Y SẼN karem nin-kãensã b yiibã goamã, ãnda soab goam la y tẽeda? Neb wʋsg tagsdame tɩ Tars rao a Soll b sẽn boond me tɩ tʋm-tʋmd a Pollã sẽn yeel bũmb ningã bee yamleoogo, la kengd raoodo. (Tʋʋmã 17:26, 27) Biiblã tara goam a taab me sẽn kengd raood woto. Wala makre, a Zeezi pʋʋsa daar a ye, n togs gomd sẽn wilgd t’a karen-biisã tõe n bãnga Wẽnnaam, n paam t’a ning-b barka.—Zã 17:3.

La a Filõ ne filozof-rãmb a taab sẽn yet bũmb ningã yaa toor fasɩ. B yetame tɩ d pa tol n tõe n bãng Wẽnnaam, la tɩ d pa tõe n wʋm a yɛlã võor abada. Sul a yiibã sʋka, ãnd dãmb n tar bʋʋm?

Biiblã wilga vẽeneg tɩ yɛl kẽer n be Wẽnnaam zug tɩ b võorã wʋmb yaa toog ne ninsaala. Wala makre, ned pa tõe n bãng Wẽnnaam belmã sẽn kaoos to-to wã, a bãngrã la a yamã sẽn ta zĩig ning ye. Bõn-kãensã fãa yɩɩda ninsaal nugu. La d sẽn pa mi rẽ wã pa kɩt tɩ d pa tõe n bãng Wẽnnaam ye. D sã n pʋd n bʋgs b zugu, tõe n sõng-d lame tɩ d ‘kolg Wẽnnaam.’ (Zak 4:8) D na n goma bũmb a wãn d sẽn pa tõe n wʋm b võor yelle. Rẽ poore, d na n goma bũmb kẽer d sẽn tõe n wʋm b võor yelle.

WẼNNAAM SẼN BE WAKAT FÃA WÃ: Biiblã wilgame tɩ Wẽnnaam “sɩng n yaa Wẽnnaam zamaan woo zamaane.” (Yɩɩn-sõamyã 90:2) Woto rat n yeelame tɩ Wẽnnaam pa tall sɩngre, la t’a pa na n tall saab me ye. “Ned ka tõe n bãng bãmb yʋʋmã sõor ye.”—Zoob 36:26.

Rẽ sẽn nafd-y to-to: Wẽnnaam pʋlmame tɩ y sã n bao n bãng-a, y tõe n wa vɩɩmda wakat sẽn kõn sa. (Zã 17:3) Wẽnnaam mengã sã n da pa vɩ wakat sẽn kõn sa yĩnga, y tõe n tẽe rẽ sɩda? Yaa “rĩm ning sẽn be-a wakat sẽn kõn sa” wã bal n tõe n pids pʋlen-kãnga.—1 Tɩmote 1:17.

WẼNNAAM YAMÃ: Biiblã yeelame tɩ “ned ka tõe n bãng bãmb [Wẽnnaam] yamã tɛk ye.” Bala, Wẽnnaam tagsgã yɩɩda tõnd rẽndã hal zĩig sẽn zãre. (Ezayi 40:28; 55:9) Rẽ n so tɩ Biiblã sok woto: “Ãnda soab n bãng Zu-soabã tagsg n na n sagl-ba?”—1 Korẽnt-rãmbã 2:16.

Rẽ sẽn nafd-y to-to: Wẽnnaam tõe n kelga neb milyõ-rãmb sẽn pʋʋsd wakat yɛnga. (Yɩɩn-sõamyã 65:3) Baa yirg a ye pa lʋɩt tẽng t’a pa bãng ye. Rẽnd yɛlã pa tõe n wa loog Wẽnnaam nug t’a yamã yuusi, n kɩt t’a pa le tagsd yãmb yelle, tɩ y sã n pʋʋsdẽ me bɩ a pa miẽ ye. Bala, Wẽnnaam yamã sẽn ka koakã kɩtame tɩ bũmb pa tõe n liib-a ye. Sẽn paase, a getame tɩ “yãmb bee yõod n yɩɩd yirs wʋsgo.”—Matye 10:29, 31.

WẼNNAAM SẼN MAAND YƐLÃ TO-TO WÃ: Biiblã wilgame tɩ ninsaal “ka tõe n tags n bãng tʋʋmd ning Wẽnnaam sẽn maan hal sɩngr tɩ ta sɛɛbã” ye. (Koɛɛg soaba 3:11) Rẽnd d pa na n tol n bãng bũmb fãa Wẽnnaam zug ye. A sẽn maand yɛlã to-to wã wilgdame t’a tara yam, hal tɩ ned pa tõe n fees n bãng ye. (Rom-dãmbã 11:33) La Wẽnnaam sõngda neb nins sẽn dat n ta yẽ yamã tɩ b wʋmd a sẽn maand bũmb ninsã võore.—Amoos 3:7.

Rẽ sẽn nafd-y to-to: Y sã n karemd Biiblã la y zãmsd-a, y na n ket n bãngda bõn-paal Wẽnnaam zugu, la a sẽn maand yɛlã to-to wã me zugu. Rẽnd d tõe n bãngda d saasẽ Ba wã n paasd wakat fãa, tɩ d zoodã me pãng paasdẽ.

