Lucas 11:1-54
-
Keniuj se motataujtis (1-13)
-
Padrenuestro: kemej se motataujtis (2-4)
-
-
Dios kipaleuia maj kinkalankixti amokuali ejekamej (14-23)
-
Keman se amokuali ejekat oksepa itech kalaki aksa (24-26)
-
Akin yekmelauj yolpakij (27, 28)
-
“Milagro tein mochiuak iuan Jonás” (29-32)
-
“Moixtololouan kemej yeskia se tanex” (33-36)
-
Teikneltijkej fariseos taixkajkayauanij (37-54)
11 Se tonal, keman kitamichiuak netataujtil, semej imomachtijkauan kiluij: “NoTekotsin, xitechnextili keniuj timotataujtiskej, ijkon kemej Juan kinnextilij itatojtokakauan”.
2 Uan yejua kiniluij: “Keman namotataujtiskej, xikijtokan: ‘ToTajtsin, maj nochin kiitakan ke motokay semi ueyi.* Maj techixyekanaki moTaixyekanalis.
3 Xitechmaka totaxkaltsin ijkon kemej monekis sejse tonal.
4 Xitechintapojpoluili totajtakoluan, porin tejuan no tikintapojpoluiaj nochin akin techtauikiliaj. Uan amo xikaua maj timotajtakolmakakan’”.
5 Uan no kiniluij: “Maj tiknemilikan ke nansemej nankipiaj se namotasojikniuj uan nankiitatij tajkoyouan uan nankiluiaj: ‘Notasojikniuj, xinechtaneujti eyi pantsin,
6 porin yekin ejkok nochan se notasojikniuj akin uejka ualeuak uan amo nikpia nion teyi tein nikmakas’.
7 Uan yejua ualtanankilia kalijtik: ‘Amo xinechkuejmolook. Tatsaktokya ika llave uan nokoneuan uan nejua tiuetstokejya. Amo ueli nimeuaok para nimitsmakas teisa’.
8 Namechiluia: maski amo meuas uan namechmakas teisa porin namotasojikniuj, kemaj meuas uan namechmakas nochi tein namechpolos porin nankisentokaj namoixeuiaj nantajtanij.
9 Yejua ika namechiluia: xiksentokakan xitajtanikan uan namechmakaskej, xiksentokakan xiktemokan uan nankiajsiskej, xiksentokakan xitakakalatsakan uan namechtatapouiliskej.
10 Porin akin tajtani kimakaj, akin kitemoua kiajsi, uan akin takakalatsa kitatapouiliaj.
11 ¿Nankimakaskiaj namokonetsin se kouat komo namechtajtania se pescado?*
12 Oso komo namechtajtania se piotet, ¿nankimakaskiaj se alacrán?
13 Yejua ika, komo namejuan maski nantajtakolejkej nankimatij nankintayokoliskej tein kuali namokoneuan, ¡uelis senkis nankiyekmatiskej ke toTajtsin akin yetok ne iluikak kinmakas ichikaualis akin kitajtaniaj!”.
14 Satepan, kikalankixtij se amokuali ejekat tein kipiaya se takat. Nejon amokuali ejekat kichiujka maj amo ueli tajto. Keman amokuali ejekat kalankisak, takat uelik tajtoj uan nochin kimojkaitakej.
15 Sayoj ke sekin kijtojkej: “Kinkalankixtia amokuali ejekamej porin kipaleuia Amokuali Belcebú,* akin kinixyekana amokuali ejekamej”.
16 Uan oksekin, kemej kitemouayaj maj kinexti ke Dios kiualtitanka, peujkej kiluiaj maj kichiua se milagro itokaykopa Dios.
17 Kemej Jesús kimatia tein kinemilijtoyaj, yejua kiniluij: “Komo itech se altepet moteuiaj uan moxexelouaj, ixpoliuiskej, uan komo kalyetonij moteuiaj uan moxexelouaj, amo uelis senyetoskej.
18 No ijkon, komo Satanás iselti moixnamiki amo kisentokasok taixyekanas. Porin namejuan nankijtouaj ke nejua nikinkalankixtia amokuali ejekamej porin Amokuali Belcebú nechpaleuia.
19 Komo nejua nikinkalankixtia amokuali ejekamej porin Amokuali Belcebú nechpaleuia, ¿akoni kinpaleuia namotatojtokakauan* maj kinkalankixtikan amokuali ejekamej? Yejua ika yejuan kinextiskej ke tein nankijtouaj amo kuali yetok.
