Apo imwimwi no mudoni wenyu munotanga kugara mwese, zvineso zvizinji zvinomuka. Zvingamuka ngo pamusoro po marangaririre a umwe nga umwe wenyu, mazwiro pomwe no njira yamunoita ndiyona zviro ngo pamusoro po marerehwe amakaizwa. Kana zvineso zvingabva kunja zve zvimweni ngo zviitiko zvicikavetehwi.

Ungava muejo kueja kutiza cokwadi, asi tinongwajwa ngo Bhaibheri kuti tihwisane najo. (Mateu 5:23, 24) Mucazowana matongero aushoni ku shwiro jenyu kudari mukashandisa zviambi zvo Bhaibheri.

BHAIBHERI RINOTI KUDINI: Kuno “mukuvo wo kunyarara, no mukuvo wo kuvereketa.” (Mucumaeri 3:1, 7) Ivanyi no cokwadi co kuti muri kupeja nguva mecibhuya no mudoni wenyu mecibhuya ngo pamusoro po zvineso. Ngo mwoyo wese sianyi mudoni wenyu azive kuti munozwa kudini zve muri kurangarirenyi ngo shwiroyo. Nguva jese ‘vereketanyi cokwadi’ no mudoni wenyu. (VaEfeso 4:25) Pikija mazwiro akavanga maningi ari kubatanijwa, jiviriranyi kukukumijihwa kuhwisana. Mupinguro wakapfava ungaitisa kuti mabhuyo aizobara kuvereketesana arambe akapfava.—Mazwi Akangwara 15:4; 26:20.

Pikija mucikazvitendi zvaanobhuyaro, rambanyi makawa hana, mucikakanganwi kukhombija rudo zve nderemejo ku mudoni. (VaKolosi 4:6) Ejanyi kutonga shwiroyo ngo kukasika pazvinokwanisika zve mucadoregera kubhuisana.—VaEfeso 4:26.

ZVOMUNGAITA:

• Gajanyi mukuvo wokutonga shwiro

• Paunonga uri mukuvo wenyu wo kuti mupurutane, hwisanyi muejo wokupiningijira umweni. Ucakwana mukuvo wenyu wo kuvereketa

BHAIBHERI RINOTI KUDINI: “Disananyi ngo cenyu ngo rudo hwo ukama, mecitungamirirana kudisana.” (VaRoma 12:10) Mapurukirire amunoita anodikanavo maningi. Ejanyi kuzwisisa fundo ro mudoni wenyu no mavonero o kuva no “mwoyo umwe . . . no kujidodokesa.” (1 Pedru 3:8; Jakobo 1:19) Mucava no cinangwa co kuda kuzwa basi. Pazvinokwanisika, ambosianyi zvamuri kuita mopurukira mudoni wenyu zvakazara kana bvunjisanyi dengani mungazobhuisana pa mukuvo umweni. Kudari mecirangarira wamakarovorana nae inga wo cikwata condhoco kuciripi inga muvengi, ‘amuzokasiki kunyangajwa.’—Mucumaeri 7:9.

ZVAMUNGAITA:

• Rambanyi mecipurukira no cido co kuzwisisa, pikija zvamuri kuzwaro azvimudakajisi

• Purukiranyi masoko akafindara ngo sure ko magama ari kubhuiwaro. Sotanyi zviri kunanga muviri zve izwi ro mudoni wenyu

BHAIBHERI RINOTI KUDINI: “Mu mixando yese muno kubeswa; asi mu kuvereketesa, kunozoza utami basi.” (Mazwi Akangwara 14:23) Kutenderana basi azvikwani. Imwimwi munodikana kuita zvamakasunga movaviri. Izvi zvi-ngabatanija basa guru zve kuvangisira, asi zvicazova zvinoshanda. (Mazwi Akangwara 10:4) Kudari mecishanda pondhopo inga cikwata, “munozowana mupocero” wo basa renyu guru.—Mucumaeri 4:9.

ZVAMUNGAITA:

• Itanyi cisungo co mudanyu jingaizwa nga umwe na umwe kuti mupeje zvineso zvenyu

• Pa mukuvo no mukuvo, sotesesanyi kuenderera kwenyu mberi