BABG A 8
Yel-beed wakate
“Yãmb maanda sũ-noogo, baa yãmb sẽn tar sũ-sãoong makr toɛy-toɛyã yĩng wakat bilf pʋgẽ wã.”—1 Pɩɛɛr 1:6.
Y maanda y sẽn tõe fãa n dat tɩ y zakã rãmb vɩɩm yɩ noogo, la yel-lingdem tõe n wa kɩtame tɩ yaa toog tɩ sũ-noog kell n zĩndi. (Koɛɛg Soaba 9:11) Wẽnnaam sẽn nong tõndã, a kõta sagls sẽn sõngd tõnd zu-loeesã wakate. Y sã n sak n tũ a saglsã sẽn be Biiblã pʋgẽ wã, baa zu-loɛɛgã yaa kɛgeng to-to, yãmb ne y zakã rãmb na n tõog n maoome.
1 TEEG-Y-YÃ A ZEOVA
BIIBLÃ SẼN YETE: “Bɩ y bas yãmb yɩɩrã fãa ne bãmba; tɩ bõe, bãmb mengã geta yãmb yelle.” (1 Pɩɛɛr 5:7) Tẽegd-y wakat fãa tɩ pa Wẽnnaam n kɩt tɩ tõnd namsdẽ ye. (Zak 1:13) Yell pʋgẽ tɩ y sã n kos-a, a na n sõng-y lame, hal t’a sõngrã pa tall to ye. (Ezai 41:10) “Pelg-y y pʋs bãmb taoore,” n togs yellã fãa.—Yɩɩl Sõamyã 62:9.
Y sã n karemd Biiblã daar fãa la y bʋgsd y sẽn karemdã zugu, y na n paama belsgo. Y na n yãame t’a Zeova sɩd ‘belsda tõnd d toog fãa pʋgẽ.’ (2 Korẽnt dãmba 1:3, 4; Rom dãmba 15:4) A pʋlmame t’a na n kõ-y-la “laafɩ sẽn yɩɩd nebã bãngr fãa.”—Filip rãmba 4:6, 7, 13.
Y SẼN TÕE N MAANE:
Pʋʋs-y-yã a Zeova t’a sõng-y tɩ yell pʋgẽ bɩ y tall yõk-m-menga, n tõog n tags neere.
Tags-y n ges-y bũmb nins fãa y sẽn tõe n maanã, la y yãk sẽn manegd yãmb n yɩɩdã.
2 GES-Y Y ZAKÃ RÃMB YELLE, LA YÃMB MENGÃ YELLE
BIIBLÃ SẼN YETE: “Nin-yẽeseng paamda bãngre. Yam soab kelgdame n baood bãngre.” (Yelbũna 18:15) Modg-y n bãng-y yellã vɩʋʋgo. Bao-y n bãng-y zakã ned fãa raab sẽn yaa a soaba. Sõs-y ne-ba. Kelg-y-b neere.—Yelbũna 20:5.
La sã n yaa zakã ned a ye n maan kaalem? Ra n tags-y tɩ y tog n solga y sũ-sãangã ye. Tẽeg-y tɩ baa a Zezi meng “yãbame.” (Zã 11:35; Koɛɛg Soaba 3:4) Bãng-y me tɩ y sã n vʋʋs sõma la y gũs tɩ seke, na n sõng-y-la wʋsgo. (Koɛɛg Soaba 4:6) Woto na n kɩtame tɩ y tõog n mao ne zu-loɛɛgã n yɩɩda.
Y SẼN TÕE N MAANE:
Modg-y tɩ y zakã rãmb minim n sõsd ne-yã. Woto, yel-beed sã n wa maane, b na n tõog n goma ne yãmb tɩ rabeem kae ye.
Sõs-y ne neb yãmb zu-loɛɛgã buud sẽn zoe n paame.
3 SAK-Y TƖ B SÕNG-YÃ
BIIBLÃ SẼN YETE: “Zood kẽer me n be n yaa noog n yɩɩd rogem.” (Yelbũna 18:24) Tõe tɩ y zo-rãmbã rat n sõng-y lame, la b pa mi b sẽn tog n maneg ye. Togs-y-b yãmb sẽn dat tɩ b maanã, la y ra sĩnd ye. (Yelbũna 12:25) Sẽn paase, bao-y sõngr neb nins sẽn mi Biiblã sõma wã nengẽ. Biiblã saglsã b sẽn na n kõ-yã na n sõng-y lame.—Zak 5:14.
Y sã n tigimd wakat fãa ne neb sẽn tẽed Wẽnnaam ne b sũy fãa, neb sẽn kɩs sɩd t’a sẽn pʋlmã na n pidsame, na n sõng-y-la wʋsgo. Sẽn paase, y sã n sõng neb a taab me sẽn koms raoodo, na n belsa yãmb mengã. Sõng-y-b tɩ b bãng a Zeova la a sẽn kãab bũmb ninsã. Wɩng-y ne neb a taabã sõngre. Da lak-y y meng ne neb nins sẽn nong yãmb la sẽn dat y neerã ye.—Yelbũna 18:1; 1 Korẽnt dãmba 15:58.
Y SẼN TÕE N MAANE:
Sõs-y ne y zoa hakɩka, la y bas t’a sõng-yã.
Pelg-y y pʋg n togs y sẽn dat tɩ b maanã takɩ.