20 Sayoj ke, komo Dios ika ichikaualis* nechpaleuia maj nikinkalankixti amokuali ejekamej, kijtosneki ke iTaixyekanalis Dios nikan yetokya uan amo nankimatij.
21 Keman se takat akin chikauak kiyekpia ichan ika miak teposmej, amo akin kitachtekis.
22 Sayoj ke keman se akin okachi chikauak ke yejua kiteuia uan kitani, kikuilia nochi teposmej tein ika mopaleuiaya uan kixejxeloua nochi tein kikuilij.
23 Akin amo nouan yetok, nechixnamiki, uan akin amo kinpaleuia oksekin maj nouan motokikan, kichiua maj mouejkatilikan.
24 ”Keman se amokuali ejekat kikaua se takat, panotiuj kampa tauaktok kitemojtiuj kani moseuis; sayoj ke kemej amo kiajsi, kijtoua: ‘Nimokepas nochan, kampa niualeuak’.
25 Uan keman ajsiti, kiita ke tachpanalaj uan takualtsinkan.
26 Uan youi uan kinkuiti okseki chikome amokuali ejekamej tein okachi amo yolkualmej ke yejua, satepan itech kalakij uan ompa nemij. Uan ijkon nejon takat okachi amo kuali moajsi ke achto”.
27 Keman yejua kijtojtoya nejin, se siuatsin akin yetoya iniuan akin ompa mosentilijkaj, chikauak kiluij: “¡Yolpaki siuatsin akin mitspiak uan mitschichitij!”.
28 Sayoj ke yejua kinankilij: “Amo, ta okachi kuali, ¡yolpakij akin kikakij itajtol Dios uan kichiuaj!”.
29 Keman miakej mosentilitoj kampa yetoya, yejua peuak kijtoua: “Namejuan amo nanyolkualmej. Nankitemouaj nankiitaskej se milagro, sayoj ke amo nankiitaskej nion se, ta sayoj milagro tein mochiuak iuan Jonás.
30 Porin ika tein Jonás kipanok uan kichiuak kinnextilij akin nemiaj Nínive ke Dios kititanka, no ijkon akin yolik kemej takat kinnextilis akin nemij axkan ke Dios kiualtitanik.
31 Uan itech Tonal keman Dios taixejekos,* siuat akin tekiuajtia ompa Saba* uan akin nemij axkan oksepa nemiskej,* uan nejon siuat kijtos ke moneki kintatsakuiltiskej. Porin yejua ualeuak kampa okachi uejka kikakiko Salomón, akin katka semi tamatkej. Sayoj ke xikitakan, nikan yetok se akin okachi tayekantok ke Salomón.
32 Itech nejon tonal, akin nemiaj Nínive uan akin nemij axkan oksepa nemiskej,* uan akin nemiaj Nínive kijtoskej ke moneki kintatsakuiltiskej akin nemij axkan. Porin yejuan moyolpatakej keman kikakkej tein Jonás kinmatiltij. Sayoj ke xikitakan, nikan yetok se akin okachi tayekantok ke Jonás.
33 Amo akin kixotaltia se candil uan kitatia* oso kipantsakua ika se chikiuit,* ta kitalia kampa kinketsaj candilmej para maj kintauili akin kalakiskej.
34 Moixtololouan kemej yeskia se tanex tein ika motauilia monakayo. Keman sayoj se taman tikita,* nochi monakayo petani. Sayoj ke, keman moixtololouan tenexikoluiaj,* nochi monakayo yetok tayouayan.
35 Yejua ika, kuali xikita maj tauijtook motanex.
36 Komo nochi monakayo petani, komo nion tepitsin yetok tayouayanijtik, nochi petanis, kemej keman se candil mitstauilia”.
37 Keman yejua kijtoj nejin, se fariseo kiyoleuak maj takuati. Uan yejua kalakik uan motalij.
38 Sayoj ke nejon fariseo kimojkaitak porin yejua amo momajtekiaya* achto ke takuas.
39 Yejua ika toTekotsin kiluij: “Xikita, namejuan nanfariseos nantamatij kemej se copa uan se plato tein sayoj kipanchipaujkej, sayoj ke ijtipitsotikej, porin sayoj nankinemilijtokej nantachtekiskej uan nankichiuaskej tein amo kuali.
40 ¡Semi amo nantanemiliaj! Akin kichijchiuak se inakayo, no kichijchiuak se iyolo, ¿melauj?