D sẽn pa tõe n wʋm yɛl kẽer võor Wẽnnaam zugã pa kɩt tɩ d pa tol n tõe n bãng-a ye. Bũmb wʋsg n be Biiblã pʋgẽ n tõe n sõng-d tɩ d bãng Wẽnnaam sõma. Ad bãmb b wãna:

WẼNNAAM YƲƲRÃ: Biiblã wilgame tɩ Wẽnnaam pʋda a meng yʋʋre. A yeela woto: “Mam yaa a Zeova. Mam yʋʋr la woto.” Wẽnnaam yʋʋrã bee Biiblã pʋgẽ na maan naoor 7000. A yʋʋrã sẽn be Biiblã pʋgẽ wã sõor yɩɩda yʋy a taabã. *—Ezayi 42:8, MN.

Rẽ sẽn nafd-y to-to: A Zeezi sẽn wa n zãmsd a karen-biisã pʋʋsgã, a yeela woto: “Tõnd ba sẽn be arzãna, bɩ yãmb yʋʋrã paam waoogre.” (Matye 6:9) Yãmb me sã n wa pʋʋsd Wẽnnaam, y tõe n pʋta a yʋʋrã. A Zeova fãagda neb nins sẽn wilgd tɩ b waoogda a yʋʋrã.—Rom-dãmbã 10:13.

WẼNNAAM SẼN BE ZĨIG NINGÃ: Biiblã gomda tẽngã ne ãndũni wã bũmb a taabã yelle, la a gomd saasã yell me. (Zã 8:23; 1 Korẽnt-rãmbã 15:44) La Biiblã sã n gomd saasã yelle, mi n yaa zĩig ning Wẽnnaam ne malɛgsã sẽn be wã yell la a gomda. A yeelame tɩ Naandã ‘zĩigã bee yĩngri.’—1 Rĩm-dãmbã 8:43.

 Rẽ sẽn nafd-y to-to: Y bãnga bũmb takɩ Wẽnnaam zugu. Naandã pa pãng buud n be zĩig zãnga, wa neb kẽer sẽn tagsdã ye. A Zeova tara zĩig takɩ n beẽ. La baa ne rẽ, “bõn-naandg baa a yembr ka be Wẽnnaam sẽn ka ne ye.”—Ebre-rãmbã 4:13.

A ZEOVA SẼN YAA WẼNNAAM NING BUUDÃ: Biiblã wilgame tɩ “Wẽnnaam yaa nonglem.” (1 Zã 4:8) A pa tõe n yag ziri ye. (Tit 1:2) A pa tũusd neba, a yaa nimbãan-zoɛta, la bark kõata. A sũur pa yikd tao-tao ye. (Yikri 34:6; Tʋʋmã 10:34) Sẽn paase, Biiblã yeela bũmb sẽn tõe n ling neb wʋsgo. A wilgame tɩ Naandã ratame tɩ neb nins sẽn tũud-a wã lebg a zo-rãmba. Ad a sẽn yeele: “Zu-soabã zood yaa neb nins sẽn zoet bãmbã yĩnga.”—Yɩɩn-sõamyã 25:14, Wẽnnaam Sebre, 1983.

Rẽ sẽn nafd-y to-to: Y tõe n lebga a Zeova zoa. (Zak 2:23) Y sã n bãngd a Zeova sẽn yaa Wẽnnaam ning buudã n paasdẽ, y na n wʋmda Biiblã kibayã võor sõma.

Biiblã wilgda a Zeova sẽn yaa Wẽnnaam ning buudã vẽenega. Pa wa neb wʋsg sẽn tagsd tɩ d pa tõe n wʋm Naandã yɛl võorã ye. A ratame tɩ d bao n bãng-a. Biiblã yeta woto: “Fo sã n bao bãmba, b na n basame tɩ f yã bãmba.” (1 Kibayã 28:9) Y sã n karemd Biiblã la y bʋgsd a kibayã zugu, y na n bãnga Wẽnnaam. Y sã n maand woto, Biiblã yeelame tɩ Wẽnnaam ‘na n pẽnega yãmba.’—Zak 4:8.

La tõe tɩ y sokda y meng woto: ‘Mam sẽn pa wʋmd bũmba fãa võor Naandã zugã, m tõe n yɩ a zoa sɩda?’ D rɩk makre: Ned sã n dat n yõg zood ne logtore, yaa tɩlɛ t’a reng n zãms logtoeemd sɩda? Ayo! Logtor zoa tõe n yɩɩ ned sẽn tʋmd tʋʋm-zẽnga. Bũmb sẽn yaa tɩlɛ yaa a bao n bãng logtorã sẽn yaa ned ning buudu, a sẽn nong la a sẽn pa nonge. Woto me, y tõe n zãms-a Biiblã n bãng a Zeova sẽn yaa Wẽnnaam ning buudã. Rẽ n yaa bũmb ning y sẽn segd n maan n tõog n paam Wẽnnaam zoodã.

Biiblã pa bilg Naandã ne goam võor wʋmb sẽn yaa toog ye. A wilga tõnd bũmb nins d sẽn dat sẽn na yɩl n bãng Wẽnnaamã. Yãmb dat n bãnga Wẽnnaam a Zeova n paas bɩ? Bãng-y tɩ ned ning fãa sẽn data, a Zeova Kaset rãmb tõe n kẽnd n zãmsd-a-la Biiblã a zakẽ wã zaalem. Y sã n dat kibay n paase, y tõe n sõsa ne a Zeova Kaset rãmb nins sẽn be yãmb babgẽ wã, wall y kẽ tõnd sɩt wɛɛbã sẽn yaa www.pr418.com pʋgẽ.