Niyolik itech xolal Mante, se xolal kampa takualtsinkan tein moajsi ompa Tamaulipas (México). Miakej akin ompa nemij kuali teseliaj uan kiuelitaj kitemakaskej teisa. Sayoj ke, seki olochmej akin kichiuaj tein amo kuali kichiuanij maj ompa semi tamouililpan.

Notatuan kipiakej naui ininkoneuan, nejua niojpatika. Notatuan nechauijkej itech tiopan Católica uan hasta nipouik iniuan akin mokuikatiayaj ompa. Niknekia nikchiuas tein Dios kineki porin nimouia maj nechtatsakuiltiani uan maj nitajyouijto nochipa itech miktan.

Keman nikpiaya makuil xiuit, nopopaj techkauak. Nejon semi nechyolkokoj uan semi niktemouaya. Tinochin tiktasojtayaj, yejua ika amo uelia nikajsikamatia keyej techkauak. Nejon kichiuak maj nomomaj tekiti miak horas uan ijkon ueliskia techixpanoltis.

Kemej amo akin nechitaya amo niyayaok kaltamachtiloyan uan peuak nimosentilia iniuan telpochmej akin okachi uejueykej. Iniuan peuak nikui amo kuali tajtolmej, peuak nitachichina, nitachteki uan nitateuia. Kemej nikuelitaya maj oksekin nechtakamatikan, no nimomachtij boxeo, lucha libre, artes marciales uan hasta keniuj nikuis pistola. Nikatka se telpoch akin tel tateuiaya. Miakpa, timotatojtoponiliayaj iniuan oksekin uan miakpa nechkauayaj itech ojti nieskistoya porin kinemiliayaj ke nimomikilijkaya. ¡Nomomaj semi moyolkokouaya keman ijkon nechitaya uan monekia nechuikas kaltapajtiloyan!

Keman nikpiaya 16 xiujmej, techkalpanoto Jorge se akin kuali iuan nimouikaya keman katka ninojnel. Mochiujka itaixpantijkauj Jiova uan kinekia techiluis teisa tein motelnekia. Techmelauilij ika Biblia tein kineltoka. Nejua amo keman nikixtajtoltijtoya uan nikteluelitak nikmatis itokay Dios uan tein kiixtalijtok kichiuas. Jorge techiluij ox tiknekiaj timomachtiskej Biblia tinochin kemej kalyetouanij uan tikiluijkej ke kemaj.

Nitelyolseuik keman nikmatik ke Biblia amo ika tajtoua miktan (Salmo 146:4; Eclesiastés 9:5). Amo keman nikmouilijok Dios uan peuak nikita  kemej se tePopaj tetasojtakej, akin kineki maj kuali nemikan ikoneuan.

Ijkon kemej nimomachtijtiaya Biblia, nikitak ke monekia nikpatas nonemilis. Monekia niknextis okachi yolyemanilis uan nimotsakuilis amo niman nikualanis. Semi nechpaleuij tein tanejmachtia 1 Corintios 15:33, kampa kijtoua maj amo timouikakan iniuan akin kichiuaj tein amo kuali porin no ijkon timonejnemiltiskej. Nikajsikamatik ke komo niknekia nikpatas nonemilis, monekia amo nimouikasok iniuan akin kichiuayaj tein amo kuali. Uan ijkon nikchiuak. Peuak nimouika iniuan akin pouiaj itech ininnechikol itaixpantijkauan Jiova, akin kiyektaliaj ininkuejmoluan ika yolseuilis, ijkon kemej kijtoua Biblia.

Okse tajkuilol tein no nechyololinij yejua Romanos 12:17-19 kampa kijtoua: “Uan keme aksame namechchiuiliaj tensa ten amo kuali, ijkuakon namejuan amo no ijkon xikinixnamikikan. [...] Ximofuerzajuijtiyakan [...] nannentinemiske ika yolseuilis uan ika yolyemanalis iuan nochi taltikpakuani. Notasojikniuan, namejuan ma amo ximomakuepakan. [...] Uan Totekotsin kijtoa ijkuin: ‘Nejuatsin nechnamiki nikintatsakuiltis in taltikpakuani’”. Nechpaleuij maj nikita ke Jiova kitamis teikamauiltilis kemej kiitas ke okachi kuali uan keman kinamikis. Uan yolik, nikaujtiyajki tateuilis.

