Sẽn na yɩl n ges d zakã rãmb yelle, ligd yaa tɩlae. (Yelbũna 30:8) Ligd pʋd n tõe n “sõngame tɩ f paamd f sẽn dat fãa.” (Koɛɛg Soaba 10:19, Sebr Sõngo) Tõe tɩ yaa toog tɩ y sõs ligd yell ne y pagã bɩ y sɩdã. La yaa tɩlae, sã n pa rẽ ligdã yell na n waa ne zu-loees y kãadmã pʋgẽ. (Efɛɛz rãmba 4:32) Yãmb y yiibã tog n kɩsa taab sɩda, n naagd taab n get y sẽn na n maan bũmb ning ne y ligdã.

BIIBLÃ SẼN YETE: “Ãnda n be yãmb sʋk n dat n me roogo, n ka reng n zĩnd n tags a ligd yelle, n bãng a sã n tara sẽn sek tɩ me n sɛ?” (Luk 14:28) Y tog n deng n maga y sẽn na n maan bũmb ning ne y ligdã. (Amos 3:3) Bao-y n bãng-y sẽn yaa tɩlae wã, la y gũus tɩ ra yɩɩg y pãng ye. (Yelbũna 31:16) Baa y sã n tõe n da bũmbu, pa tɩlae tɩ y ra ye. Gũus-y y meng ne sama. Modg-y tɩ y sẽn maand ne y ligdã ra zʋʋg y sẽn paamdã ye.—Yelbũna 21:5; 22:7.

Y SẼN TÕE N MAANE:

• Y sã n paam ligd y sẽn da pa tẽede, bɩ y naag taab n ges y sẽn na n maan bũmb ninga.

• Y sã n wa mik tɩ y sẽn maandã yɩɩda y tõogã, bɩ y ges y sẽn tõe n base. Wala makre, y tõe n segenda rɩɩbã vugr daar fãa.

BIIBLÃ SẼN YETE: “Maan sẽn yaa neere, ka Zu-soabã nifẽ bal ye, la nebã nifẽ me.” (2 Korẽnt dãmba 8:21) Tall-y pʋ-peelem, n togs y to wã y sẽn paamde, la y sẽn maand bũmb ning ne ligdã.

Y sã n dat n maan bũmb sẽn baood tɩ y yiis ligd wʋsgo, bɩ y reng n gom ne y to wã n gese. (Yelbũna 20:18) Y sã n yẽsd ne taab sõma ligdã zãab wɛɛngẽ, na n sõngame tɩ laafɩ zĩnd y kãadmã pʋgẽ. Ning-y y yamẽ tɩ y sẽn paamd ligd ningã yaa zakã fãa yĩnga, pa yãmb y ye n so ye.—1 Tɩmote 5:8.

Y SẼN TÕE N MAANE:

• Zems-y taab n bãng ligd ned fãa sẽn tõe n yãk n maan a sẽn date, n pa reng n togs a to wã ye.

• Da bas-y tɩ ligd zu-loɛɛg wa tɩ y yaool n zĩnd n na n yẽs ligd yell ye.