvingatothyisa ku vamweni. Waro tingaashirisa kudini vaya vanocinja ungano voviya ku ungano yedu? Mupostori Pauro wakati: “Ngo kudaro, ashirananyi ngocenyu inga zvamakaithwa ndi Kristu.” (Varoma 15:7) Vecitevejera Kristu, vakuru vangabesera vapsa, kuti vajizwe ushoni povanoguma pa ungano. (Vonanyi bhokiso rinoti: “ Ngozvapi Zvingamubesera Kuti Mubudirire Ushoni Pamunocinja Ungano.”) Ngo kudaro, vese mu ungano kubatanijavo no vana vadoko, vangaita zvese zvavanokwanisa kuti vabesere vapsa kuti vajizwe ushoni.

Kuashira varendo, zvinobatanijavo kuvapa besero rovanonga vecida. Inga muezaniso, hambzaji imweni poyakazwa kuti imwe hambzaji yainga yaguma mu nyikemo, yakashandisa nguva yayo, kuti iyende koikhombija kunopakirihwa karu no komboyo mudhorobhemo. Zvakaizwari ngo hambzaji iyi, zvakabesera hambzaji iyi ipsa kuti izwirane no mugariro wo dhorobhero.

MUKANA WO KUKURA KU DIVI RO UMWARI

Doto porinonga recikura, muviri waro unounduka kakawanda maningi mbhera parinozokwanisa kumburuka. Mukufananavo no doto, pamunonga mecienda ku ungano imbza munodikana kusiya zvese sure zvingaita kuti mutame kumburuka mu njira yo kuezanisira pa kushandira Jehovha. Hama Nikora na Serina vakati: “Kucinja kunosisira maningi, ngokuti kunotiroveja. Kuziva vandhu vapsa no mugariro jakasiyana kwakatibesera kuti tisakurire mugariro jimweni.” Hama Jeani Sharles vambonangwaya pakutanga, vakananga manera mbhuri yavo yakabesereka. Ivona vakati: “Kucinja kwakabesera vana vedu kuti vakure ku ungano imbza. No papera mweji munganani, mwana wedu wokaji wakagajwa kuti aite mativi o musongano wo pakati po sumana, mwana wedu worume, wakava mucumaeri acizivi kubhabhatijwa.”

Mungaitenyi kudari mugariro wenyu aumutenderi kuti muende ku ungano imweni? Madini kushandisa mazano aya pa ungano yamuri kushandiraro? Pamunonga mecithemba Jehovha, rambanyi makabatikana pa mabasa o mu ungano menyu, kuita urongwa wo kushanda mu basa ro kucumaera no vandhu vakasiyana-siyana, kuita shamwari jipsa no kuvangisavo ushamwari hwenyu no vaya vamakavhira kare mecitamba navo. Imwimwi maizojipira pa kubesera vapsa no vacina ciri cese kuti muvape besero riri rese mu ungano mwenyumo? Zvecivoneka kuti rudo ndi mugariro unovonesa Makristu okadi-kadi, kubesera vamweni zvingamubesavo kuti mukhwedere phedo na Jehovha. (Johani 13:35) Imwimwi mungava no cokwadi cokuti “Mwari anodakara maningi ngo mupiro jakadaro.”—Vahebheru 13:16.

Pikija no zvineso, Makristu mazinji akakwanisa kwenda ku ungano imbza. Na imwimwivo mungazvikwanisa. Hambzaji Ana Rize vakananga kudari: “Kucinja kwenda ku ungano imweni, zvakandibesera kuti ndikure.” Hambzaji Kazumi, wari vanothemba kudari: “Kucinja kwenda ku ungano imweni munonga mecivona besero ra Jehovha romucizivi kumbovonazve.” Hama Juri vanojizwavo kudini? Ivona vakati: “Ushamwari wondakaita no vamweni, unondibesera kuti ndijizve ndiri kanyi. Wari ndiri kujizwa ndiri phedo no ungano yangu imbza zvokuti zvingandinesera kuti ndicinjezve.”