Juan 13:1-38
13 Uan achto ke mochiuaskia iluit tein monotsa Pascua, Jesús kimatia ke ejkokaya hora keman yaskia de nikan taltikpak uan mokepaskia iuan iTajtsin. Yejua semi kintasojtak imomachtijkauan akin yetoyaj nikan taltikpak, uan kisentokak kintasojtak hasta keman momikilij.
2 Uel hora takuajtoyaj nejon youak uan Amokuali kikalakijkaya itech iyolo Judas maj kinemili kitemaktis Jesús. Nejin Judas katka ikoneuj Simón Iscariote.
3 Jesús kimatia ke toTajtsin kimaktilijka nochi uan ke ualeuak imako Dios, uan ke yaya mokepati iuan. Yejua ika,
4 moketsak, kitalij tanakastan ipantaken, kikuik se tasal tein ika tauajuatsaj uan motajkoilpilij.*
5 Kipantekak at itech se ueyi kaxit uan peuak kinmetspajpaka imomachtijkauan uan kinmetsuajuatsa ika nejon tasal tein motajkoilpilijka.
6 Keman ajsik iuan Simón Pedro, yejua kitajtanij:* “NoTekotsin, ¿tejua tinechmetspajpakati?”.
7 Jesús kinankilij: “Axkan amo tikajsikamati tein nikchiujtok, sayoj ke okachi satepan tikajsikamatis”.
8 Pedro kiluij: “Tejua amo keman tinechmetspajpakas”. Uan Jesús kinankilij: “Komo amo nimitsmetspajpaka amo uelis tipouis nouan”.
9 Simón Pedro kiluij: “NoTekotsin, komo ijkon, amo sayoj xinechmetspajpaka, ta no xinechmapajpaka uan xinechkuapajpaka”.
10 Jesús kinankilij: “Akin maltijya,* chipauakya uan sayoj moneki mometspajpakas. Uan namejuan nanchipaujkej, sayoj ke amo nanochin”.
11 Porin yejua kimatia akoni kitemaktiskia. Yejua ika kijtoj “Amo nanochin nanchipaujkej”.
12 Keman kinmetspajpakak nochin, motalilij ipantaken, oksepa motalij kampa takuajtoyaj uan kiniluij: “¿Nankimatij keyej namechmetspajpakak?
13 Namejuan nanechiluiaj Tamachtijkej uan toTekotsin, uan melauak tein nankijtouaj.
14 Yejua ika, komo nejua namoTekotsin uan namoTamachtijkauj, uan namechmetspajpakak, namejuan no moneki namometspajpakaskej se iuan okse.
15 Porin ijkon kemej nejua nikchiuak, no ijkon xikchiuakan.
16 Yekmelauj namechyekiluia ke takeual amo okachi ueyichiujkej ke iteko, nion akin kititankej okachi ueyichiujkej ke akin kititanik.
17 Axkan ke nankimatij nejin, nanyolpakiskej komo nankichiuaj.
18 Tein nikijtojtok amo para nanochin; nikinixmati akin nikinijitak.* Sayoj ke nejin panok para maj mochiuani nejin tein kijtoua Tajkuilolamatsin: ‘Akin nouan takuajtoya nechixnamikik’.
19 Axkan namechiluia nejin, achto ke mochiuas, uan ijkon keman mochiuas, namejuan nankimatiskej ke nejon tajkuilol noka tajtojtok.
20 Yekmelauj namechyekiluia ke akin kiselia akin nejua niktitanis, no nechselia nejua, uan akin nechselia nejua no kiselia akin nechualtitanik”.
21 Keman kitamiijtoj nejin, Jesús peuak yoltajyouia uan kijtoj: “Yekmelauj namechyekiluia ke nansemej nechtemaktiti”.
22 Imomachtijkauan sayoj mosenixitakej porin amo kimatiaj akoni ika tajtojtoya.
23 Semej imomachtijkauan, akin Jesús kitasojtaya, takuajtoya inakastan* Jesús.
24 Yejua ika Simón Pedro kiixnotsak uan kitajtanij: “¿Akoni ika tajtojtok?”.
25 Uan yejua monetechoj iyolixko Jesús uan kitajtanij: “NoTekotsin, ¿akoni ika titajtojtok?”.
26 Jesús tanankilij: “Yejua akin nikmakati nejin pantsin tein nikajakiti”. Uan kiajakij pantsin uan kimakak Judas ikoneuj Simón Iscariote.
27 Satepan ke Judas kikuik nejon pantsin, Satanás itech kalakik. Uan Jesús kiluij: “Xiktamichiujtiuetsiti tein tikpeualtij”.
28 Sayoj ke, nion semej akin iuan takuajtoyaj kimatia keyej kiluijka nejon.
29 Tein melauj, sekin kinemiliayaj ke kemej Judas kipiaya kaxontsin kampa kipantaliayaj tomin, Jesús kiluijtoya “Xikoua tein moneki para iluit”, oso xa maj kinmakani tepitsin tomin pobres.
30 Yejua ika, keman kikuik nejon pantsin, kisak de ompa. Nejon hora youakya katka.
31 Keman Judas amo yetoyaok, Jesús kijtoj: “Axkan Dios nechueyitaliti nejua akin niyolik kemej takat uan notechkopa nochin kiueyitaliskej Dios.
32 Dios nimantsin nechueyitaliti para maj iuan nieto.
33 Nokoneuantsitsin, namouan nietoti seki tonalmejok. Nanechtemoskej; sayoj ke tein nikiniluij judíos, axkan no namechiluia namejuan: ‘Amo uelis nanualaskej kampa nejua niouj’.
34 Namechmaka se yankuik tanauatil: ximotasojtakan se iuan okse; ijkon kemej nejua namechtasojta, namejuan no ximotasojtakan se iuan okse.
35 Ijkon nochin kimatiskej ke namejuan nannomomachtijkauan: komo namotasojtaj se iuan okse”.
36 Simón Pedro kitajtanij: “NoTekotsin, ¿kani tiouj?”. Jesús kinankilij: “Kampa niouj amo uelis tinechtojtokas axkan, sayoj ke tinechtojtokas satepan”.
37 Pedro kiluij: “NoTekotsin, ¿keyej amo uelis nimitstojtokas axkan? Nejua moka nimikis”.
38 Jesús kinankilij: “¿Tikijtoua ke noka timikis? Yekmelauj nimitsyekiluia ke amo tsajtsis se pio* hasta ke expa tikijtos ke amo tinechixmati”.
Tajtolmelaualismej
^ Oso “motajkotsikolij”.
^ Oso “kitajtoltij”.
^ Oso “mopakakya”.
^ Oso “nikinixpejpenak”.
^ Itech griego, “monakasikatekak iyolixko”.
^ Oso “kaxtil”.
