Ipan miak Biblias tlen uejkajkia kitlajtolkuepkej, kej Scío de San Miguel uan Reina-Valera (tlen kiski ipan 1909), kitekiuiaj nopa tlajtoli infierno ipan se keski versículos (Salmo 16:10; [15:10, Scío de San Miguel]; Hechos 2:27 a). Miakej maseualmej moiljuiaj nopa infierno eli kampa nochipa kintlaijiyouiltiaj ika tlitl katli kichijkej tlen amo kuali, kej nesi ipan tlaixkopinkayotl tlen uala kampa peua ni tlamachtili. ¿Biblia nelnelia ya nopa tlamachtia?

Ipan ni tlamachtili tikitasej:

•  ¿Nopa infierno eli kampa maseualmej nochipa tlaijiyouiaj?

•  ¿Tlake kiijtosneki nopa tlapoualistli tlen nopa tlakatl katli tlatominpiayaya uan Lázaro?

•  ¿Katli itstokej ipan infierno tlaijiyouiaj pampa mouejkatlalijtokej tlen toTeotsij?

•  ¿Ueltok kisa se akajya tlen nopa infierno?

•  Textos tlen Biblia kampa kiijtoua tlen nopa infierno o kampa kintokaj katli miktokej

•  Tlajtoli tlen achtouia ualayaya ipan Biblia

•  ¿Kanke pejkej tlaneltokaj ipan infierno?

 Amo, ipan se keski Biblias tlen uejkajkia kitlajtolkuepkej, kitekiuiaj nopa tlajtoli “infierno” kema kitlajtolkuepaj nopa tlajtoli hebreo Seol, uan nopa tlajtoli griego Hades. Ni tlajtoli san kiixnextia kampa kintokaj nochi katli miktokej o nopa mijkaostotl. Biblia kiijtoua katli ya kintojkej ayokmo yoltokej.

•   Katli miktokej ayokmo tleno kimatij yeka amo tlaijiyouiaj. “Ipan nopa mijkaostotl [“infierno”, Jünemann] kampa monechkauia para tias, ayok uelis tijchiuas niyon se tekitl, ayok uelis timoyoliljuis kejatsa tijchiuas se tlamantli tlen kuali. Ayok tleno tikixmatis, niyon ayok tijpias tlalnamikilistli” (Eclesiastés 9:10). Ipan nopa infierno amo aka kuatsajtsi pampa tlaijiyouia. Biblia kiijtoua: “Xikinpinaualti tlakamej tlen axkuajkualmej. Kena, inijuantij mokamatsakuasej kema tikintsontlamiltis [“infierno”, La Biblia del Oso]” (Salmo 31:17, Nueva Traducción Viviente [31:18, La Biblia del Oso]; 115:17).

•   ToTeotsij kiijtok katli tlajtlakolchiuaj mikiskiaj, amo yaskiaj infierno. ToTeotsij kiiljuik nopa achtoui tlakatl, Adán, tlaj amo kineltokaskia tlen kinauatijtoya uajka mikiskia (Génesis 2:17). Amo kiiljuik nochipa tlaijiyouiskia ipan infierno. Teipa, Adán tlajtlakolchijki uan toTeotsij kiiljuik tlake kipanoskia: “Na nijchijki motlakayo ika tlali, uan kema timikis, sampa timokuepas tlali” (Génesis 3:19). Adán ayokmo itstoskia. Tlaj toTeotsij kitlaijiyouiltiskia ipan infierno, uajka kiiljuijtoskia. Ipan ni tonali, katli amo kichiuaj tlen toTeotsij kiijtoua, nojkia kinpano kej Adán. Kema panotoya miak xiuitl Adán miktoya, toTeotsij kichijki se itekipanojka ma kiijkuilo: “Intla se tlakatl tlajtlakolchiua, kipantia mikistli keja itlaxtlauil” (Romanos 6:23). Tlaj se akajya miki amo moneki nojua tlauel tlaijiyouis pampa kema miki “kiixtlaua itlajtlakol” (Romanos 6:7, TNM).

•   ToTeotsij amo kema moiljuiskia kintlaijiyouiltis maseualmej ipan tlitl (Jeremías 32:35). Kema maseualmej kiijtouaj nopa infierno nelnelia eltok, kiijixnamikij tlen Biblia tlamachtia pampa nopaya kiijtoua: “ToTeko, yajaya teiknelijkayotl” (1 Juan 4:8). Ya kineki ma tijtekipanokaj pampa tikikneliaj uan amo pampa timajmauij nochipa ma techtlaijiyouilti (Mateo 22:36-38).

•   Se keskij maseualmej katli kuali monejnemiltijkej yajkej infierno. Ipan Biblias tlen kipia nopa tlajtoli infierno, nojkia kiijtoua se keski tlakamej katli kuali kitekipanojkej Jehová, kej Jacob uan Job, kiijtojkej yaskiaj infierno (Génesis 37:35; Job 14:13). Ipan nopa Biblias nojkia kiijtoua Jesús itstoya infierno kema mijki uan kema moyolkuik ayokmo itstoya nopaya (Hechos 2:31, 32). Uajka, kema ipan ni Biblias motekiuia nopa tlajtoli infierno, san kineki kiijtos kampa kintokaj katli mikij. b

 Nopa tlapoualistli tlen Jesús kiijtok, eltok ipan Lucas 16:19-31. Se tlapoualistli eli se tlamantli tlen amo nelia panok uan tlen techmachtia kenijkatsa moneki timonejnemiltisej o kenijkatsa kiita Jehová se tlamantli. Uajka, nopa tlapoualistli tlen nopa tlakatl katli tlatominpiayaya uan Lázaro, amo nelia panok (Mateo 13:34). Tlaj nojua tijneki tijmatis tlake kiijtoua nopa tlapoualistli, xikita nopa tlamachtili “¿Ajkia eliyaya nopa tlakatl katli tlatominpiayaya uan Lázaro?”.

 Amo. Kema maseualmej kiijtouaj katli miktokej tlaijiyouiaj pampa kimatij mouejkatlalijtokej tlen toTeotsij, kiijixnamikij tlen Biblia tlamachtia, pampa nopaya kiijtoua katli miktokej ayokmo tleno kimatij (Salmo 146:3, 4; Eclesiastés 9:5).

 Kena. Biblia kiijtoua chiknauij maseualmej mijkej uan yajkej kampa kintokaj katli miktokej (ipan sekij Biblias motlajtolkuepa kej “infierno”) uan teipa moyolkuikej. c Tlaj inijuantij itstoyaj ipan infierno, uajka kema moyolkuikej kiniljuijtoskiaj sekinok tlen kiitakej. Uan inijuantij amo kiampa kichijkej pampa amo aka kiijtok tlaj tlaijiyouik o kipanok seyok tlamantli. ¿Kenke? Pampa kej Biblia kiijtoua, inijuantij amo tleno kimatiyayaj, uan kejuak kochtoyaj (Juan 11:11-14; 1 Corintios 15:3-6).