ആരുടെ കരവിരുത്?
കടൽവെളളരിയുടെ അത്ഭുതചർമം
സമുദ്രത്തിന്റെ മടിത്തട്ടിലും പവിഴപ്പുറ്റുകൾക്കിടയിലും താമസിക്കുന്ന ജീവികളാണു കടൽവെള്ളരികൾ. അവയിൽ ചിലതിന്റെ ശരീരം മുള്ളുകൾ നിറഞ്ഞിരിക്കുന്നതുപോലെയാണ്. മറ്റു ചിലതിനു നിറയെ മുഴകൾ ഉള്ളതു പോലെയാണ്. ഇനി വേറെ ചിലതിനു വളരെ പരുപരുത്ത ചർമമാണ് ഉള്ളത്. ഏതാനും മിനിട്ടുകളോ സെക്കന്റുകളോ കൊണ്ട് മെഴുകുപോലെ മൃദുലമാകാനും പലകപോലെ കട്ടിയാവാനും ഉള്ള അതിന്റെ കഴിവ് വളരെ വിസ്മയം ജനിപ്പിക്കുന്നതാണ്. ശത്രു ആക്രമിക്കാൻ വരുമ്പോൾ ചെറിയ വിടവുകളിൽ നൂണ്ടുകയറാനും പുറത്തേക്കു വലിച്ചാൽപ്പോലും വരാത്തവണ്ണം ശരീരത്തെ ദൃഢതയുള്ളതാക്കാനും അതിനു കഴിയുന്നു. കടൽവെള്ളരിയുടെ ഈ സാമർഥ്യത്തിനു പിന്നിലെ രഹസ്യം അതിന്റെ ചർമമാണ്.
സവിശേഷത: കടൽവെള്ളരിയുടെ ചർമത്തിനു മൂന്ന് അവസ്ഥകളിലേക്കു മാറാൻ കഴിയും. വളരെ കട്ടിയുള്ളതാകാനും വളരെ മൃദുലമാകാനും ഇവ രണ്ടിനും പുറമേ സാധാരണ ചർമംപോലെ ആകാനും അതിനു കഴിയും. ചർമത്തിലെ ഇഴനാരുകൾ ബന്ധിപ്പിച്ചുനിറുത്താനും ആവശ്യാനുസരണം ആ ബന്ധം വേർപെടുത്താനും അതിനുള്ള കഴിവാണ് ഓരോ അവസ്ഥയിലേക്കു മാറാൻ അതിനെ സഹായിക്കുന്നത്. ചില പ്രോട്ടീനുകൾ ഉപയോഗിച്ചുകൊണ്ടാണ് കടൽവെള്ളരികൾക്ക് ഇങ്ങനെ ചെയ്യാൻ കഴിയുന്നത്.
ചർമത്തിലെ ഇഴനാരുകൾക്കിടയിൽ ചെറിയ പാലങ്ങൾ അഥവാ കണ്ണികൾ തീർക്കാൻ സഹായിക്കുന്ന ചില പ്രോട്ടീനുകളാണു ചർമത്തെ കട്ടിയുള്ളതാകാൻ സഹായിക്കുന്നത്. എന്നാൽ ചർമം മൃദുലമാകാൻ സഹായിക്കുന്ന ചില പ്രോട്ടീനുകളും ഉണ്ട്. അവയ്ക്ക് ആ കണ്ണികളുടെ ബന്ധം വേർപെടുത്തി കടൽവെള്ളരിയുടെ ചർമത്തെ കൂടുതൽ മൃദുലമാക്കാനും കഴിയും. തൊട്ടാൽ അലിഞ്ഞുപോകും എന്നു തോന്നുന്നത്ര മൃദുലമാകാൻ കടൽവെള്ളരിയുടെ ചർമത്തിനാകും.
കടൽവെള്ളരിയുടെ ഈ അത്ഭുതസവിശേഷത പകർത്തി ഉപകരണങ്ങൾ നിർമിക്കാൻ കഴിയുമോ എന്നുള്ള ഗവേഷണത്തിലാണു ശാസ്ത്രജ്ഞന്മാർ. അതിലൊന്നാണു മസ്തിഷ്കശസ്ത്രക്രിയക്ക് ഉപയോഗിക്കാൻ കഴിയുന്ന ചില പ്രത്യേക ഇലക്ട്രോഡുകൾ. കടൽവെള്ളരിയുടെ ചർമത്തിന്റെ സവിശേഷതകൾ ഉള്ള ഇലക്ട്രോഡുകൾക്ക്, തലച്ചോറിൽ ഉദ്ദേശിക്കുന്ന സ്ഥാനത്തുതന്നെ കൃത്യമായി ഉറപ്പിച്ചുനിറുത്താൻവേണ്ട ദൃഢതയും അതേസമയം പിന്നീടു മൃദുവാകാനുള്ള കഴിവും ഉണ്ടായിരിക്കും. ഇത്തരത്തിലുള്ള ഇലക്ട്രോഡുകളെ ശരീരം സ്വീകരിക്കാനുള്ള സാധ്യത കൂടുതലായതുകൊണ്ട് മസ്തിഷ്കശസ്ത്രക്രിയകളുടെ വിജയസാധ്യതയേറും.
നിങ്ങൾക്ക് എന്ത് തോന്നുന്നു? കടൽവെള്ളരിയുടെ ചർമം പരിണമിച്ചുവന്നതാണോ അതോ ആരെങ്കിലും രൂപകല്പന ചെയ്തതാണോ?