Juan 14:1-31
14 “Amo ximoyoltekipachokan. Xitakuaujtamatikan iuan Dios, uan no xitakuaujtamatikan nouan.
2 Ichan noTajtsin semi takaujtok kampa se nemis. Komo amo takaujtoskia, namechiluiskiaya, porin namechtachijchiuiti kampa nanemiskej.
3 Uan no, keman niasya uan namechtachijchiuis kampa nanemiskej, oksepa niualas uan namechuikas kampa nietos, uan ijkon kampa nejua nietos no nanyetoskej namejuan.
4 Uan namejuan nankiixmatij ojti para nanyaskej kampa nejua niouj”.
5 Tomás kiluij: “NoTekotsin, amo tikmatij kani tiouj. ¿Keniuj tikixmatitij ojti?”.
6 Jesús kinankilij: “Nejua niojti, nejua tein melauak uan nejua nikchiua xiyoltokan. Amo akin ueli kiajsiti noTajtsin komo amo notechkopa.
7 Komo nanechixmatij nejua, no nankiixmatiskej noTajtsin. Desde axkan nankiixmatij uan nankiitakejya”.
8 Felipe kiluij: “ToTekotsin, xitechnextili moTajtsin, uan sayoj nejon”.
9 Jesús kinankilij: “Felipe, uejkaujya nietok namouan, ¿uan ayamo tinechixmati? Akin nechitani, no kiitani noTajtsin. ¿Keyej tikijtoua ‘Xitechnextili moTajtsin’?
10 ¿Amo tikneltoka ke nejua nietok iuan noTajtsin uan ke noTajtsin nouan yetok? Nejua amo namechiluia tein nejua niknemilia, ta noTajtsin akin nochipa nouan yetok, kichiujtok tein kiixtalijtok.
11 Xinechneltokilikan keman namechiluia ke nietok iuan noTajtsin uan noTajtsin yetok nouan. Sayoj ke komo amo nankineltokaj tein nikijtoua, maj namechpaleui xitaneltokakan tein nikchiua.
12 Yekmelauj namechyekiluia ke akin nouan takuaujtamatis no kichiuas tein nejua nikchiua. Uan kichiuas okachi uejueyi taman, porin nejua niouj nikajsiti noTajtsin.
13 Uan no, tein yeski taman tein nantajtaniskej notokaykopa, nejua nikchiuas, para maj noTajtsin moueyitali itechkopa iKoneuj.
14 Komo namejuan nantajtanij teisa notokaykopa, nejua nikchiuas.
15 ”Komo nanechtasojtaj, nankitakamatiskej notanauatiluan.
16 Uan nejua niktataujtis noTajtsin uan yejua namechmakas okse tapaleuijkej* maj yeto namouan nochipaya:
17 ichikaualis Dios tein kitematiltia tein melauak, tein amo nochin ueli kinmakaj porin nion kiitaj nion kiixmatij. Namejuan nankiixmatij porin yetok namotech uan namotech mokaua.
18 Nejua amo namechkauas namoselti.* Nimokepas uan nietos namouan.
19 Amo uejkaua, nikan taltikpak amo nechitaskejok, sayoj ke namejuan nanechitaskej porin nejua niyoltok uan namejuan no nanyoltoskej.
20 Nejon tonal nankimatiskej ke nejua nietok iuan noTajtsin, ke namejuan nanyetokej nouan uan ke nejua nietok namouan.
21 Akin amo kiixtopeua notanauatiluan uan kitakamati yejua akin nechtasojta. Uan akin nechtasojta, noTajtsin kitasojtas uan nejua no niktasojtas uan nikchiuas maj yekmelauj kuali nechixmati”.
22 Judas, (amo Judas Iscariote), kitajtanij:* “NoTekotsin, ¿toni panok? ¿Keyej tikchiuati maj yekmelauj kuali timitsixmatikan tejuan uan oksekin amo?”.
23 Jesús kinankilij: “Komo aksa* nechtasojta, kichiuas tein nikijtoua. Uan noTajtsin kitasojtas, uan tiomen tiualaskej kampa yejua yetos uan iuan tinemiskej.
24 Akin amo nechtasojta amo kichiua tein nikijtoua. Tein nankikakij ke namechiluia amo noaxka, ta iaxka noTajtsin, akin nechualtitanik.
25 ”Namechiluia nejin keman niksentokaok namouan.
26 Sayoj ke tapaleuijkej, ichikaualis Dios, tein noTajtsin kiualtitanis notokaykopa, namechmachtis nochi uan namechelnamiktis nochi tein namechiluij.
27 Namechpaleuis xiksentokakan xiyolseujtokan ijkon kemej axkan nanyolseujtokej nouan. Amo namechyolseuis kemej nikan taltikpak teyolseuiaj. Amo ximoyoltekipachokan nion ximoyolmoujtikan.
28 Nankikakkej ke namechiluij: ‘Niouj uan oksepa nimokepas namouan’. Komo nanechtasojtaj nanyolpakiskej porin niouj kampa yetok noTajtsin, porin noTajtsin okachi ueyichiujkej* ke nejua.
29 Namechiluij nejin achto ke mochiuas, uan ijkon keman mochiuas, namejuan nantaneltokaskej.
30 Amo semiok namechnojnotsas, porin ualajtok akin taixyekana nikan taltikpak, maski yejua nion tepitsin ueli nechixyekana.
31 Sayoj ke para maj nochin kimatikan ke nejua niktasojta noTajtsin, senkis nikchiua tein noTajtsin nechnauatij. Ximoketsakan, tiouijya.
Tajtolmelaualismej
^ Oso “tayolseuijkej”.
^ Oso “kemej akin amo kipiaj inintatuan”.
^ Oso “kitajtoltij”.
^ Oso “akin”, “akaj”.
^ Oso “kipia okachi tanauatil”.
