Zeremi sebre 29:1-32
29 Ad sebr ning no-rɛɛs a Zeremi sẽn pa Zerizalɛm n gʋls n tool kãsem-dãmb nins sẽn be yembsã sʋkã goama. Yaa bãmb ne maan-kʋʋdbã la no-rɛɛsdbã, n paas neb nins fãa a Nebukadnezaar sẽn tall Zerizalɛm n kẽng yembd Babilonnã la a tool-yã.
2 Yɩɩ rĩm a Zekoniya,+ rĩmã ma wã,+ a na-yirã tʋm-tʋmdbã, Zida la Zerizalɛm nanambsã, nus-tʋʋm dãmbã la sãabã sẽn yi Zerizalɛmmã poore.+
3 A rɩka sebrã n kõ a Safan+ biig a Elaza ne a Hilkiya biig a Gemariya, neb nins Zida rĩm a Sedesiyaas+ sẽn tʋm Babilon rĩm a Nebukadnezaar nengẽ wã. A yeela sebrã pʋgẽ yaa:
4 “Ad Israyɛll Wẽnnaam a Zeova sẽn yaa tãb-biis naabã sẽn yet neb nins fãa sẽn be yembdã, neb nins a sẽn kɩt tɩ b yi Zerizalɛm n kẽng yembd Babilonnã:
5 ‘Me-y rot n zĩnd b pʋsẽ. Sel-y tɩɩs n dɩ b biisã.
6 Rɩgs-y pagb n dog kom-dibli la kom-pugli. Peeg-y pagb n kõ y kom-dibli wã, la y kõ y kom-pugli wã sɩdba, tɩ bãmb me rog kom-dibli la kom-pugli. Fɩɩg-y zĩ-kãnga, tɩ y sõorã ra boog ye.
7 Bao-y tɩ bãan zĩnd tẽng ning pʋgẽ mam sẽn tall yãmb n kẽng yembdã, la y pʋʋs a Zeova a yĩnga, bala yaa bãan sã n be a pʋgẽ la yãmb me na n zĩnd bãane.+
8 Ad Israyɛll Wẽnnaam a Zeova sẽn yaa tãb-biis naabã sẽn yeele: “Ra bas-y tɩ y no-rɛɛsdbã la y bag-bʋgdbã sẽn be yãmb sʋkã belg-yã,+ la y ra kelg sẽn gomd-b zãmsd nins b sẽn zãmsdã yellã ye.
9 Bala ‘b togsda bãngr-goam sẽn yaa ziri ne mam yʋʋre. Mam pa tʋm-b ye.’+ Yaa a Zeova n yeele.”’”
10 “Ad a Zeova sẽn yeele: ‘Yãmb sã n zĩnd Babilon tɩ yʋʋm pis-yopoe wã wa pidi, mam na n gesa y yelle.+ Mam na n pidsa m pʋlengã, n tall yãmb n lebg n wa zĩ-kãngã.’+
11 “‘Bala mam mii magb ning mam sẽn magd yãmb wɛɛngẽ wã sõma.’ Yaa a Zeova n yeele. ‘Mam dat n kɩtame tɩ y zĩnd bãane. Pa yel-beed la m dat tɩ y paam ye.+ Yaa sẽn na yɩl tɩ y tõog n bas y yam tɩ beoog na n yɩɩ neere.+
12 Yãmb na n boola maam. Yãmb na n pʋʋsa maam, tɩ m kelg-yã.’+
13 “‘Yãmb na n gẽesa maam n yã,+ bala y na n baoo maam ne y sũur fãa.+
14 Mam na n basame tɩ y yã maam.’+ Yaa a Zeova n yeele. ‘Mam na n tigma yãmb neb nins sẽn yaa yembsã, la m naag-y taab n yiis buud toɛy-toɛyã fãa pʋsẽ, la zĩis nins mam sẽn da sãeeg yãmbã pʋsẽ.’+ Yaa a Zeova n yeele. ‘Mam na n talla yãmb n lebg n wa zĩig ning y sẽn da be tɩ m kɩt tɩ y kẽng yembdã.’+
15 “La yãmb yeelame yaa: ‘A Zeova kõo tõnd no-rɛɛsdb Babilonne.’
16 “Bala ad a Zeova sẽn yeel rĩm ning sẽn zao a Davɩɩd geerẽ+ wã, la neb nins fãa sẽn be tẽn-kãngã pʋgẽ, rat n yeel tɩ yãmb saam-biis nins sẽn pa tũ yãmb n kẽng yembdã:
17 ‘Ad a Zeova sẽn yaa tãb-biis naabã sẽn yeele: “Mam na n kɩtame tɩ zabre, kom la bã-loangdg*+ kʋ-ba. Mam na n kɩtame tɩ b lebg wa kankam-põaasa,* n yaa põaas hal tɩ ned pa tõe n dɩ ye.”’+
18 “‘Mam na n nams-b-la ne zabre,+ kom la bã-loangdga. Mam na n kɩtame tɩ b lebg bũmb sẽn kẽesd rabeem tẽngã soolem toɛy-toɛyã fãa nifẽ.+ Buud nins mam sẽn na n sãeeg-bã+ sʋka, nebã na n kãabd-b-la wẽnga. Ned ning fãa sẽn na n yã-b na n yɛɛsame. B na n tʋʋd-b lame*+ la b paoogd-ba.
