Mateo 20:1-34
20 ”Porin iTaixyekanalis Dios tein moajsi iluikak tamati kemej se takat akin iaxka se tal, akin semi kualkan kintakeuato akin kitekiskiaj uvas italpan.
2 Keman motenkauak iniuan tekitinij ke itech se tonaltekit kintaxtauiskia se denario,* kintitanik italpan.
3 Kemej chiknaui hora kualkan* oksepa yajki plaza uan kinitak oksekin akin ompa ijkatoyaj uan amo kipiayaj tekit.
4 Yejua kiniluij: ‘Namejuan no xiktekitij uvas, uan namechtaxtauis kemej moneki’.
5 Uan yejuan yajkej. Takat oksepa kisak kemej nepantaj,* uan no kemej eyi hora tiotak,* uan kintakeuato oksekin.
6 Uan no kisak kemej makuil hora tiotak* uan kinajsik oksekin akin ompa ijkatoyaj porin amo tekititoj, uan kintajtanij:* ‘¿Keyej nansentonaltijkej nikan?’.
7 Yejuan kinankilijkej: ‘Porin amo akin techtakeuak’. Yejua kiniluij: ‘Namejuan no xiktekitij uvas’.
8 ”Keman tapoyauik, akin iaxka tal kiluij akin kinyekana tekitinij: ‘Xikinnotsa tekitinij uan xikintaxtaui. Achto xikintaxtaui akin yekin kalakkej uan satepan akin kualkan kalakkej’.
9 Keman ualajkej akin kalakkej kemej makuil hora tiotak, kinmakakej sejse denario.*
10 Yejua ika akin kualkan kalakkej kichiayaj maj kintaxtauikan okachi, sayoj ke yejuan no kintaxtauijkej sejse denario.*
11 Yejua ika, peuak amo kuali ika tajtouaj akin iaxka tal
12 uan kiluijkej: ‘¡Nejin akin yekin ejkokej sayoj tekitikej se hora uan tejua tikintaxtauij kemej tejuan, maski tejuan titekitikej nochin tonal uan titonaltatakej!’.
13 Sayoj ke yejua kinankilij semej: ‘Tejuatsin, nejua amo teyi nimitschiuilijtok. Timotenkaujkej ke nimitstaxtauiskia se denario,* ¿melauj?
14 Xikui motomin uan xiouj. No nikneki niktaxtauis akin yekin kalakik ijkon kemej tejua nimitstaxtauij.
15 ¿Amo uelis nikchiuas tein niknekis ika tein noaxka? ¿Oso tinechnexikoluia porin niyolkuali?’.*
16 Ijkon, akin yetokej taikampa yetoskej taixpan uan akin yetokej taixpan yetoskej taikampa”.
17 Keman pankistiayaj Jerusalén, Jesús kinuikak okseko 12 imomachtijkauan uan kiniluijtiaya itech ojti:
18 “Xikitakan, tipankistokej Jerusalén, uan ompa nechtemaktitij nejua akin niyolik kemej takat ininmako uejueyi tiopixkamej uan tajkuilouanij. Yejuan kiixtaliskej maj nechmiktikan
19 uan nechtemaktiskej ininmako akin amo judíos, akin nechpijpinaujtiskej, nechuijuitekiskej uan nechkoujpampiloskej; uan eyi tonal satepan oksepa ninemis”.*
20 Uan isiuatsin Zebedeo kiajsito Jesús iniuan ome ikoneuan uan motankuaketsak iixpan* para kitajtanis teisa.
21 Jesús kitajtanij: “¿Toni tikneki?”. Siuatsin kinankilij: “Xitanauati maj nejin ome nokoneuan motalikan mouan keman titaixyekantosya, se moyekmakopa uan okse moopochmakopa”.
22 Jesús kijtoj: “Namejuan amo nankimatij tein nantajtantokej. ¿Uelis nantayiskej tein amo uejkaua nitayiti?”. Yejuan kinankilijkej: “Kemaj”.
23 Yejua kiniluij: “Kemaj, namejuan nantayiskej, sayoj ke amo nejua nikijtoua akonimej motaliskej noyekmakopa uan noopochmakopa. Ompa motaliskej akin noTajtsin kiixtalis”.
24 Keman oksekin majtakti kimatkej nejin, kinkualantij tein kichiujkej nejon ome iknimej.
25 Sayoj ke Jesús kinsentilij nochin uan kiniluij: “Nankimatij ke tekiuanij itech altepemej taixyekanaj kemej kinekij, uan uejueyi chiuanimej kipiaj tanauatil uan kichiuaj maj kintakamatikan.
26 Namejuan amo ijkon xikchiuakan, ta akin kinekis yeski ueyichiujkej moneki kintekitilis oksekin,
27 uan akin kinekis namechyekanas moneki tekitis kemej takeual.
28 Yejua nejon tein kichiuak akin yolik kemej takat. Yejua amo ualaj para maj kitekitilikan, ta para kintekitilis oksekin uan kitemakas inemilis* uan ijkon taxtauas para kinmakixtis miakej”.
29 Keman kistiayaj Jericó, tel miakej kitojtokakej.
30 Uan ome takamej akin amo tachiayaj tokotsyetoyaj ojtenoj uan kikakkej ke Jesús ompaka panotoya uan kitsajtsilijkej: “¡ToTekotsin, iKoneuj David, xitechikneli!”.
31 Akin ompa yetoyaj kintakaualtijkej uan kiniluijkej maj amo tsajtsitokan, sayoj ke yejuan okachi chikauak kitsajtsiliayaj: “¡ToTekotsin, iKoneuj David! ¡Xitechikneli!”.
32 Yejua ika Jesús moketsak, kinnotsak uan kintajtanij: “¿Toni nankinekij maj namechchiuili?”.
33 Yejuan kinankilijkej: “ToTekotsin, maj oksepa titachiakan”.
34 Uan kemej Jesús semi kinyoliknelij, kinixtololojmachilij. Nimantsin oksepa tachiakej, uan kitojtokateujkej.
Tajtolmelaualismej
^ Itech griego, “expatika hora”.
^ Itech griego, “chikuasentika hora”.
^ Itech griego, “chiknauitika hora”.
^ Itech griego, “majtaktiosetika hora”.
^ Oso “kintajtoltij”.
^ Oso “nikualtakat”.
^ Itech griego, “nimoajokuis”.
^ Oso “kitakachiuak”.