Amo keman nikelkauas tein nechpanok se youak ijkuak nimokepaya nochan. Seki telpochmej nechixnamikkej. Oloch kampa achto nipouia uan nejon telpochmej moixnamikiaj. Akin kinixyekanaya nechmaak nopanko uan nechtsajtsilij: “¡Ximopaleui!”. Ijkuak, nikchiuak se netataujtil uan niktajtanij Jiova maj nechpaleui maj amo niknankili. Niknekia nimopaleuis, sayoj ke okachi kuali nicholoj. Mostika, niknamik akin kinixyekanaya nejon oloch, sayoj ke ijkuak iselti yaya. Nitelyolkualanik iuan, niknekia nimomakepas. Oksepa ichtaka niktajtanij Jiova maj nechpaleui maj nimotsakuili. Nikmoujkaitak keman telpoch motokij uan nechiluij: “Xinechtapojpolui tein nikchiuak tayouak. Tein melauj nikuelitaskia nimochiuas kemej tejua. Nikneki nimomachtis Biblia”. ¡Semi kuali ke uelik niktsakuilij nokualanyo! Yejua ika, no peuak momachtia Biblia.

Tetayokoltij nikijtos ke nochankauan amo kisentokakejok momachtijkej Biblia, sayoj ke nejua nikixtalijkaya ke niksentokaskia uan ke nion akin uan nion teyi ueliskia nechtsakuilis. Nikmatia ke nimoajsis iniuan akin kitekitiliaj Dios, nechpaleuiskia maj amo nechtayokolti nochi tein nikpanoka uan maj nikpia yekmelauj nokalyetouanij. Niksentokak nikpatak nonemilis uan nimoauij kemej itaixpantijkauj Jiova itech xiuit 1991.

Achto nikchiuaya maj oksekin nechtakamatikan, nitateuiaya uan nikualantinemia, sayoj ke iTajtol Dios senkis nechpatak. Axkan nikinixmatiltia kuali tanauatilmej nochin akin kinekij kikakiskej tein kijtoua Biblia. Nikpiani tatiochiualis niktekitilis Dios nochi notonaluan uan ijkon nikchiuani panoua veintitrés xiujmej.

Seki xiujmej, nitapaleuij itech sucursal tein kipiaj itaixpantijkauan Jiova itech altepet México. Ompa nikixmatik Claudia, se ichpoch tel tekitikej akin iuan nimonamiktij itech xiuit 1999. Nochipa niktasojkamatilia Jiova porin nechmakak se nonamik akin semi nechpaleuia.

Seki xiujmej titapaleuijkej itech se nechikol ika tajtol señas mexicana uan tikinpaleuijkej sekin akin amo uelij takakij maj kiixmatikan Jiova. Satepan, techiluijkej maj tikteixmatiltitij tein Biblia kijtoua ompa Belice. Itech nejin altepet tinemij ika amo miak taman, sayoj ke tikpiaj nochi tein moneki uan tiyolpakij. ¡Nejin nemilis amo tikpataskiaj ika nion teyi!

Satepan, nomomaj oksepa peuak momachtia Biblia uan moauij. Nokniuj akin tayekana, inamik uan ikoneuan no itaixpantijkauan Jiova. Hasta sekin akin achto iniuan nimouikaya akin nikinnojnotsak ika Biblia, axkan kitekitiliaj Dios.

Tetayokoltij nikijtos ke seki nochankauan momikilijkej porin tel tateuiayaj. Senkis nikmati ke no ijkon nechpanoskia komo amo nikpataskia nonemilis. Niktasojkamatilia Jiova porin nechkauak maj nikixmati uan maj nipoui itech inechikol uan no porin ika netasojtalis uan nejmachkayot nechmachtij maj ninemi kemej tayolmajxitia Biblia.