19 Bala b pa kelg goam nins mam sẽn tʋm no-rɛɛsdbã sẽn yaa m tʋm-tʋmdbã tɩ b tɩ taas-bã ye.’ Yaa a Zeova n yeele. ‘Mam tʋm-b-la naoor wʋsgo,’*+
“‘la yãmb pa kelg ye.’+ Yaa a Zeova n yeele.
20 “Woto wã, yãmb a neb nins fãa sẽn be yembdã, neb nins mam sẽn kɩt tɩ b yi Zerizalɛm n kẽng Babilonnã, kelg-y-yã a Zeova goamã.
21 Ad Israyɛll Wẽnnaam a Zeova sẽn yaa tãb-biis naabã sẽn yeel a Kolaya biig a Akaab wɛɛngẽ, la a Maaseya biig a Sedesiyaas wɛɛngẽ, neb nins sẽn togsd yãmb bãngr-goam sẽn yaa ziri ne mam yʋʋrã:+ ‘Mam na n dɩk-b lame n ning Babilon rĩm a Nebukadnezaar* nugẽ. A na n kʋ-b-la yãmb nifẽ.
22 Bũmb ning sẽn na n paam-bã na n lebga bũmb Zida neb nins fãa sẽn be yembd Babilonnã sẽn na n tar n kãabd wẽnga, n yetẽ: “Bɩ a Zeova kɩt tɩ f yɩ wa a Sedesiyaas ne a Akaabe, Babilon rĩmã sẽn sẽ bugmẽ wã!”
23 Bala b tʋma yãn-tʋʋm Israyɛlle.+ B ra yooda ne b taab pagba, la b ra togsd goam sẽn yaa ziri ne mam yʋʋre, goam mam sẽn pa yeel-ba.+
“‘“Mam yaa soab ning sẽn mi rẽ wã. Mam maana kaset ne rẽ.”+ Yaa a Zeova n yeele.’”
24 “Fo segd n yeela Nehelam rao a Semaya+ yaa:
25 ‘Ad Israyɛll Wẽnnaam a Zeova sẽn yaa tãb-biis naabã sẽn yeele: “Fo sẽn gʋls sɛb ne f meng yʋʋr n tool neb nins fãa sẽn be Zerizalɛmmã, a Maaseya biig a Sofoni+ sẽn yaa maan-kʋʋdã, la maan-kʋʋdb a taabã fãa wã yĩng n yeele:
26 ‘A Zeova kɩtame tɩ fo lebg maan-kʋʋd n ledg maan-kʋʋd a Zehoyada, n lebg a Zeova roogã yel-gɛta, n na n ges gãeeng ning fãa sẽn maand wa a yaa no-rɛɛs yelle, n balg-a ra-bãongo, la f balg a yublã ne kutu.+
27 Bõe yĩng masã tɩ fo pa zab Anatot+ rao a Zeremi sẽn maand wa a yaa no-rɛɛs fo taoorã?+
28 A pʋd n toola tõnd sebr Babilon n yeele: “Y yembdã na n kaoosame! Me-y rot n zĩnd b pʋsẽ. Sel-y tɩɩs n dɩ b biisã,+ . . .”’”’”
29 Maan-kʋʋd a Sofoni+ sẽn wa n karem seb-kãngã tɩ no-rɛɛs a Zeremi kelgã,
30 a Zeova goma ne a Zeremi n yeele:
31 “Tʋm tɩ b tɩ yeel neb nins sẽn be yembdã fãa yaa: ‘Ad a Zeova sẽn yeel Nehelam rao a Semaya wɛɛngẽ: “A Semaya sẽn togs yãmb bãngr-goam tɩ mam yaool n pa tʋm-a wã, la a sẽn mak n na n kɩt tɩ yãmb tẽ ziri wã yĩnga,+
32 ad a Zeova sẽn yeele: ‘Mam na n sɩbga Nehelam rao a Semaya ne a kambã la a yagensã. A ned baa a ye pa na n põs nin-buiidã sʋk ye. A pa na n yã bõn-sõma nins mam sẽn na n maan n kõ m nin-buiidã ye.’ Yaa a Zeova n yeele. ‘Bala a pirsa nebã sẽn na yɩl tɩ b kɩɩs a Zeova.’”’”
Vẽnegr toor-toore
^ Pa rẽ bɩ, “kankam sẽn pusi.”
^ Bɩ, “bãag.”
^ Ebre, “fɩɩnda b poorẽ.”
^ Ebre, “da sãta beoog n tʋmd-ba.”
^ Ebre, “Nebukadrezaar.” Yaa yʋʋrã boolg a to.
