Yekinika xiujmej keman nimoskaltijtoya ninemik ompakauin itech xolal Leipzig, tein pouia itech ne uejkauj República Democrática Alemana, amo semi uejka kampa moajsi Polonia uan tein axkan moixmati kemej República Checa. Keman nikpiaya 6 xiujmej timokaltalitoj itech ueyi altepet Brasil porin nopopaj ompa kipiaya tekit, uan satepan Ecuador.

Keman nikpiaya 14 xiujmej, notatuan nechtitankej maj nimokepa Alemania maj nimomachtiti uan maj ninemiti itech se tamachtiloyan. Notatuan moajsiaj tel uejka, axkan nejua monekia nimoitas. Peuak noselti nimoixyekana uan amo nechtekipachouaya ox tein nikchiuaya kinkuejmolouaya oksekin.

Notatuan mokepkej Alemania keman nikpiaya 17 xiujmej. Keman ejkokej ninemik iniuan, sayoj ke kemej nikuelitaya noselti nimoixyekanas nechouijmakak niktakamatis tein yejuan kiixtaliayaj kalijtik uan keman nikpiaya 18 xiujmej ninemito okseko.

Amo niyolpakia, yejua ika niktemoj tein nechpaleuis. Nikitak kemej oksekin nemiaj, uan niknemilij ke okachi kuali maj nipaxaloti itech nochi nejin kualtsin taltikpak achto ke kiixpoloskej.

Nimokouilij se motocicleta, nikisak Alemania uan niyajki África. Sayoj ke satepan monekik nimokepas Europa porin motocicleta uejueliuik. Satepan ke nikyekchijchiuak, niyajki itech se ueyiatenoj tein moajsi Portugal. Ompa niknemilij nikauas motocicleta uan nipaxalotiuj ika barco.

Niyajki iniuan sekin telpochmej akin kiixtalijtoyaj kipanauiskej ueyiat tein moixmati kemej océano Atlántico. Iniuan moajsia Laurie, akin satepan iuan nimonamiktij. Tiyajkej itech barco hasta islas del Caribe uan satepan ke tepitsin timotsakuilijkej ompa Puerto Rico, timokepkej Europa. Laurie uan nejua tiknekiaj tikajsiskej se barco tsikitsin uan tikyekchijchiuaskej uan ijkon ompa tinemiskiaj. Sayoj ke satepan ke tiktemojkej eyi metsti, tikaujkej tein tikixtalijtoyaj, porin tateuianij akin kayomej Alemania nechnotskej.

 Nipanok iniuan tateuianij se xiuit uan eyi metsti, uan itech nejon tonalmej nimonamiktij. Tiknekiaj tiksentokaskej tipaxalotiuij. Tepitsin achto ke nechnotsaskiaj tateuianij tikoujkaj se barco uan keman nimoajsia iniuan tateuianij, yolik tikyekchijchiujtiyajkej. Tiknemiliayaj ompa tinemiskej uan tiksentokaskej tipaxalotiuij itech nochi taltikpak. Tepitsin satepan ke nikinkauak tateuianij, sayoj ke achto ke tiktamiyekchijchiuaskiaj barco, itaixpantijkauan Jiova tajtojkej touan uan peujkej timomachtiaj Biblia.

Yekinika amo niknemiliaya ke monekia nikpatas miak taman: nimonamiktijka iuan siuat akin iuan ninemia uan amo nitachichinayaok (Efesios 5:5). Uan no niknemiliaya ke nipaxalotiuj itech nochi taltikpak uan nikitas nochi tein kualtsin tein Jiova kichijchiuak katka se taman kemej ueliskia ninemis.

Sayoj ke tein melauj monekia nikpatas okseki taman, okachi kemej nitamatia. Niksentokaya nimoueyimatia uan amo niknekia maj nechixyekanakan, uan nikuelitaya ika nitajtos tein uelia nikchiuaya uan tein nikpiaya. Tein okachi niktayekanaltiaya katka tein nejua niknejnekia.

Se tonal nikixtajtoltij tanojnots tein motemakak itech se tepet tein miakej kiixmatij (Mateo, capítulos 5 hasta 7). Amo nikajsikamatia yekinika tajtolmej tein Jesús kijtoj ika keniuj se kiajsis yolpakilis. Kemej neskayot, kijtoj ke yolpakij akin mayanaj uan amikij (Mateo 5:6). Sayoj ke nimotajtaniaya keniuj uelis yolpakis aksa akin mayana uan amiki. Ijkon kemej okachi nimomachtiaya Biblia nikitak ke tinochin moneki timotokiskej iuan Dios uan ke tein techpaleuis maj iuan timotokikan yejua komo tikitaj ke moneki. Ijkon kemej Jesús kijtoj: “Yolpakij akin kimachiliaj ke moneki motokiskej iuan Dios” (Mateo 5:3, TNM).

Laurie uan nejua peujkej timomachtiaj Biblia itech ueyi altepet Alemania, sayoj ke timokaltalitoj Francia uan satepan Italia. Kampa yeski moajsiaj itaixpantijkauan Jiova. Se taman tein nikmoujkaitaya yejua ke motasojtayaj se iuan okse uan mosenpaleuiayaj. Nikitak ke yekmelauj mouikayaj kemej iknimej maski seseko kayomej (Juan 13:34, 35). Satepan timoauijkej.

Maski nikatkaya niitaixpantijkauj Jiova, monekik niksentokas nikpatas kemej nitamatia.Laurie uan nejua tikixtalijkaj tiyaskej itech nochi ueyiatenoj tein poui África uan tikpanauiskej ueyiat Atlántico hasta tiajsiskiaj Estados Unidos. Ompa keman tiyetoyaj itech ueyiat toselti itech se barco tsikitsin, nikitak ke toTajtsin akin tachijchiuak semi ueyi uan tejuan semi titsikitsitsin. Nikpiaya miak tiempo (itech ueyiat amo miak taman ueli se kichiua), yejua ika nikixtalij nikixtajtoltis Biblia. Tein okachi nechtanemililtij yejua kampa ika tajtoua inemilis Jesús. Maski yejua amo kipiaya tajtakol uan kinextiaya miak taman tein kualtsin, amo keman kitemoj maj kiueyichiuakan. Yejua amo kitayekanaltiaya tein yejua kinekia, ta tein kinekia iPopaj.

Keman niknemilij tein kichiuak Jesús, nikitak ke amo ueliskia niktekitilis Dios sayoj keman amo nikpiaya okse taman tein nikchiuas, ta monekia niktayekanaltis (Mateo 6:33). Niman keman tiajsikej Estados Unidos, tikixtalijkej amo kemanok tipaxalojtinemiskej uan okachi tiktekitiliskej Dios.

Achto, keman sayoj notech nitanemiliaya, amo nikyekmatia toni nechualkuiliskia tein nikixpejpenaskia. Axkan nikajsik tein nochipa uelis nechpaleuis (Isaías 48:17, 18). Uan no, nikajsik tein yekmelauj nechyolpaktia: nikueyichiuas Dios uan nikinpaleuis oksekin maj kiixmatikan.

Tein tayolmajxitia Biblia techpaleuiani Laurie uan nejua maj okachi kuali timouikakan kemej namikuanij. Uan no, Jiova techtatiochiuiani ika se siuapil kuakualtsin akin no kiixmati Jiova uan kitasojta.

Tikpanouanij tataman ouijkayomej. Sayoj ke Jiova amo keman techkauani uan tikixtaliaj amo keman timosenkauaskej uan nochipa titakuaujtamatiskej iuan yejuatsin (Proverbios 3:5, 6).