Mateo 16:1-28
16 Fariseos uan saduceos kiajsitoj ompa, uan kemej kitemouayaj maj mopolo, kitajtanijkej maj kichiua se milagro itokaykopa Dios.
2 Yejua kinnankilij: “Keman tiotaki namejuan nankijtouaj ‘Amo kiouis, porin kualtsin tachichileujtok’.
3 Uan kualkampa nankijtouaj ‘Axkan taseseyas uan kioujtos, porin tachichileujtok sayoj ke tamixtentok’. Nankimatij nankiixejekoskej toni panoti keman nankiitaj iluikak, sayoj ke amo nankiajsikamatij toni kijtosneki tein axkan mochiujtok.
4 Namejuan amo nankitakamatij Dios uan amo nanyolkualmej, nochipa nankitemojtinemij nankiitaskej se milagro. Sayoj ke amo nankiitaskej nion se, ta sayoj milagro tein mochiuak iuan Jonás”. Uan kinkaujteuak uan yajki.
5 Uan analpanokej oksekopa, sayoj ke imomachtijkauan kielkaujkaj kiuikaskej pantsin.
6 Jesús kiniluij: “Kuali xiixtajtapotokan uan ximoyekpiakan maj amo namechmajmaua ininlevadura fariseos uan saduceos”.
7 Yejua ika peujkej moiluiaj: “Amo tikualkuikej pantsin”.
8 Kemej Jesús kimatik tein moiluijtoyaj, kiniluij: “Takamej akin amo semi nantakuaujtamatij, ¿keyej namoiluijtokej ke amo nankipiaj pantsin?
9 ¿Ayamo nankiajsikamatij? ¿Amo nankielnamikij makuil pantsin tein ika takuajkej makuil mil takamej uan kanachi chikiuit nankisentilijkej?
10 ¿Uan nankielkaujkejya chikome pantsin tein ika takuajkej naui mil takamej uan kanachi uejueyi chikiuit nankisentilijkej?
11 ¿Keyej amo nankiajsikamatkej ke amo ika namechnojnotstoya pantsin? Nejua namechiluij ximoyekpiakan maj amo namechmajmaua ininlevadura fariseos uan saduceos”.
12 Ijkuak, kiajsikamatkej ke amo kiniluijtoya maj moyekpiakan ika levadura tein kitaliliaj pantsin, ta ika tein tamachtiayaj fariseos uan saduceos.
13 Keman ajsik itech xolalmej tein pouij Cesarea-Filipo, Jesús kintajtanij* imomachtijkauan: “¿Keniuj nechixmatij nejua akin niyolik kemej takat?”.
14 Yejuan kinankilijkej: “Sekin kijtouaj ke tiJuan akin teauia. Oksekin, ke tiElías. Uan oksekin, ke tiJeremías oso okse tanauatijkej”.*
15 Yejua kiniluij: “Uan para namejuan, ¿niakoni?”.
16 Simón Pedro kinankilij: “Tejua tiCristo, iKoneuj Dios akin nochipa yoltok”.
17 Uan Jesús kinankilij: “Titatiochiual tejua Simón ikoneuj Jonás, porin amo akin nikan taltikpak mitsmatiltij nejon, ta noTajtsin akin yetok ne iluikak.
18 No nimitsiluia: tejua tiPedro, uan itech nejin ueyi tet nikchijchiuas nonechikol, uan mikilis* amo kitanis.*
19 Nejua nimitsmakas llaves tein ika tatapoui itech iTaixyekanalis Dios tein moajsi iluikak. Tein yeski taman tein tikilpis* nikan taltikpak, no ilpitosya* ne iluikak, uan tein yeski taman tein tiktojtomas nikan taltikpak, no tojtontosya ne iluikak”.
20 Uan kinnajnauatij imomachtijkauan maj amo akin kiluianij ke yejua katka Cristo.
21 Ijkuak, Jesús peuak kinmelauilia imomachtijkauan ke monekia yas Jerusalén uan kijyouis miak taman ininmako taixyekananij judíos, uejueyi tiopixkamej uan tajkuilouanij. Uan no kinmelauilij ke monekia kimiktiskej uan eyi tonal satepan oksepa nemis.*
22 Pedro kiuikak okseko uan peuak kichikaujkailuia: “¡NoTekotsin, amo ijkon xikijto! Nejon amo keman mitspanos”.
23 Sayoj ke yejua moikankepak uan kiluij: “¡Ximijkuani Satanás! Sayoj tinechtsajtsakuilia, porin amo titanemilijtok kemej Dios tanemilia, ta kemej tanemiliaj nikan taltikpak”.
24 Uan Jesús kiniluij imomachtijkauan: “Komo aksa* kineki nechtojtokas, maj moixtopeua,* maj taxiko keman tajyouis* uan maj nochipa nechtojtoka.
25 Porin akin kinekis momakixtis,* momikilis, sayoj ke akin momikilis porin notech takuaujtamati, oksepa nemis.
26 Tein melauj, komo aksa motanilia nochi tein onkak nikan taltikpak sayoj ke momikilia, ¿keniuj kipaleuia nejon? ¿Oso toni uelis kitemakas para amo momikilis?
27 Porin nejua akin niyolik kemej takat niualas ika iueyi tanauatil noTajtsin iniuan noangeluan, uan ijkuak nikintatsakuiltis akin kichiuaj tein amo kuali uan nikintatiochiuis akin kichiuaj tein kuali.
28 Namechyekiluia ke sekin akin nikan nanyetokej amo namikiskej, ta achto nanechitaskej niualajtok itech noTaixyekanalis”.
Tajtolmelaualismej
^ Oso “kintajtoltij”.
^ Xikonita tanauatijkej.
^ Itech griego, “ikalakyan Hades”, kampa moseuijtokej mikemej. Xikonita miketekoch.
^ Nejin kijtosneki ke amo kitaniskej nechikol.
^ Oso “tiktsikos”.
^ Oso “tsikaujtosya”.
^ Itech griego, “moajokuis”.
^ Oso “akin”, “akaj”.
^ Oso “maj amo nemiok para yejua”.
^ Oso “maj kikui kouit kampa tetajyouiltiaj”. Xikonita kouit kampa tetajyouiltiaj.