41 Yejua ika, okachi kuali xikinpaleuikan* pobres ika nochi namoyolo, uan xikitakan, komo nankichiuaj nejon, senkis nanyeskij nanchipaujkej.
42 Sayoj ke, ¡nanteikneltijkej fariseos, porin nankitemakaj* hierbabuena,* ruda uan nochi okseki xiujtsitsin,* sayoj ke amo nantetasojtaj kemej Dios nion nankichiuaj tein yejua kijtoua ke kuali yetok! Semi monekia nankitemakaskej nejin, sayoj ke no monekia nankisentokaskej nankichiuaskej tein iTanauatil Moisés kijtoua ke okachi moneki.
43 ¡Nanteikneltijkej fariseos, porin nankiuelitaj namotaliskej hasta taixpan* kampa taueyichiuaj judíos uan maj namechtajpalojtokan itech plaza!
44 ¡Nanteikneltijkej, porin nantamatij kemej nejon miketekochmej tein amo semi moitaj: nochin ompa panotinemij uan amo kimatij kani taksatokej!”.
45 Semej akin kuali kiixmatia iTanauatil Moisés kinankilij: “Tamachtijkej, ika tein tikijtoua no titechpinaujtia tejuan”.
46 Uan yejua kiluij: “¡Nanteikneltijkej no namejuan, akin kuali nankiixmatij iTanauatil Moisés, porin nankinmamaltiaj oksekin se tamamal tein amo ueli kixikouaj, sayoj ke namejuan amo nankioliniaj nion ika se namomajpil!
47 ”¡Nanteikneltijkej namejuan, porin nankinchijchiuiliaj miketekochmej tanauatianij,* sayoj ke namouejkaujtatuan kinmiktijkej!
48 Moyekita ke namejuan nankimatij tein kichiujkej namouejkaujtatuan uan nankiitaj ke kuali yetok, porin yejuan kinmiktijkej tanauatianij, sayoj ke namejuan nankichijchiuaj ininmiketekoch.
49 Yejua ika Dios, akin semi tamatkej, kijtoj: ‘Nejua nikintitanilis tanauatianij uan tatitanilmej, uan sekin kinmiktiskej uan sekin kintajyouiltiskej,
50 uan ijkon akin nemij axkan kinixtaualtiskej ininesyo nochin tanauatianij akin kinmiktijkej desde keman peuak yolij akin nemij nikan taltikpak,
51 desde iesyo Abel hasta iesyo Zacarías, akin kimiktijkej tatajko den altar uan templo’. Kemaj, namechiluia: kinixtaualtiskej akin nemij axkan.
52 ”¡Nanteikneltijkej namejuan akin kuali nankiixmatij iTanauatil Moisés, porin amo nankinkauaj oksekin maj kiixmatikan* Dios! ¡Namejuan amo nankalakkej uan akin kalaktokej nankintsajtsakuiliaj!”.
53 Keman kisak de ompa, tajkuilouanij uan fariseos semi kualantoyaj, yejua ika kiyoualotoj uan kitajtaniayaj miak taman para kikuejmoloskej,
54 kichixtoyaj* maj kijto teisa tein ika ueliskia kiteluiliskej.
Tajtolmelaualismej
^ Oso “ke motokay yektik”.
^ Oso “amichij”.
^ Oso “Beelzebub”. No ijkon kitokaytiaj Satanás.
^ Oso “namokoneuan”.
^ Itech griego, “imajpil”.
^ Xikonita Tonal keman Dios taixejekos.
^ Oso “Seba”. Itech griego, “siuat akin tekiuajtia tanikopa (ataujkopa, tauakalkopa)”.
^ Itech griego, “moajokuiskej”.
^ Itech griego, “moajokuiskej”.
^ Oso “chikiuit tein ika tatamachiuaj”.
^ Oso “kicholtia”.
^ Oso “Keman moixtololouan yektekitij”.
^ Nejin kijtosneki komo kitemouaj miak taman. Itech griego, “komo moixtololo amo kuali”.
^ Kijtosneki ke amo momapajpakaya kemej fariseos uan okseki judíos kiixtalijtoyaj.
^ Oso “xikintayokolikan teisa”.
^ Oso “menta”.
^ Oso “kiltsitsin”.
^ Oso “kampa okachi kualtsin”.
^ Xikonita tanauatijkej.
^ Oso “nankinkuiliaj oksekin llave tein ika uelis kiixmatiskej”.
^ Oso “kichatoyaj”.
