Lucas 22:1-71
-
Tiopixkamej kiitaj keniuj kimiktiskej Jesús (1-6)
-
Keman tachijchiuaj para Pascua (7-13)
-
ITakualis toTekotsin (14-20)
-
“Akin nechtemaktiti yetok nouan itech mesa” (21-23)
-
Motajtolteuiaj porin kijtouaj akoni okachi ueyichiujkej (24-27)
-
Jesús motenkaua ke imomachtijkauan taixyekanaskej (28-30)
-
Jesús kijtoua ke Pedro kijtos ke amo kiixmati (31-34)
-
Maj se kipia tein moneki; ome machetes (35-38)
-
Jesús motataujtia itech Olivojtepet (39-46)
-
Kikitskiaj (47-53)
-
Pedro kijtoua ke amo kiixmati (54-62)
-
Kikejkelouaj Jesús (63-65)
-
Kiuikaj ininixpan Uejueyi Tamelauanij (66-71)
22 Uan yaya mochiuati iluit keman kikuayaj pantsin tein amo kisamaualtiayaj,* tein monotsa Pascua.
2 Uan uejueyi tiopixkamej uan tajkuilouanij kitemojtoyaj keniuj kimiktiskej. Yejuan kinmouiliayaj akin ompa nemiaj.
3 Uan Satanás kalakik itech Judas Iscariote, akin katka semej 12 tatitanilmej.
4 Yejua kinnojnotsato uejueyi tiopixkamej uan tayekankatajpianij itech templo, kiniluito keniuj ueliskia kinmaktilis Jesús.
5 Yejuan semi kiuelitakej nejon uan motenkaujkej kimakaskej tomin.*
6 Yejua kijtoj ke kuali yetok, uan peuak kitemoua keniuj kinmaktilis keman amo miakej yetoskiaj.
7 Uan ejkok tonal keman kichiuaskiaj iluit keman kikuayaj pantsin tein amo kisamaualtiayaj,* keman monekia kimiktiskej tapialtsin itech Pascua.
8 Yejua ika Jesús kintitanik Pedro uan Juan, uan kiniluij: “Xiakan uan xikchijchiuatij Pascua”.
9 Yejuan kitajtanijkej:* “¿Kani tikneki maj tikchijchiuakan?”.
10 Yejua kiniluij: “Xikakikan, keman nanajsiskej Jerusalén, namechnamikikiuj se takat akin kiualkui se tsotsokol. Xiktojtokakan uan xikalakikan itech kali kampa kalakis.
11 Uan xikiluikan akin iaxka kali: ‘Tamachtijkej mitsiluia: “¿Kani yetok cuarto kampa uelis nikchiuas Pascua iniuan nomomachtijkauan?”’.
12 Uan nejon takat namechnextilis se ueyi cuarto tein moajsi ajko, tein kipia nochi tein moneki. Ompa xikchijchiuakan Pascua”.
13 Yejuan yajkej uan kiajsikej nochi ijkon kemej kiniluijka; uan tachijchiujkej para Pascua.
14 Yejua ika, keman ejkok hora, yejua motalij kampa yetoya mesa iniuan itatitaniluan.
15 Uan kiniluij: “Semi niknekia nitakuas namouan itech nejin Pascua achto ke nitajyouis...;
16 porin namechiluia ke amo nitakuasok namouan itech Pascua hasta maj nochi motamichiua itech iTaixyekanalis Dios”.
17 Uan keman kimakakej se copa, kitasojkamatilij Dios uan kiniluij: “Xitayikan uan ximopanoltilijtiakan,
18 porin namechiluia ke desde axkan amo keman nitayisok vino hasta maj taixyekanaki iTaixyekanalis Dios”.
19 Uan no kikuik se pantsin, kitasojkamatilij Dios, kitajtapanak, kinmajmakak uan kiniluij: “Nejin kiixnextia nonakayo, tein niktemakas para namechpaleuis. Xiksentokakan xikchiujtokan nejin uan ika xinechelnamikikan”.
20 Uan no, keman tamitakuajkej nejon tiotak, no kikuik copa. Uan kiniluij: “Nejin copa kiixnextia yankuik taman tein Dios motenkaua, tein peuas keman mimilauis noesyo para namechpaleuis.
21 ”Sayoj ke, xikitakan, akin nechtemaktiti yetok nouan itech mesa.
22 Porin tein melauj, nejua akin niyolik kemej takat nikchiujtok nochi tein ijkuiliujtok ke nechpanoskia. Sayoj ke, ¡teikneltij akin nechtemaktiti!”.
