TLAMACHTILI 2
¿Ajkia toTeotsij?
1. ¿Kenke moneki ma tijueyichiuakaj toTeotsij?
ToTeotsij kichijki nochi tlamantli. Ya amo aka kichijki uan amo kema mikis (Salmo 90:2). Ya kichijki ma moijkuilo nopa kuali tlamachtili katli eltok ipan Biblia (1 Timoteo 1:11). Uan pampa toTeotsij kichijtok ma tiitstokaj, san ya kinamiki ma tijtekipanokaj uan ma tijueyichiuakaj. (Xijpoua Apocalipsis (Revelación) 4:11).
2. ¿Kenijkatsa toTeotsij?
Yon se maseuali amo kema kiitstok toTeotsij pampa ya se tonaltsi. Inoj kiijtosneki inemilis amo kej tojuantij pampa tojuantij tijpiaj totlakayo uan tiitstokej ipan Tlaltipaktli (Juan 1:18; 4:24). Tlaj tijtlachilisej nochi tlen kichijtok, uelis tijmatisej tlake moiljuia uan tlake kiyolmati. Nopa miak tlamantli kuauitl itlajka uan nopa miak xochitl technextilia kenijkatsa toTeotsij tlauel tlalnamiki uan techiknelia. Nojkia, kema tijtlachiliaj tlen onka ipan iluikaktli uan ipan Tlaltipaktli, tikitaj kipia miak tetikayotl. (Xijpoua Romanos 1:20).
Nojkia uelis tikixmatisej toTeotsij tlaj tijpouasej Biblia. Nopaya technextilia tlake kipaktia toTeotsij uan tlake amo kipaktia, kenijkatsa kinita maseualmej uan tlake kichiua kema tikixpanoj. (Xijpoua Salmo 103:7-10).
3. ¿Tlake itoka toTeotsij?
Jesús kiijtok: “ToTeko Totata tlen tiitstok nepa iluikak. Nochi tlakamej ma kiueyichiuakaj motoka” (Mateo 6:9). Maske toTeotsij kitokaxtiaj ika miak tokajyotl, ya itoka Jehová. Uan ipan nochi tlajtoli amo sanse motenkixtia. (Xijpoua Salmo 83:18).
Ipan miak Biblias kipatlatokej toTeotsij itoka ika toTeko o Dios, maske kema kiijkuilojkej Biblia toTeotsij itoka nesiyaya nechka siete mil. Kema Jesús temachtik nochipa kitekiuik toTeotsij itoka. (Xijpoua Juan 17:26, TNM).
Xikita nopa video ¿Kipia itoka toTeotsij?
4. ¿Kitekipachoua Jehová tlen techpano?
Kej ni tetata kiiknelia ikone, toTeotsij nojkia kineki nochipa ma kuali tiitstokaj
Tlaj Jehová nelnelia techiknelia, ¿kenke kikaua ma onka miak tlaijiyouilistli? Sekij kiijtouaj toTeotsij techtlaijiyouiltia kema techyejyekoua. Ni amo nelia. (Xijpoua Job 34:10-12).
Jehová techkaua ma tijtlapejpenikaj tlake tijnekij tijchiuasej ipan tonemilis. Uajka tlauel kuali eliskia tlaj tijtlapejpeniskiaj tijtekipanosej toTeotsij (Josué 24:15). Miakej amo kichiuaj ni, pampa san kichiuaj tlen amo kuali, yeka onka miak tlaijiyouilistli. Uan Jehová kiyolkokoua kema kiita ni. (Xijpoua Génesis 6:5 uan 6).
Jehová kitekipachoua tlen techpano uan kineki ma tiyolpakikaj ipan tonemilis. Yeka nechka kitlamiltis tlaijiyouilistli uan katli tetlaijiyouiltiaj. Jehová kimati kenke kikajtok ma titlaijiyouikaj uan ipan tlamachtili chikueyi, tikitasej kenke. (Xijpoua 2 Pedro 2:9 uan 3:13).
5. ¿Kenijkatsa uelis tijnechkauisej toTeotsij?
Jehová techiljuia ma timomaijtokaj uan kiampa uelis tijnechkauisej. Ya kitekipachoua tlen techpano (Salmo 65:2; 145:18). Nojkia kineki techtlapojpoljuis. Uan ya kimati tijchiuaj kampeka tijchiuasej tlen kipaktia maske kemantika timokuapolouaj. Uan maske titlajtlakolejkej uelis kuali timouikasej iuaya. (Xijpoua Salmo 103:12-14 uan Santiago 4:8).
Pampa toTeotsij kichijtok ma tiitstokaj, san ya kinamiki ma tlauel tikiknelikaj uan amo seyok (Marcos 12:30). Tlaj nojua tikixmatisej toTeotsij uan tijneltokasej tlen ya technauatia, tijnextisej tikikneliaj. Ni techpaleuis nojua kuali ma timouikakaj iuaya. (Xijpoua 1 Timoteo 2:4 uan 1 Juan 5:3).
