Apocalipsis 4:1-11
4 Satepan ijkuak ijkon opanok, onikitak otlapotoka se puerta ompa iluikak uan akin achto onechtlapoui omokakiaya ken ijkuak kipitsaj se trompeta. Ye onechilui: “Nikan xitlejko porque nimitsititis tlen moneki panos satepan”.
2 Satepan ijkuak ijkon opanok, iespíritu toTajtsin Dios san niman nopan ouala. Ijkuakon onikitak se trono ompa iluikak uan ikaj okatka* ipan non trono.
3 Akin okatka ipan trono omotaya ken tetl jaspe uan ken tetl sardio. Trono okiyaualojtoka se kosamalotl tlen omotaya ken se tetl esmeralda.
4 Trono okiyaualojtokaj 24 tronos uan onikitak ipan tronos okatkaj* 24 tlayekankej. Intlaken okatka istak uan inpan intsonteko okipiayaj se corona de oro.
5 Kanin okatka trono otlapejpetlaniaya, omokakiaya otlajtouayaj uan otlatijtikuiniaya. Noijki ixpan trono oxotlatokaj chikome tlauiltin. Nonmej tlauiltin kijtosneki chikome iespíritus toTajtsin Dios.
6 Ixpan trono omotaya itlaj ken mar de vidrio, chipauak uan opetlaniaya.
Tlatlajkotia kanin okatka trono okatkaj naui querubines* uan okiyaualojtokaj trono. Nonmej querubines* okinpiayaj miakej inmixtololouan inmixpan uan inkuitlapan.
7 Achto querubín* omotaya ken se león, okse querubín* omotaya ken se torojkonetl, okse querubín* okipiaya ixko ken se tlakatl uan okse querubín* omotaya ken se águila tlen patlani.
8 Sejse querubín* okinpiaya chikuase iajasuan* tlen okinpiaya miakej ixtololouan panixko uan tlaijtik. Tlajka uan youak nochipa kijtouaj: “ToTajtsin Dios Jehová ye santo, santo, santo. Ye akin kipia nochi chikaualistli, akin axkan kajki, yokatka uan uits”.
9 Querubines* kiueyichiuaj, kitlakaitaj uan kitlasojkamatiliaj akin kajki* ipan trono uan nochipa yoltok.
10 Ijkuak querubines* ijkon kichiuaj, 24 tlayekankej motlankuaketsaj ixpan akin kajki* ipan trono uan kiueyichiuaj akin nochipa yoltok. Yejuan kintlamotlaj incoronas ixpan trono uan kijtouaj:
11 “ToTajtsin Dios Jehová, tejuatsin tikpia chikaualistli uan mitsnamiki mamitsueyichiuakan uan mamitstlakaitakan porque tejuatsin otikchijchi nochi tlen onka. Tejuatsin otikmonekilti mayeto nochi tlen onka”.
Notas
^ Noso “oeuatoka”, “oyetoka”.
^ Noso “oeuatokaj”, “oyetokaj”.
^ Querubines kijtosneki ángeles tlen okachi tlanauatiaj.
^ Querubines kijtosneki ángeles tlen okachi tlanauatiaj.
^ Querubín kijtosneki se ángel tlen okachi tlanauatia.
^ Querubín kijtosneki se ángel tlen okachi tlanauatia.
^ Querubín kijtosneki se ángel tlen okachi tlanauatia.
^ Querubín kijtosneki se ángel tlen okachi tlanauatia.
^ Querubín kijtosneki se ángel tlen okachi tlanauatia.
^ Noso “imajtlapaluan”, “imastikapaluan”.
^ Querubines kijtosneki ángeles tlen okachi tlanauatiaj.
^ Noso “euatok”, “yetok”.
^ Querubines kijtosneki ángeles tlen okachi tlanauatiaj.
^ Noso “euatok”, “yetok”.
