Mateu 5:1-48
-
HURUKURO YO PADUNDHU (1-48)
5 Paakavona mbungano, iyena wakakhwira pa dundhu. Naagara pasi, vajiji vake vakaviya kwaari.
2 Iyena wakatanga kuvajijisa eciti:
3 “Vanodakara vaya vanoziva kuti vanodikana kutungamirihwa ndi Mwari, ngokuti Umambo hwo kumatenga ngo hwavo.
4 “Vanodakara vanocema,* ngokuti vanozonyarajwa.
5 “Vanodakara vakapfava, ngokuti vanozova veno vo nyika.
6 “Vanodakara vano njara no nyota yo ururami, ngokuti vanozogutiswa.
7 “Vanodakara vano usizi, ngokuti vanozoitihwavo usizi.
8 “Vanodakara vakacena mwoyo, ngokuti vanozovona Mwari.
9 “Vanodakara vanopsaka kuita runyararo, ngokuti vanozodanijwa kuti vana va Mwari.
10 “Vanodakara vanoteverehwa ngo ndava yo ururami, ngokuti Umambo hwo kumatenga ngo hwavo.
11 “Dakaranyi imwimwi kudari mukatukwa, mukateverehwa no kunyepehwa zviro zvese zvakashata ngo ndava yangu.
12 Dakaranyi no kudakarisisa ngokuti mupfupo wenyu, mukuru kumatenga. Vakatevereravo ngo njira yondhoyo vaporofeti vakamutangira.
13 “Imwimwi muri munyu wo nyika.* Kudari munyu ukatama kuvava,* ndiyani angauitisa kuti uvave?* Aucinazve basa; unosvejwa kunja wocikwa ngo vandhu.
14 “Imwimwi muri ruvheneko hwo nyika. Dhorobha rakagara panyezuru po dundhu arifisiki.
15 Azviiti kubwakija cibani* kuti cidumaijihwe mu citengu. Cinodihwa po cinovheneka, kuti civhenekere vese vari mumba.
16 Mukufananavo, ruvheneko hwenyu ngahuvheneke pamberi po vandhu vese, kuti vavone mabasa enyu akanaka, vokuja Baba wenyu vo kumatenga.
17 “Mucarangarira kuti ndakaviya kuzopfujura Mutemo no masoko o vaporofeti. Andizivi kuviya kuzopfujura, asi kuzokwanirisa.
18 Ndinomuvhunja zvokadi kuti, zvakareruka matenga no nyika kukhirira, kuciripi retra doko kana dimbu ro retra yo Mutemo, zvicikazivi kukwanirisika zviro zvese izvi.
19 Asi wiya anophwanya mupango mudoko iji, wojijisa vamweni kuti vazviitevo, anozodanijwa mudoko mu Umambo hwo kumatenga. Asi wiya anojizwira, wojijisavo vamweni kuti vazviitevo, anozoita mukuru mu Umambo hwo kumatenga.
20 Ndinomuvhunja kuti, kudari ururami hwenyu hukatama kuita hukuru kupinda ururami hwo vatari no Vafarisi, amuzonghwini mu Umambo hwo kumatenga.
21 “Makazwa zvakavhunjwa vandhu vo munguva jokare kuti: ‘Ucadouraya; wiya anouraya anozotongwa ku dare ro kutonga.’
22 Asi, inini ndinomuvhunja kuti: Ariwese anogara wakacamwira hama yake anozodavira ku dare ro kutonga; wiya anobhuya no hama yake ngo magama akashata o kurerusa, anozozvidavira ku Banje Guru; kusiyapo izvo, wiya anoti: ‘Rethe ricingashandi!’ anozoendeswa mu Gehena* rinobwaka.
23 “Ngo kudaro, kudari ukaenda no cipo cako pa artari, worangarira kuti hama yako ino ndava na iwewe,
24 siyai cipo cako pamberi po artari upinde. Tangai waenda koita runyararo no hama yako, perapo wozoviya koopira cipo cako.
25 “Kasikai kutonga ndava no mundhu anoda kokukeshari ku utongi, paunonga wecifamba naye mugwanja mecienda ku banje kuti atame kukudira munyara jo mutongi, mutongi wokuendesa ku mungwariri, kuti akudire mukadheya.
