Efesios 5:1-33
5 Yejua ika, xikchiuakan kemej Dios porin namejuan nanikoneuan akin namechtasojta,
2 uan xiksentokakan xitetasojtakan, ijkon kemej Cristo no techtasojtak* uan toka* motemaktij iixpan Dios kemej se taman tein ajuiyak.
3 Nion tepitsin ika xitajtokan auilnemilis,* tein yeski taman tein pitsotik oso tein kinextis ke nankitelixnejnekij tein teaxka,* porin akin chipaujkanemij amo kuali yetok maj ika tajtokan nejon.
4 Amo no xikchiuakan tein tepinaujtij nion xieliuistajtokan nion xikamanalokan ika tein pitsotik, porin nejon amo kuali yetok. Okachi kuali, ximotasojkamatikan.
5 Porin namejuan nankimatij uan kuali nankiajsikamatij ke amo kalakis itech iTaixyekanalis Cristo uan Dios nion se akin auilnemi,* akin kichiua tein pitsotik uan akin semi kiixnejneki tein teaxka,* nejin kemej yeskia kinueyichiujtoskia tatadiosmej.*
6 Maj amo akin namechkajkayaua ika xolopijyot, porin yejua nejon tein kichiuas maj Dios kintatsakuilti akin amo tatakamatij.
7 Yejua ika, amo xikchiuakan tein yejuan kichiuaj;*
8 porin achto nanyetoyaj kampa tayouayan, sayoj ke axkan nanyetokej kampa tanestok porin nanpouij iuan toTekotsin. Xiksentokakan xinemikan itech tanex,
9 porin nejon tanex tepaleuia maj se yolkuali itech nochi, maj se yolmelauak uan maj se melaujkanemi.
10 Nochipa xikyekitakan ox tein nankichiuaj kiyolpaktia toTekotsin
11 uan amo xiksentokakan xikchiujtokan tein amo tapaleuia tein poui kampa tayouayan, ta okachi kuali xiknextikan ke nejon amo kuali yetok.
12 Porin tepinaujtij hasta ika se tajtos tein yejuan kiichtakachiuaj.
13 Tanex kitauilia tein amo kuali uan ijkon tein amo kuali monextia.
14 Yejua ika moijtoua: “Xiijsa,* tejua akin tikochtok uan oksepa xinemi,* uan Cristo motech tauis”.
15 Yejua ika semi ximoyekpiakan para amo nanentinemiskej kemej akin amo kuatamatij, ta kemej akin tamattokej,
16 kuali xikuikan namotiempo,* porin itech nejin tonalmej okachi mochiua tein amo kuali.
17 Yejua ika, xiyektanemilikanya uan xikajsikamatikan toni kineki Jehová.*
18 Uan no, amo xitauantinemikan,* porin nejon kichiua maj se eliuisti; okachi kuali xiksentokakan xiktemokan nochipa nankipiaskej ichikaualis Dios.
19 Keman namoyolchikauaskej xikuikan salmos, xikueyitalikan Dios uan xikuikan tatsotson tein ika nantaueyichiuaj. Xikueyichiuakan Jehová* ika tatsotson namoyolijtik,
20 uan nochipa xiktasojkamatilikan nochi toDios uan toTajtsin itokaykopa toTekotsin Jesucristo.
21 Ximokauakan maj namechixyekanakan porin nankimojkatokaj Cristo.
22 Maj siuatsitsin mokauakan maj kinixyekana inintakauj kemej mokauaj maj kinixyekana toTekotsin.
23 Porin takat kiixyekana* isiuatsin ijkon kemej Cristo taixyekana itech nechikol. Uan nechikol kemej yeskia inakayo tein yejua kimakixtij.
24 Tein melauj, ijkon kemej nechikol mokaua maj Cristo kiixyekana, siuamej no moneki mokauaskej maj inintakauj kinixyekana itech nochi.
25 Takamej, xiksentokakan xikintasojtakan namosiuauan, ijkon kemej Cristo no kitasojtak nechikol uan ika motemakak
26 para maj chipauak iixpan Dios. Yejua kichipauak ika itajtol, kemej yeskia kichipauaskia ika at,
27 para maj nechikol kualtsin moita iixpan, maj amo tsojkuiltik nion maj tsotsoltik nion maj kipia se taman kemej nejon, ta maj chipauak uan maj amo kipia nion teyi tein amo kuali.
28 No ijkon, takamej moneki kintasojtaskej ininsiuauan ijkon kemej yejuan motasojtaj. Takat akin kitasojta isiuatsin, yejua no motasojta,
29 porin amo akin kitauelita inakayo, ta motamaka uan kuali moyekpia, ijkon kemej Cristo kichiua iuan nechikol,
30 porin tipouij itech inakayo.
31 “Yejua ika, takat kikauas itat uan inan, nemis* iuan isiuatsin uan nejon omen mochiuaskej sayoj se”.
32 Nejin tein Dios amo kitematiltijtoya* semi ueyi. Axkan ika nitajtojtok Cristo uan nechikol.
33 Sayoj ke, nansejsemej moneki nankitasojtaskej namosiuatsin ijkon kemej namejuan namotasojtaj. Uan siuatsin moneki kitakachiuas* itakatsin ika nochi iyolo.
Tajtolmelaualismej
^ Oso xa “namechtasojtak”.
^ Oso xa “namoka”.
^ Tajtol griego, pornéia. Xikonita auilnemilis.
^ Oso “xijxikuiyot”.
^ Xikonita auilnemilis.
^ Oso “xijxikuin”.
^ Oso “tiotsitsin”.
^ Oso “amo iniuan ximonelokan”.
^ Oso “Xitachia”, “Xiixpetani”.
^ Itech griego, “ximoajokui”.
^ Oso “amo xitonalpolokan”. Itech griego, “xikouakan tiempo tein ixyetok”.
^ Itech griego, “amo ximouintikan ika vino”.
^ Itech griego, “itsontekon”.
^ Oso “mosentilis”. Tajtol griego kijtosneki pepechiujtos.
^ Xikonita tein Dios amo kitematiltijtoya.
^ Oso “kipoujkaitas”.