23 Yejua ika peujkej motajtaniaj akoni kichiuaskia nejon.
24 Uan no peujkej motajtolteuiaj imomachtijkauan porin kijtouayaj akoni moitaya ke okachi ueyichiujkej.
25 Sayoj ke yejua kiniluij: “Tekiuanij itech altepemej taixyekanaj kemej kinekij, uan akin kipiaj tanauatil tapaleuiaj para maj kinueyitalikan.
26 Sayoj ke namejuan amo ijkon xikchiuakan. Okachi kuali, akin ueyichiujkej, maj mochiua kemej akin okachi amo ueyi, uan akin taixyekana maj mochiua kemej akin tetekitilia.
27 Porin ¿akoni ueyichiujkej? ¿Akin takua oso akin kiualkui takual? ¿Melauj ke akin takua? Sayoj ke nejua nietok namouan kemej se akin kiualkui takual.
28 ”Sayoj ke, namejuan nouan nanyetokej itech nochi tein moneki nikpanos.
29 Uan nejua nimotenkaua namouan ke nantaixyekanaskej kemej tekiuanij ijkon kemej noTajtsin nouan motenkauak,
30 para nantakuaskej uan nantatayiskej itech nomesa itech noTaixyekanalis uan namotaliskej itech uejueyi sillas para nankiixtaliskej tein kinnamiki kiseliskej 12 uejueyi kalyetonij israelitas.
31 ”Simón, Simón, xikita ke Satanás tajtantok maj kikauakan maj namechtsetselo nanochin kemej trigo.
32 Sayoj ke nejua chikauak niktataujtij Dios maj mitspaleui para maj motakuaujtamatilis amo kaxani. Uan tejua, keman timokepas, xikinyolchikaua mokniuan”.
33 Uan yejua kiluij: “NoTekotsin, uelisya nechtsakuaskej mouan uan hasta nimikis mouan”.
34 Sayoj ke yejua kinankilij: “Pedro, nimitsiluia ke axkan amo tsajtsis se pio* hasta ke expa tikijtos ke amo tinechixmati”.
35 No kiniluij: “Keman namechtitanik, namechiluij amo xikuikakan tomin, nion namomorral nion namotekakuan, ¿uan melauj ke amo teyi namechpoloj?”. Yejuan kinankilijkej: “¡Amo!”.
36 Uan yejua kiniluij: “Sayoj ke axkan akin kipia tomin maj kiuika, uan no se imorral; uan akin amo kipia machete tein ojkan tenej,* maj kinamaka ipantaken uan maj kikoua se machete.
37 Porin namechiluia ke moneki nechpanos nejin tein ijkuiliujtok: ‘Kiitakej kemej se tajtakolchiujkej’.* Tein melauj, yejua nejin tein nechpanotok”.
38 Uan yejuan kiluijkej: “NoTekotsin, xikita, nikan yetokej ome machetes”.* Yejua kinnankilij: “Amo moneki okse”.
39 Keman kisak, yajki Olivojtepet kemej ipa kichiuaya, uan imomachtijkauan kitojtokakej.
40 Keman ajsikej ompa, kiniluij: “Ximotataujtijtokan para amo namotajtakolmakaskej”.
41 Uan kinkauak uan yajki tepitsin nepaka.* Motankuaketsak uan peuak motataujtia
42 uan kijtoua: “NoTajtsin, komo tikneki xinechajchiuili nejin copa. Sayoj ke maj amo mochiua tein nejua nikneki, ta tein tejua tikneki”.
43 Uan ualpantemok se ángel, monextij uan kiyolchikauak.
44 Sayoj ke, kemej semi yoltajyouijtoya kisentokak okachi chikauak motataujtia, uan ineton mokepak kemej esti tein panchachalakaya.*
45 Keman motamitataujtij, moketsak, yajki kampa yetoyaj imomachtijkauan uan kinajsito kojkochtoyaj, porin kemej semi tayokoxtoyaj tel sotaujtoyaj.
46 Kiniluij: “¿Keyej nankochtokej? Ximeuakan uan nochipa ximotataujtijtokan para amo namotajtakolmakaskej”.
47 Keman yejua tajtojtoyaok, tel miakej nesitoj. Kinyekanaya semej 12 tatitanilmej, akin monotsaya Judas, uan kimakato se beso* Jesús.
