ToTajtsin Dios ye okichijchi nochi tlen onka. Ye nochipa yokatka uan amo keman poliuis (Salmo 90:2). Ye techmaka nochi kuali tlajtolmej tlen tikajsij itech Biblia (1 Timoteo 1:11). Ken ye otechmakak toyolilis, moneki san ye tiktekichiuiliskej uan tikueyichiuaskej.​—Xiktlajtolti Apocalipsis 4:11.

Nion se tlaltikpaktlakatl amo keman okitak nion kitas toTajtsin Dios, pampa ye se espíritu, nin kijtosneki inemilis okachi ueyititok, amo ken tejuan pampa tejuan tikpiaj tonakayo uan tiyetokej ipan Tlaltikpak (Juan 1:18; 4:24). Tejuan uelis kuali tikixmatiskej toTajtsin Dios ijkuak tikitaj nochi tlen ye okichijchi. Se neskayotl, tikitaj tlatlamantli tlakilotl uan xochimej tlen technextiliaj ye techtlasojtla uan melauak ixtlamatki. Uan noijki ken semanauak sapanoa ueyi nin techmachtia toTajtsin Dios kipia sapanoa miak chikaualistli.​—Xiktlajtolti Romanos 1:20.

Noijki tejuan uelis tikixmatiskej toTajtsin Dios ijkuak tiktlajtoltiaj Biblia. Biblia techilia Jehová yolkuali iuan tlaltikpaktlakamej, tlen tlamantli kipaktia uan tlen amo, uan noijki techilia tlen kichiua ye ijkuak itlaj panoa.​—Xiktlajtolti Salmo 103:7-10.

Jesús okijto: “ToTajtsin Dios akin tika iluikak, ma moueyichiua motoka” (Mateo 6:9, NM). Maski toTajtsin Dios tlatlamantli kitokayotiaj, kipia san se itoka. Tlaltikpaktlakamej tlajtoaj tlatlamantli tlajtolmej, ik non, tlatlamantli kitenkixtiaj itoka toTajtsin Dios. Ika náhuatl moijtoa “Jehová” uan ika español oksekimej noijki kijtoaj “Yavé”.​—Xiktlajtolti Salmo 83:18 (82:19 itech oksekimej Biblias).

Itech miakej Biblias, nin tokayotl Jehová yokipatlakej ika oksekimej tokayomej, ken toTeko noso Dios. Maski ijkon, ijkuak  okijkuilojkej Biblia tokayotl Jehová onesia kanaj 7,000 veces. Ijkuak Jesús okinmachti tlaltikpaktlakamej itech toTajtsin Dios, nochipa okijto itoka.​—Xiktlajtolti Juan 17:26, NM.

Xikita video ¿Kipia itoka toTajtsin Dios?

Tla melauak techtlasojtla, ¿tleka onka miak tlajyouilistli? Sekimej kijtoaj toTajtsin Dios techtlajyouiltia pampa kineki kitas kox titlaxikoaj. Maski ijkon, nin amo melauak.​—Xiktlajtolti Santiago 1:13.

Jehová techkauilia ma tikpejpenakan tlen tiknekij tikchiuaskej. Uan okachi kuali tla tikpejpenaj tiktekichiuiliskej (Josué 24:15). Maski ijkon, miakej tlaltikpaktlakamej kipejpenaj kichiuaskej tlen amo kuali, ik non, onka miak tlajyouilistli. Maski ijkon, Jehová moyolkokoa ijkuak kita ken tlajyouiaj tlaltikpaktlakamej.​—Xiktlajtolti Génesis 6:5, 6.

Jehová techtlasojtla uan kineki ma tiyolpakikan, ik non, ayakmo miak poliui pampa kitlajtlamis nochi tlen amo kuali. Maski ijkon, Jehová kimati tleka kitekauilia ma titlajyouikan, uan itech tlamachtil chikueyi tikitaskej tleka.​—Xiktlajtolti 2 Pedro 2:9; uan 3:7, 13.

Ika tlatlaujtilistli, Jehová techkauilia ma timotokikan itech. Uan noijki ye motekipachoa itech sejse tejuan (Salmo 65:2; 145:18). Noijki, ye kineki techtlapojpoluis uan kimatok ken timochijchikauaj pampa tikchiuaskej tlen ye kineki, maski kemantika amo uelij tikchiuaj. Ik non, maski tejuan titlajtlakolejkej uelis kuali timouikaskej iuan.​—Xiktlajtolti Salmo 103:12-14 uan Santiago 4:8.

Ken ye otechchijchi, moneki san ye tikueyichiuaskej (Marcos 12:30). Tejuan tikteititiaj tiktlasojtlaj toTajtsin Dios ijkuak timomachtiaj itech ye uan tiktlakamatij itlanauatiluan. Tla ijkon tikchiuaj, okachi kuali iuan timouikaskej.​—Xiktlajtolti 1 Timoteo 2:4 uan 1 Juan 5:3.