Santiago 1:1-27
1 Ne niSantiago, niktekichiuilia toTajtsin Dios uan toTeko Jesucristo. Namechtlajkuililia uan namechontlajpaloua namejuan 12 familias tlen nouian nankatej.
2 Nokniuan, sapanoua xipakikan ijkuak nankixnamikiskej miak ouijkayotl.
3 Porque nankimatij okachi nantlaxikouaj ijkuak nantlajyouiaj uan ijkuak kiyejyekouaj namotlaneltokilis.
4 Pero tla nochipa nantlaxikoskej, ayakmo nankipiaskej tlajtlakoli, amo nankipiaskej itlaj amo kuali uan amitlaj namechpolos.
5 Tla ikaj kipoloua ixtlamatilistli, nochipa makitlajtlanili toTajtsin Dios uan ye kimakas, porque toTajtsin Dios kitemaka miak ika nochi iyolo uan amo kualani ijkuak kitlajtlaniliaj.
6 Pero makitlajtlani ika nochi iyolo uan matlaneltoka, porque akin amo tlaneltoka yetoskia ken atl tlen motlauiteki ijtik mar ijkuak kiuiuika ejekatl.
7 Tla ikaj ijkon kichiua amo makijto Jehová itlaj kimakas.
8 Akin ijkon kichiua kijtosneki amo kimati tlen kineki uan kipapatla nochi tlen kichiua.
9 Pero tla se tokni yolyamanki mapaki porque kiueyitlaliaj.
10 Noijki mapaki akin kipia miak tomin tla kajsikamati moneki yetos yolyamanki. Porque akin kipia miak tomin pojpoliuis ijkon ken se xochitl tlen moskaltia tlala.
11 Porque ijkuak kisa tonaltsin, chikauak tona, xiuitl uaki uan ixochio uetsi uan ayakmo kualtsin mota. Ijkon pojpoliuis akin kipia miak tomin porque san kitemoua tomin.
12 Paki akin tlaxikoua ijkuak kixnamiki ouijkayotl porque tla tlaxikos, kiselis iyolilis ken se corona tlen Jehová okijto kinmakas akinmej nochipa kitlasojtlaj.
13 Ijkuak ikaj tlajyouia amo makijto: “ToTajtsin Dios nechyejyekoua”. Porque amikaj uelis kiyejyekos toTajtsin Dios ika tlen amo kuali, nion ye amikaj kiyejyekoua ika tlen amo kuali.
14 Pero sejse kinyejyekoua tlen kinyoltilana ijkuak kinekij kichiuaskej tlen kinekij.
15 Ijkuak mochiua okachi chikauak tlen kiyoltilana, kichiua matlajtlakolchiua uan satepan ixpoliui.
16 Amo ximokajkayauakan nokniuan tlen namechtlasojtla.
17 Nochi tetliokolil kuali uan ajsitok uits iluikak. ToTajtsin Dios okichijchi tlauili tlen onka iluikak uan ye amo mopapatla ken ekauilotl tlen molinia uan mopapatla.
18 Ye okinek matiyoltokan ijkuak otikneltokakej melauak itlajtol, para matiyetokan akinmej achto okinpejpenki tlen kisaj itech akinmej okinchijchi.
19 Nokniuan tlen namechtlasojtla, nikneki xikmatikan san niman xitlakakikan pero amo san niman xitlajtokan uan amo san niman xikualanikan.
20 Porque ijkuak ikaj kualani, amo kichiua tlen kuali ixpan toTajtsin Dios.
21 Ikinon xikmokixtilikan nochi tlen sokio uan nochi tlen amo kuali. Noijki xiyetokan nanyolyamankej uan xiktekauilikan namoijtik mamoneluayoti iTlajtol toTajtsin Dios tlen uelis namechmakixtis.
22 Pero xikchiuakan tlen kijtoua iTlajtol toTajtsin Dios uan amo san xikkakikan. Amo ximokajkayauakan tla nankijtoskej san moneki nantlakakiskej.
23 Tla ikaj kikaki iTlajtol toTajtsin Dios pero amo kichiua, yetoskia ken se tlakatl tlen moixtlajtlata itech se espejo.
24 Ijkuak yomoixtlajtlatak, yaui uan san niman kilkaua ken omotaya.
25 Pero akin kiyekita kuali tlanauatil tlen temakixtia uan nochipa kitlakamati,* amo san kikaki uan kilkaua. Ye kitekichiuilia toTajtsin Dios uan paki ijkon kichiua.
26 Tla ikaj mokuayejyekoua* kiueyichiua toTajtsin Dios pero amo kinauatia inenepil, kijtosneki kikajkayaua iyolo uan san nenka kiueyichiua toTajtsin Dios.
27 Ixpan toTajtsin Dios nin kijtosneki chipauak tikueyichiuaskej uan amo sokio: matikinmaluikan ijkuak tlajyouiaj iknomej uan siuamej tlen oixpoliuik innamik. Noijki amo matimosokiotikan ika tlen kichiuaj akinmej amo tetlakamatij.*
