Rẽ yĩnga, a Maari yaa Wẽnnaam ma bɩ?

ÉCOUTER EN

Biiblã sẽn yete

Ayo. Biiblã pa yet t’a Maari yaa Wẽnnaam ma, a pa yet tɩ kiris-nebã tog n pʋʋsa a Maari me. a Wala makre:

A Maari zɩ n yeel t’a yaa Wẽnnaam ma ye. Biiblã yetame t’a roga “Wẽnnaam Bi-riblã,” la pa Wẽnnaam meng ye.—Mark 1:1; Luk 1:32.
A Zeezi Kirist zɩ n yeel t’a Maari yaa Wẽnnaam ma, la tɩ b segd n waoog-a tɩ loog noor ye. Vugr menga, a remsa pag a ye goama. Pagã goamã ra zẽkda a Maari, a sẽn paam n dog a Zeezi wã yĩnga. La a Zeezi yeel-a lame: “Yaa neb nins sẽn kelgd Wẽnnaam goamã n sakdẽ wã n tar barkã.”—Luk 11:27, 28.
Biiblã pʋgẽ, b zɩ n gom “Wẽnnaam ma,” bɩ Theotokos” (sẽn dog-a Wẽnnaamã) yell ye.
Biiblã pʋgẽ, “Saasẽ Rĩm-poaka” pa makd a Maari ye. Yaa wẽn-faoog Israyɛll wẽn-kɩɩsdb sẽn da balemde. (Zeremi 44:15-19) Tog n yaa Babilon wẽn-faoog a Ishtar b sẽn boond me t’a Astarte wã la b ra boond tɩ saasẽ rĩm-poakã.
Pipi kiris-nebã ra pa pʋʋsd a Maari bɩ n waoogd-a tɩ loog noor ye. Kʋdemdã yɛl-mit a ye yeela sebr a ye pʋgẽ (In Quest of the Jewish Mary) tɩ pipi kiris-nebã “ra zãagda b mens ne bõn-naands pʋʋsgo, la b ra pa rat me n tall manesem sẽn tõe n kɩt tɩ nebã wa tẽed tɩ b pʋʋsda a Maari ye.”
Biiblã yetame tɩ Wẽnnaam pa tall sɩngr ye. (Yɩɩn-sõamyã 90:1, 2; Ezayi 40:28) Sẽn mik t’a pa tall sɩngrã, a pa tõe n tar ma ye. Sẽn paase, a Maari ra pa tõe n dog Wẽnnaam ye. Bala Biiblã yeta vẽeneg tɩ saasã meng sẽn yalmã pa tõe n deeg Wẽnnaam ye.—1 Rĩm-dãmbã 8:27.

A Maari yaa a Zeezi ma, pa “Wẽnnaam ma” ye

A Maari yɩɩ zʋɩfe, n da yaa rĩm a Davɩɩd yagenga. (Luk 3:23-31) A Maari tẽebã la a wẽn-sakrã kɩtame tɩ Wẽnnaam ning-a barka. (Luk 1:28) Wẽnnaam yãk-a lame t’a na n yɩ a Zeezi ma. (Luk 1:31, 35) La yẽ ne a sɩd a Zozɛf paama kamb a taaba.—Mark 6:3.

Biiblã wilga vẽeneg t’a Maari lebga a Zeezi karen-biiga. La b pa yeel bũmb a to n paas ye.—Tʋʋmã 1:14.

Bõe yĩng tɩ kẽer yetẽ t’a Maari yaa Wẽnnaam ma?

Yaa yʋʋm kobs-tã wã a Zeezi rogmã poor la nebã sɩng n pʋʋsd a Maari. Wakat kãnga, egiliiz katolikã n lebg Rom soolmã tũudum. Rẽ kɩtame tɩ neb wʋsg sẽn da pʋʋsd wẽn-faad lebg kiris-neb ne yʋʋre. Sẽn paase, katolikã rãmb saka zãmsg ning sẽn yet tɩ Wẽnnaam yaa mens a tãabã, tɩ yaool n yaa zãmsg sẽn pa yit Biiblã pʋgẽ ye.

Zãms-kãngã kɩtame tɩ neb wʋsg tags t’a Zeezi sã n yaa Wẽnnaam, dẽnd a Maari yaa Wẽnnaam ma. Yʋʋmd 431 a Zeezi rogmã poore, katolikã taoor dãmb tigma taab Efɛɛze, n dɩk no-sɩɩr n yeel t’a Maari yaa “Wẽnnaam ma.” Rẽ tɛka, zĩig fãa nebã ra pʋʋsda a Maari. B boonda rẽ ne fãrend tɩ “mariolâtrie.” Neb wʋsg sẽn da pʋʋsd wẽn-faadã sẽn lebg katolik-rãmbã, tarẽ-n-tarẽ b wa n maanda a Maari bõn-naands la a imaaz-rãmb n wõgemded b taoor n pʋʋsdẽ. Bõn-naands la imaaz-kãens ledga wẽn-faad nins b sẽn da pʋʋsdã. Wala makre wẽn-faoog a Artemis Rom tẽngã neb sẽn da boond me t’a Diana wã, la wẽn-faoog a Isis.

Yʋʋmd 432 a Zeezi rogmã poore, a Sixtus III sẽn yɩ papã kõo noor tɩ b me wẽnd-doog Rom tẽngã pʋgẽ, sẽn na yɩl n waoog “Wẽnnaam ma” wã. B sɩd me-a lame n yɛgl a Lucina roogã. A Lucina ra yaa Rom tẽngã neb wẽn-poaka. B ra yetame t’a kõta rogem. B ra tara b wẽn-poak a to n boondẽ tɩ “Mère des dieux.” Sebr a ye pʋgẽ, (Marie, un parcours dogmatique) b goma wẽnd-doog ning b sẽn me a Maari yĩngã n yeel tɩ na n kaoosame, la tɩ yaa bõn-makd sẽn ledg wẽn-poak ning yʋʋr sẽn boond tɩ “Mère des dieux” wã bala.”

a Tũudum wʋsg pʋgẽ, b yeta nebã t’a Maari yaa Wẽnnaam ma. B mi n boond-a lame tɩ “Saasẽ Rĩm-poaka” bɩ Theotokos sẽn yaa gɛrk gom-bil sẽn dat n yeel tɩ “sẽn dog-a Wẽnnaamã.”