TLAMACHTIL 4
¿Akin Jesucristo?
1. ¿Akin okichijchi Jesús?
¿Tlen kuali iyelis okipixki Jesús tlen okiteititi san akin uelis iuan motlapouiskia?—(MATEO 11:29; MARCOS 10:13-16)
Jesús amo okatka ken tlaltikpaktlakamej, pampa ye okatka ken se espíritu itech iluikak, achto nesiskia nikan Tlaltikpak (Juan 8:23). Jehová achto okichijchi Jesús, uan Jesús okipaleui pampa kichijchiuaskia nochtin oksekimej tlamantli. Biblia kijtoa Jesús “san ye se iKone toTajtsin Dios”, pampa san ye toTajtsin Dios akin ineuia okichijchi (Juan 1:14). Noijki kitokayotiaj “Tlajtoli” pampa ye kitematiltia tlen kineki kijtos iTajtsin.—Xiktlajtolti Proverbios 8:22, 23, 30; Colosenses 1:15, 16, NM, uan Apocalipsis 19:13.
2. ¿Tleka Jesús ouala Tlaltikpak?
ToTajtsin Dios okiualtitlanki iKone nikan Tlaltikpak. Okitlali inemilis ikone ijtik se ichpochtli judía tlen omotokayotiaya María. Ik non, itajtsin Jesús amo okatka se tlakatl (Lucas 1:30-35). Ye ouala nikan Tlaltikpak pampa: 1) techmachtis tlen melauak itech iTajtsin Dios, 2) pampa ika ineskayo otechmachtiko tejuan uelis tikchiuaskej tlen kineki toTajtsin Dios, maski yetos ouijkayotl, uan 3) okitemakak iyolilis tlen amo okipiaya tlajtlakoli ken se “tlaxtlauili”.—Xiktlajtolti Mateo 20:28.
3. ¿Tleka moneki se tlaxtlauili?
Se tlaxtlauili motemaka ijkuak ikaj kimakixtiaj (Éxodo 21:29, 30). ToTajtsin Dios amo okinekiaya tlaltikpaktlakamej ma kokoxkatikan noso ma ueuejtikan nion ma mikikan. Uan ijkon tikijtoaj pampa tejuan tikmatij Jehová okili Adán tla ye amo tetlakamatiskia, ye mikiskia. Ik non, tla ye amo tlajtlakolchiuaskia, amo keman mikiskia (Génesis 2:16, 17; 5:5). Biblia kijtoa mikilistli ‘opejki ijkuak otlajtlakolchi Adán’. Kijtosneki Adán okinpanoltili ixuiuan tlajtlakoli uan ik non, tinochtin timikij. Ik non, moneki ikaj ma techmakixti, ma kitemaka se tlaxtlauili.—Xiktlajtolti Romanos 5:12 uan 6:23.
Axkan, ¿akin uelis kitemakaskia nin tlaxtlauili uan ijkon techmakixtiskia itech mikilistli? Ijkuak timikij, tiktlaxtlauaj nochi totlajtlakoluan. Ken nochtin tejuan titlajtlakolejkej amo ikaj uelis kitlaxtlauas intlajtlakol oksekimej.—Xiktlajtolti Salmo 49:7-9.
4. ¿Tleka omikik Jesús?
Jesús amo ken tejuan, pampa ye amo okipiaya tlajtlakoli uan amo keman otlajtlakolchi. Ik non, ye amo omikik pampa itlajtlakoluan, ye omikik pampa nochtin tejuan. Ijkuak toTajtsin Dios okititlanki iKone ma mikiki topampa, ye okiteititi miak tlasojtlalistli. Uan Jesús noijki okiteititi ye techtlasojtla ijkuak okitlakamatki iTajtsin uan okitemakak iyolilis pampa techmakixtis itech tlajtlakoli uan mikilistli.—Xiktlajtolti Juan 3:16 uan Romanos 5:18, 19.
Xikita video ¿Tleka omikik Jesús?
5. ¿Axkan tlen kichijtok Jesús?
Ijkuak Jesús okatka nikan Tlaltikpak, okinpajti akinmej omokokoayaj, okinyoliti akinmej omikej uan okinpaleui akinmej otlajyouiayaj, ijkon okiteititi tlen kichiuas satepan pampa nochtin akinmej kitekichiuiliaj toTajtsin Dios (Mateo 15:30, 31; Juan 5:28). Ijkuak Jesús omikik, toTajtsin Dios okiyoliti uan okimakak iyolilis ken se espíritu itech iluikak (Efesios 1:20). Satepan, Jesús omochixki iyekma toTajtsin Dios pampa ma kitlali ken ueyi Tekiua itech iluikak pampa ma tlanauati itech Tlaltikpak (Hebreos 10:12, 13). Axkan, Jesús tlanauatijtok itech iluikak, uan imachtijkauan kitematiltiaj nin kuali tlajtoli itech nochi Tlaltikpak.—Xiktlajtolti Daniel 7:13, 14 uan Mateo 24:14.
Ken toTajtsin Dios okimakak tlanauatilistli, nin ueyi Tekiua kinmixpolos nochtin tlaltikpaktlakamej tlen amo yolkualmej uan noijki kitlajtlamis ouijkayotl tlen kichiuaj. Nochtin akinmej tlaneltokaj itech Jesús uan kitlakamati uelis yoltoskej nochipa itech Tlaltikpak tlen mokuepas se xochitlali.—Xiktlajtolti Salmo 37:9-11.