26 Zvokadi ndinokuvhunja kuti auzobudimo, ucito wapera kupagari gava rese.
27 “Makazwa kuti zvakanangwa kuti: ‘Ucaita upombo.’
28 Asi, inini ndinomuvhunja kuti: Ariwese anoringisisa mwanakaji ngo meso o kumuemura, wapombora naye ngo mu mwoyo make.
29 Kudari jiso rako ro muho rikakuitisa zvakashata, rivhisei urirase ndhambo na iwewe. Ngokuti zviri nane kuruza jiso rimwe, kupinda kukhandihwa muviri wese mu Gehena.*
30 Kudari nyara yako yo muho ikakuitisa zvakashata, itemei, uirase ndhambo na iwewe. Ngokuti zviri nane kuruza nyara imwe, kupinda kuti muviri wako wese ukhandihwe mu Gehena.*
31 “Zvakanangwazve kuti: ‘Wiya anorambana no mukaji wake, ngaamupe tsamba yo kurambana.’
32 Asi inini ndinomuvhunja kuti: Ariwese anorambana no mukaji wake, pacina ndava yo uhure,* anomudira pa ngozi yokuti aite upombo. Ngokuti wiya anocadha no mwanakaji wakarambwa, anoita upombo.
33 “Makazwa zvakavhunjwa vandhu vo munguva jokare kuti: ‘Ucadopika wotama kuzviita, asi unodikana kukwanirisa mbhiko jowakaitira Jehovha.’*
34 Asi inini ndinomuvhunja kuti: Mucadopika, nee ngo kudenga, ngokuti ndikona kunogara Mwari;
35 nee ngo pasi, ngokuti ndicona ciciko co soka jake; nee ngo Jerusarema, ngokuti idhorobha ra Mambo mukuru.
36 Ucadopika ngo musoro wako, ngokuti aukwanisi kucenesa kana kusvipisa vhuji rimwe haro.
37 Mavereketero enyu ngaadari: ‘Hina,’ ngaave hina, ‘Haiwa’ wenyu, ngaave haiwa, ngokuti zvinopinda izvi zvinovha ka Sathana.*
38 “Makazwa kuti zvakanangwa kuti: ‘Jiso ngo jiso, zino ngo zino.’
39 Asi, inini ndinomuvhunja kuti: Mucahwirijira zvakashata ku mundhu wakashata, wiya anomutaka pa dama ro muho, mupekejenyi dama rimwenizve.
40 Wiya anoda kukuendesa ku banje kuti akutorere hanju* yako, mupezve no bhaci rako;
41 Asi kudari mutongi akakuvangirija kuti umuthwarire muthwaro pa kiromita imwe,* endai naye kiromita mbiri.*
42 Ipai vanokukumbira, ucadorambira anoda kukufiyari.
43 “Makazwa kuti zvakanangwa kuti: ‘Idai mudoni wako, nyenyai muvengi wako.’
44 Asi inini ndinomuvhunja kuti: Rambanyi mecida vavengi venyu no kuitira mukumbiro vaya vanomuteverera,
45 kuti muvonese kuti muri vana va Baba wenyu vari kumatenga, ngokuti vanobudisa zuva ku vakarurama no vashati, vanonisa nvura ku varurami no vacizivi kururama.
46 Kudari mukada vanomuda basi, munozova no mupfupo wenyi? Andizvopi zvinoitwavo ngo vashabisi here?
47 Kudari mukacungamija hama jenyu basi, cicinyi camuri kuita cinoshamaisa? Andizvopi zvinoitwavo ngo vandhu vomajinja here?
48 Munodikana kuva vakakwana, kudari ndi Baba wenyu vo kumatenga vakakwana.
Masoko o Pasi
^ Kana: “vanorira.”
^ Gama ngo Gama: “pasi.”
^ Kana: “kujamunya.”
^ Kana: “ujamunyezve.”
^ Cigabhu-gabhu.
^ Ndau yaipisihwa zviro zvakashata kunja ko Jerusarema. Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Mu Cigiriki, por·nei′a. Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “ku mushati.”
^ Nghanju.
^ Gama ngo Gama: “pa 1.000 co mudanyu.”
^ Gama ngo Gama: “pa 2.000 zvo mudanyu.”