48 Sayoj ke Jesús kiluij: “Judas, ¿ika se beso tinechtemaktia nejua akin niyolik kemej takat?”.
49 Keman akin ompa yetoyaj kiitakej tein yaya mochiuati, kitajtanijkej: “ToTekotsin, ¿maj tikuikan tomachete?”.
50 Uan semej kikotonilij inakas tein kipiaya iyekmakopa itakeual tayekankatiopixkat.
51 Sayoj ke Jesús kiniluij: “¡Amo xikchiuakan nejon!”. Uan kinakasmatokak* takeual uan kipajtij.
52 Uan Jesús kiniluij uejueyi tiopixkamej, tayekankatajpianij itech templo uan taixyekananij judíos akin kitemotoj: “¿Nanechkitskikoj ika machetes* uan koujmej kemej yeskia nitachtekkej?
53 Mojmostaj nietoya itech templo namouan, uan amo nanechkitskijkej. Sayoj ke nejin namohora uan hora keman taixyekanaj akin yetokej tayouayan”.
54 Uan kikitskijkej, kiuikakej uan kikalakijkej ichan tayekankatiopixkat. Uan Pedro kinuejkatojtokatiaya.
55 Yejuan taxotaltijkej* tatajko kalixpan uan mosentalijkej. Pedro no iniuan tokotsyetoya.
56 Sayoj ke, se siuapil* akin kiitak ke mototonijtoya kampa taxotaltijkaj, kisenitak uan kijtoj: “Nejin takat no iuan nentinemia”.
57 Sayoj ke Pedro kijtoj ke amo. Yejua kijtoj: “Nejua amo nikixmati”.
58 Tepitsin satepan, se takat kiitak uan kiluij: “Tejua no tipoui iniuan”. Sayoj ke Pedro kinankilij: “Amo nejua, tejuatsin”.
59 Panok kemej se hora uan okse peuak miakpa kijtoua: “¡Nejin takat no nentinemia iuan! Moyekita ke kayot Galilea”.
60 Sayoj ke Pedro kiluij: “Tejuatsin, amo nikmati tein tikijtojtok”. Nimantsin, keman yejua tajtojtoyaok, tsajtsik se pio.*
61 Ijkuak, toTekotsin moixkepak uan kisenixitak Pedro, uan Pedro kielnamikik nejin tein toTekotsin kiluijka: “Achto ke se pio tsajtsis axkan, expa tikijtos ke amo tinechixmati”.
62 Uan kalankisak uan peuak tayokolchoka.
63 Uan takamej akin kipixtoyaj Jesús, peuak kikejkelouaj uan kimagaj.*
64 Kiixtsakkej uan miakpa kiluiayaj: “¡Xiknexti ke titanauatijkej!* Xitechilui akoni mitsmagak”.*
65 Uan kiluiayaj Jesús miak taman tein ika kiuijuikaltiayaj* Dios.
66 Keman tanesik, mosentilijkej taixyekananij judíos, uejueyi tiopixkamej uan tajkuilouanij. Yejuan kikalakijkej Jesús kampa mosentiliayaj Uejueyi Tamelauanij* uan kiluijkej:
67 “Xitechilui ox tejua tiCristo”. Yejua kinnankilij: “Maski namechiluiskia, amo keman nankineltokaskiaj.
68 Uan no, komo nejua namechtajtaniskia teisa, namejuan amo nanechnankiliskiaj.
69 Sayoj ke desde axkan, nejua akin niyolik kemej takat nitokotsyetos iyekmakopa Dios akin semi chikauak”.
70 Keman kikakkej nejin, nochin tajtankej: “Komo ijkon, ¿tejua tiiKoneuj Dios?”. Yejua tanankilij: “Kemaj, namejuan nankijtojtokej nejon”.
71 Uan yejuan kijtojkej: “Amo monekiok maj nion akin kijto teisa. Tikakkejya tein kijtoj”.
Tajtolmelaualismej
^ Oso “amo kiposonaltiayaj”, “amo kisoneuayaj”.
^ Itech griego, “plata”.
^ Oso “amo kiposonaltiayaj”, “amo kisoneuayaj”.
^ Oso “kitajtoltijkej”.
^ Oso “kaxtil”.
^ Oso “espada”.
^ Oso “akin amo kitakamati tanauatil”.
^ Oso “espadas”.
^ Oso “uejka kemej kampa maajsi aksa keman kitamota se tet”.
^ Oso “chichipikaya”.
^ Oso “kipitsoto”, “kitenamikito”.
^ Oso “kinakasmachilij”.
^ Oso “espadas”.
^ Oso “tichiujkej”.
^ Nejin siuapil katka takeual.
^ Oso “kaxtil”.
^ Oso “kiuitekij”.
^ Xikonita tanauatijkej.
^ Oso “mitsuitek”.
^ Oso “kitejtelchiuayaj”.
