Mucumaeri 3:1-22
3 Zviro zvese zvino mukuvo wazvo,Zviro zvese zvinoitwa pa nyika zvino mukuvo wazvo:
2 Mukuvo wo kubara no mukuvo wo kufa;Mukuvo wo kusima no mukuvo wo kuvhita zvakasimwa;
3 Mukuvo wo kuuraya no mukuvo wo kurapa;Mukuvo wo kuphwanya no mukuvo wo kuvaka;
4 Mukuvo wo kucema no mukuvo wo kuseka;Mukuvo wo kucumba no mukuvo wo kutamba;
5 Mukuvo wo kurasa mapuwe no mukuvo wo kuunganija mapuwe;Mukuvo wo kukumbatira no mukuvo wo kuregera kukumbatira;
6 Mukuvo wo kupsaka no mukuvo wo kuvona ciro inga casvejeka;Mukuvo wo kungwarira no mukuvo wo kusveja;
7 Mukuvo wo kumwesa no mukuvo wo kusona;Mukuvo wo kugara wakanyarara no mukuvo wo kuvereketa;
8 Mukuvo wo kuda no mukuvo wo kuzonda;Mukuvo wo hondo no mukuvo wo runyararo.
9 Mushandi anowanenyi ngo kuvangisira kwake kwese?
10 Ndakavona basa rakapuwa vandhu ndi Mwari kuti vagare vakabatikana.
11 Zviro zvese zvakaseja, iyena wakazviita pa mukuvo kwawo. Iyena wakadira mu mwoyo mwavo cido co kupona kwenda no kwenda. Ngo kudaro, vandhu narini avazokwanisi kuzwisisa basa ra Mwari wo cokwadi raakaita kuvhira pakutanga mbhera pakupejisira.
12 Ndakavona kuti apana cakanaka kwavari kupinda kudakara no kuita zvakanaka mu upenyu hwavo,
13 kuti vese vahe no kumwa no kubusa muviyo wo kushanda kwavo ngo simba. Ici icipo cinovha kuna Mwari.
14 Ndakazwisisa kuti zviro zvese zvinoitwa ndi Mwari wo cokwadi, zvinogara kwenda no kwenda. Apana cinodikana kuengejehwa nee apana cinodikana kuvhiswa. Mwari wo cokwadi wakaita zviro ngo njira iyi kuti vandhu vamuthye.
15 Zviro zvinoitika, zvakamboitika, zviro zvinozovepo zvakavoneka kare. Asi Mwari wo cokwadi anopsaka zviro zvinopsakwa ngo vandhu.*
16 Ndakavonazve izvi pa nyika:* Pa ndau yo ururami painga no ushati, pa ndau yo urungami painga no ushati.
17 Ngo kudaro, inini ndakati ngo mu mwoyo mwangu: “Mwari wo cokwadi, anozotonga varurami no vakashata ngokuti mabasa ese no zviro zvese zvino nguva yazvo.”
18 Inini ndakanangazve ngo mu mwoyo mwangu kuti Mwari wo cokwadi anozoeja vana vo vandhu wovatatija kuti vakaezana no zvinyama,
19 ngokuti zvinoitika no vandhu, ndizvonavo zvinoitika no zvinyama. Vese vano magumo ondhoo. Kufa kunoita zvinyama, kwakaezana no kufa kunoita vandhu. Zvese zvino mujimu* wondhoo, ngokuti vandhu avazivi kukhwirira kupinda zvinyama. Zviro zvese azvina zvazvinobesera.
20 Zvese zvinozoenda ku ndau yondhoyo. Zvese zvakavha ku mavhu, izvona zvese zvinozohwirira ku mavhu.
21 Ndiyani anonasa kuzviziva kuti mujimu wo vandhu unoenda kudenga kana kuti mujimu wo zvinyama unoenda pasi?
22 Ndakavona kuti apana cakanaka ku mundhu kupinda kubusa ngo basa rake, ngokuti ndiwona mupfupo wake. Ngokuti ndiyani anozomuvhunja zvinozoitika kumbeji iyena akafa?
Masoko o Pasi
^ Kangaije: “zviro zvakangarangaka.”
^ Gama ngo Gama: “pasi po zuva.”
^ Kana: “simba ro upenyu rondhoro.”
