IZaga 26:1-28
26 Ukunika isiphukuphuku udumo akufanelanga,+Kunjengongqwaqwane ngesikhathi sehlobo lanjengezulu ngesikhathi sokuvuna.
2 Njengoba nje inyoni ilesizatho sokubaleka, lenkonjane ilesizatho sokuphapha,Lesiqalekiso kasibuyi kungelasizatho.
3 Umchilo ngowebhiza, itomu ngelikababhemi,+Uswazi ngolomhlane weziphukuphuku.+
4 Ungaphenduli isiphukuphuku ngempendulo ehambelana lobuphukuphuku baso,Ukuze ungacini usufanana laso.*
5 Phendula isithutha ngempendulo ehambelana lobuphukuphuku baso,Ukuze singacabangi ukuthi sihlakaniphile.+
6 Umuntu ovumela isithutha siphathe indabaUnjengomuntu ozilimaza inyawo asale egogekile.*
7 Isaga esisemlonyeni wabantu abayiziphukuphukuSinjengokuxega kwenyawo zomuntu oyisigoga.+
8 Ukunika isithutha udumoKunjengokubophela ilitshe esavutheni.+
9 Isaga esisemlonyeni wezithutha,Sinjengogatsha lwameva oluphethwe yisidakwa.
10 Umuntu oqhatsha isithutha kumbe abantu abazidlulelayo nje,Unjengomuntu otshoka umtshoko loba ngaphi alimaze abantu.
11 Isithutha siyabuphinda ubuphukuphuku baso,Njengenja ebuyela emahlanzweni ayo.+
12 Sewake wabona umuntu ozitshela ukuthi uhlakaniphile?+
Isithutha silethemba elingcono kulaye.
13 Ivila lithi: “Kulesilwane esilamandla emgwaqweni,Kulesilwane egcekeni ledolobho!”+
14 Ivila elilokhu litshibilika embhedeni waloLinjengesivalo esilokhu sivuleka sivaleka.+
15 Ivila liyafaka isandla salo emganwini,Kodwa liyadonda ukusibuyisela emlonyeni walo.+
16 Ivila licabanga ukuthi lihlakaniphileUkwedlula abantu abayisikhombisa abaphendula izinto ezilengqondo.
17 Umuntu othi ezidlulela abesecatshulwa yingxabano* engaqondananga layeUnjengomuntu obamba inja ngendlebe.+
18 Njengohlanya olujika izikhali ezivuthayo, lemitshoko kanye lokufa,*
19 Unjalo umuntu oqila umakhelwane* wakhe abesesithi, “Bengizidlalela.”+
20 Nxa kungelankuni umlilo uyacitsha,Njalo nxa kungelamuntu onyundiselayo, ukuxabana kuyaphela.+
21 Njengamalahle aphoselwa kwamanye avuthayo lanjengenkuni eziphoselwa emlilweni,Unjalo umuntu othanda ukuxabana labanye evusa umsindo.+
22 Amazwi omuntu onyundiselayo anjengezifela emlonyeni,Ezehla ngomphimbo zisiya esiswini.+
23 Amazwi alothando akhulunywa ngumuntu olenhliziyo embi,Anjengesiliva esicazimulayo okuhuqwe ngaso ucezu lwesitsha sebumba.+
24 Ozonda abanye uyakufihla lokho ngamazwi akhe,*Kodwa ngaphakathi uyabe efukamele ubuqili.
25 Lanxa ekhuluma kamnandi* ungamthembi,Ngoba enhliziyweni yakhe kulezinto eziyisikhombisa ezenyanyekayo.*
26 Lanxa efihla inzondo yakhe ngobuqili,Okubi akwenzayo kuzavezwa ebantwini.
27 Ogebha igodi uzawela kulo,Lalowo ogiqa ilitshe lizaphenduka ligiqikele phezu kwakhe.+
28 Ulimi olulamanga luyabazonda olubalimazayo,Lomlomo oncoma okwamanga uyadiliza.+
Amabala angaphansi
^ Kumbe, “usunjengaso.”
^ NgesiHebheru, “onatha udlakela.”
^ Ezinye inguqulo zithi, “abesengenela ingxabano.”
^ Kumbe, “lemitshoko ebulalayo.”
^ Kumbe, “odlala ngengozi kumakhelwane.”
^ NgesiHebheru, “ngezindebe zakhe.”
^ Kumbe, “ngendlela elomusa.”
^ Kumbe, “inhliziyo yakhe yonke iyenyanyeka.”
