Amo, pampa amo nochi religiones eli sanse. Ipan Biblia kiijtoua kenijkatsa toTeotsij amo kipaktia ma kiueyichiuakaj. Ma tikitakaj ome tlamantli.

Achtoui tlamantli: Katli kinueyichiuaj teotsitsij tlen amo melauakej

 Biblia kiijtoua san tlapik tlaj tikinueyichiuasej teotsitsij tlen amo melauakej (Jeremías 10:​3-5; 16:19, 20). Jehová a kiniljuik israeleuanij: “Amo xijtlepanitakaj seyok keja inmoTeko, san na” (Éxodo 20:​3, 23; 23:24). Kema israeleuanij pejkej kinueyichiuaj sekinok teotsitsij, Jehová “tlauel kualanki ininuaya” (Números 25:3; Levítico 20:2; Jueces 2:​13, 14).

 ToTeotsij amo kipatlatok tlen moiljuia uan amo kineki ma kinueyichiuakaj katli maseualmej “kintokaxtiaj ‘teotsitsijʼ ” (1 Corintios 8:​5, 6; Gálatas 4:8). Katli kinekij kitekipanosej Jehová, ya kiniljuia ayokmo ma kichiuakaj tlen kichiuaj ipan religión tlen amo melauak. Biblia kiijtoua: “Xikintlalkauikaj tlakamej tlen axkineltokaj toTeko” (2 Corintios 6:​14-​17). Tlaj nochi religiones eliskiaj sanse uan techpaleuiskia ma tijnechkauikaj toTeotsij, ¿kenke toTeotsij techmakak nopa tlanauatili?

Ompa tlamantli: Katli kiueyichiuaj toTeotsij kej amo kipaktia

 Jehová kintlauelkajki israeleuanij kema pejkej kiueyichiuaj kej maseualmej kinueyichiuayayaj ininteotsitsij (Éxodo 32:8; Deuteronomio 12:​2-4). Jesús kiniljuik katli tlayakanayayaj ipan religiones amo kuali tlen kichiuayayaj pampa amo kiueyichiuayayaj toTeotsij kej kinamiki. Maske inijuantij kinextiyayaj kuali kitekipanouayayaj toTeotsij, kipixtoyaj ome ininxayak pampa amo kichiuayayaj “tlen xitlauak iixtla toTeko”, amo tetlasojtlayayaj uan amo eliyayaj temachmej, uan nopa eliyaya “tlen más ipati tlen itlanauatiljuaj Moisés” (Mateo 23:23).

 Ipan ni tonali, san nopa religión katli tlamachtia tlen melauak tlen uala ipan Biblia techpaleuia ma tijnechkauikaj toTeotsij (Juan 4:​24; 17:17; 2 Timoteo 3:​16, 17). Religiones tlen amo tlamachtiaj tlen Biblia kiijtoua, kichiua miakej maseualmej amo ma kinekikaj kinechkauisej toTeotsij. Miakej moiljuiaj Biblia tlamachtia nopa Trinidad, tijpiaj se tlamantli tlen amo kema miki uan nochipa techtlaijiyouiltisej ipan tlitl. Maske miakej kiampa kineltokaj, ni tlamachtili kineltokayayaj maseualmej katli kinueyichiuayayaj teotsitsij tlen amo melauakej. Jehová amo kipaktia kej kiueyichiuaj religiones tlen tlamachtiaj ni tlamantli pampa tlaueyichiuaj kej maseualmej momajtokej uan amo kej toTeotsij kipaktia (Marcos 7:​7, 8).

 ToTeotsij kikualankaita tlen kichiuaj ipan religiones tlen amo melauak (Tito 1:​16). Tlaj tijnekij se religión ma techpaleui ma tijnechkauikaj toTeotsij, amo san moneki tijchiuasej tlen maseualmej momajtokej kichiuaj kema tlaueyichiuaj, moneki ma nesi kenijkatsa techpaleuia ipan tonemilis. Biblia kiijtoua: “Intla se akajya kiijtoua kineltoka toTeko, pero axmomokuitlauia ika tlen kiijtoua; uan san tlen ueli kamati, uajka yajaya san moyolkajkayaua. Axtleno ipati itlaneltokilis. Yajuantij tlen nelia kitlepanitaj toTeko Dios uan kipiaj inintlaneltokilis tlen senkistok kuali iixpa, kichiuaj ya ni: kinpaleuiaj iknotsitsij uan kaualtoauiuaj tlen tlaijiyouiaj, uan momokuitlauiaj ipan ni Tlaltipaktli para tlen fiero axkinyoltilanas ma tlajtlakolchiuakaj” (Santiago 1:​26, 27). Nopa versión La Palabra de Dios para Todos kitekiuia nopa tlajtoli “religión tlen senkistok kuali” kema kiijtoua katli tlaueyichiuaj kej toTeotsij kipaktia uan ika nochi ininyolo.