•  Biiblã sẽn leokde

•  Sɩnga wãn t’a Maari rog biig n yaool n pa bãng raoa?

•  A Maari sẽn dog biig n yaool n da pa mi raoã võor yaa bõe?

•  A Maari kell n pa bãng rao bɩ?

•  A Maari sẽn dog a Zeezi t’a ra pa mi raoã wilgdame t’a zemsa zãng bɩ?

•  D segd n pʋʋsda a Maari bɩ?

Biiblã yetame t’a Zeezi ma a Maari paama zu-noog n dog a Zeezi t’a ket n pa mi rao ye. Biiblã ra reng n togsa yel-solemdã Ezayi sebrã pʋgẽ la a wilg a pidsgã Matye ne Luk evãnzill-dãmbã pʋsẽ.

Bãngr-gomda ye pʋgẽ b sẽn wilgd Mesi wã waoongo, a Ezayi ra yeelame yaa: “Ade, pa-kuil na n dɩka pʋga, n dog bi-ribla.” (Ezayi 7:14) Wẽnnaam vẽnega Evãnzill gʋlsd a Matye t’a wilg t’a Maari sẽn dog a Zeezi wã pidsda a Ezayi sẽn deng n togsã. A Matye sẽn togs tɩ tũu ne yel-solemd t’a Maari tʋtẽ wã poore, a paasame tɩ “bõn-kãensã fãa maaname sẽn na yɩl t’a Zeova sẽn kɩt tɩ b no-rɛɛsã yeel bũmb ningã pidsi. A ra yeelame yaa: “Ges-y-yã! Pa-kuil a n na n dɩk pʋg n dog bi-ribla, la b na n pʋda a yʋʋr t’a Emanuwɛlle, sẽn dat n yeel tɩ “Wẽnd-be-ne-do.”​—Matiye 1:22, 23.

Evãnzill gʋlsd a Luk me wilgame tɩ tũu ne yel-solemd t’a Maari wa tʋtẽ. A gʋlsame tɩ Wẽnnaam tʋma malɛk a Gabriyɛll “pa-kuil a ye nengẽ. B ra rɩk-a lame n kõ rao yʋʋr sẽn boond t’a Zozɛfe, n yaa a Davɩɩd buudã neda. Pa-kuilã yʋʋr ra yaa a Maari.” (Luk 1:26, 27) A Maari wilgame t’a sɩd ra pa mi rao ye. Bala, a sẽn wʋm t’a na n lebga a Zeezi sẽn yaa Mesi wã ma wã poore, a sokame yaa: “Bõn-kãngã na n yɩɩ wãn n maane, tɩ mam yaool n nan pa mi raoa?”​—Luk 1:34.

Tũu ne vʋʋsem sõng sẽn yaa Wẽnnaam pãng a sẽn tʋmd ne wã t’a Maari rɩk pʋgã. (Matiye 1:18) B ra togsa a Maari yaa: “Sɩɩg-sõng na n waa fo zugu, la Wẽn-kẽemdã pãngã na n luda foom ne b maasem. Yaa woto yĩng la b na n bool bi-sõng ning fo sẽn na n dogã tɩ Wẽnnaam Bi-ribla.” b (Luk 1:35) Ne yel-solemde, Wẽnnaam kɩtame t’a biigã vɩɩm kẽ a Maari pʋgẽ wã, t’a rog-a.

Wẽnnaam tũnuga ne a Maari sẽn da pa mi raoã t’a rog a Zeezi t’a yɩ ninsaal sẽn zems zãnga, sẽn na yɩl n fãag ninsaalbã ne yel-wẽndã la kũumã. (Zã 3:16; Ebre-rãmbã 10:5) Wẽnnaam kɩtame t’a Zeezi vɩɩmã kẽ a Maari pʋgẽ wã. Dẽ poore, Wẽnnaam vʋʋsem sõngã kogla a Zeezi vɩɩmã tɩ yel-wẽndã pa ta-a ye.​—Luk 1:35.

Dẽnd a Zeezi ra yaa ninsaal sẽn zems zãnga, wa a Ãdem nand t’a maan yel-wẽndã. Biiblã yeelame t’a Zeezi “ka tol n maan yel-wẽnd ye.” (1 Pɩyɛɛr 2:22) A Zeezi sẽn da yaa rao sẽn zems zãngã, a ra tõe n kõo a vɩɩmã n fãag ninsaalbã ne yel-wẽndã la kũuma.​—1 Korẽnt rãmbã 15:21, 22; 1 Tɩmote 2:5, 6.

Biiblã pa yeel t’a Maari kell n paa woto n pa tol n bãng rao ye. A wilgdame t’a Maari paama kamb a taaba.​—Matiye 12:46; Mark 6:3; Luk 2:7; Zã 7:5.

Ayo. Sã n yaa ne Catéchisme de l’Église Catholique wã, b sẽn yeel t’a Maari zemsa zãngã rat n yeelame “t’a ÃDEM YEL-WẼNDÃ pa tol n long a Maari hal baa a rogmã sasa ye. Yel-wẽnd ning a Ãdem sẽn maanã longda ninsaalb a taabã . . . La ne WẼNNAAM LOHOREM, yel-wẽndã pa tol n long a Maari a bada.” c

La Biiblã pʋgẽ, vɛrse ka be n wilgdẽ t’a Ãdem yel-wẽndã pa long a Maari ye. (Yɩɩn-sõamyã 51:7; Rom dãmbã 5:12) A Maari sẽn kẽng n na n tɩ maan maoong a yel-wẽnã sugr kũun yĩngã sẽn zems ne a Moyiiz Tõogã sẽn yeelã wilgda vẽeneg t’a ra pa zems zãng ye. (Maan-kʋʋre 12:2-8; Luk 2:21-24) Catéchisme de l’Église Catholique yetame yaa: “B pa wilg vẽeneg Biiblã pʋgẽ t’a Maari zemsa zãng ye. Yaa egiliizã n yãk yam n togs rẽ.”

A Maari yaa mak-sõng tẽebã, sakrã, sik-m-mengã la tall zood sõma ne a Zeova wã wɛɛngẽ. B sõda a Maari n naag neb nins sẽn tall tẽeb la sũ-mar sʋka, tɩ d segd n dɩk-b togs-n-taare.​—Ebre-rãmbã 6:12.

La baa ne a Maari sẽn tall tʋʋm-kãseng Wẽnnaam raabã pidsg pʋgẽ wã, Biiblã pa yet tɩ d segd n pʋʋsa a Maari wa Wẽnnaam ye. A Zeezi pa waoog a ma wã tɩ loog nug ye. A pa yeel a karen-biisã me tɩ b maan woto ye. Sã n yõsg Evãnzill-dãmbã pʋsẽ, la Tʋʋma sebr pʋgẽ, b pa gom a Maari yell b sẽn boond tɩ Kãab-paalgã sɛb 22 sẽn ketã pʋgẽ ye.​—Tʋʋma 1:14.

Gʋls-sõamyã pa tar kaset sẽn wilgd vẽeneg tɩ pipi kiris-nebã wakatẽ, b ra pʋʋsda a Maari wa Wẽnnaam ye. A yetame tɩ kiris-nebã segd n pʋʋsa Wẽnnaam bala.​—Matiye 4:10