എന്താണ് മഹതിയാം ബാബിലോൺ?
ബൈബിളിന്റെ ഉത്തരം
ദൈവം തള്ളിക്കളഞ്ഞിട്ടുള്ള, ലോകത്തിലെ എല്ലാ വ്യാജമതങ്ങളുടെയും ആകെത്തുകയാണ് മഹാബാബിലോൺ എന്ന് ബൈബിളിലെ വെളിപാട് എന്ന പുസ്തകം വരച്ചുകാണിക്കുന്നു. a(വെളിപാട് 14:8; 17:5; 18:21) ഈ മതങ്ങൾ തമ്മിൽ ആശയങ്ങളിൽ വ്യത്യസ്തത പുലർത്തുന്നുണ്ടെങ്കിലും ഇവരെല്ലാം സത്യദൈവമായ യഹോവയെ ആരാധിക്കുന്നതിൽനിന്ന് ആളുകളെ അകറ്റുകയാണ് ചെയ്യുന്നത്.—ആവർത്തനപുസ്തകം 4:35.
മഹതിയാം ബാബിലോണിനെ തിരിച്ചറിയാനുള്ള താക്കോൽ
മഹതിയാം ബാബിലോൺ എന്നത് ഒരു അടയാളമാണ്. ബൈബിൾ അവളെ “മഹതിയാം ബാബിലോൺ” എന്ന “നിഗൂഢനാമ”മുള്ള ഒരു “ഒരു സ്ത്രീ” ആയും “മഹാവേശ്യ” ആയും ചിത്രീകരിക്കുന്നു. (വെളിപാട് 17:2, 3, 5) ബൈബിളിലെ വെളിപാട് പുസ്തകത്തിലാണ് അതിനെക്കുറിച്ച് വിവരിച്ചിരിക്കുന്നത്. അത് “അടയാള”രൂപേണ എഴുതിയിരിക്കുന്നതിനാൽ മഹതിയാം ബാബിലോൺ എന്നത് ഒരു അക്ഷരീയസ്ത്രീയെ അല്ല, ആലങ്കാരികസ്ത്രീയെയാണ് അർഥമാക്കുന്നതെന്ന് ന്യായമായും നിഗമനത്തിൽ എത്താൻ കഴിയും. (വെളിപാട് 1:1) മാത്രമല്ല, അവൾ “പെരുവെള്ളത്തിന്മീതെ” ആണ് ഇരിക്കുന്നത്. അത്, ‘വംശങ്ങളെയും പുരുഷാരങ്ങളെയും ജനതകളെയും ഭാഷക്കാരെയും’ അർഥമാക്കുന്നു. (വെളിപാട് 17:1, 15) ഒരു അക്ഷരീയസ്ത്രീക്ക് അങ്ങനെ ഇരിക്കുക സാധ്യമല്ലല്ലോ?
മഹതിയാം ബാബിലോൺ ഒരു അന്തർദേശീയപ്രസ്ഥാനത്തെ അർഥമാക്കുന്നു. അവളെ, “ഭൂരാജാക്കന്മാരുടെമേൽ രാജത്വമുള്ള മഹാനഗരം” എന്ന് വിളിച്ചിരിക്കുന്നു. (വെളിപാട് 17:18) അത് കാണിക്കുന്നത്, അവൾക്ക് അന്തർദേശീയതലത്തിൽ സ്വാധീനം ചെലുത്താൻ കഴിവുണ്ടെന്നാണ്.
മഹതിയാം ബാബിലോൺ എന്നത് രാഷ്ട്രീയപരമോ വാണിജ്യപരമോ ആയ ഒന്നല്ല പകരം, ഒരു മതപ്രസ്ഥാനമാണ്. ‘മന്ത്രവാദങ്ങളും ക്ഷുദ്രപ്രയോഗങ്ങളും’ വളരെ ആഴത്തിൽ വേരോടിയിരുന്ന ഒരു നഗരമായിരുന്നു പുരാതനബാബിലോൺ. (യെശയ്യാവു 47:1, 12, 13; യിരെമ്യാവു 50:1, 2, 38) സത്യദൈവമായ യഹോവയ്ക്ക് എതിരെയുള്ള വ്യാജമതങ്ങളുടെ ആരാധനയായിരുന്നു അവിടെ നടന്നിരുന്നത്. (ഉല്പത്തി 10:8, 9; 11:2-4, 8) ബാബിലോണിലെ ഭരണാധികാരികൾ യഹോവയ്ക്കെതിരായും അവനെ ആരാധിക്കുന്നതിനെതിരായും ധിക്കാരപൂർവം തങ്ങളെത്തന്നെ ഉയർത്തി. (യെശയ്യാവു 14:4, 13, 14; ദാനീയേൽ 5:2-4, 23) കൂടാതെ, മഹതിയാം ബാബിലോൺ “ഭൂതവിദ്യ”യ്ക്ക് പേരുകേട്ടതായിരുന്നു. ഇത്, അവൾ ഒരു മതപരമായ പ്രസ്ഥാനമാണെന്ന് മനസ്സിലാക്കാൻ നമ്മളെ സഹായിക്കുന്നു.—വെളിപാട് 18:23.
ഒരു കാരണവശാലും, മഹാബാബിലോൺ ഒരു രാഷ്ട്രീയപ്രസ്ഥാനമല്ല. കാരണം, ‘ഭൂരാജാക്കന്മാർ’ അവളെച്ചൊല്ലി വിലപിക്കുന്നുണ്ട്. (വെളിപാട് 17:1, 2; 18:9) ഇനി, “ഭൂമിയിലെ വ്യാപാരി”കളിൽനിന്ന് അവളെ വേർതിരിച്ച് കാണിക്കുന്നതിനാൽ അവൾ വാണിജ്യപരമായ ഒരു ശക്തിയും അല്ല.—വെളിപാട് 18:11, 15.
ലോകത്തുള്ള സകല വ്യാജമതങ്ങളെയും കുറിക്കാൻ മഹതിയാം ബാബിലോൺ എന്ന പദം ഉചിതമാണ്. സത്യദൈവമായ യഹോവയിലേക്ക് എങ്ങനെ അടുക്കാമെന്ന് ആളുകളെ പഠിപ്പിക്കുന്നതിനു പകരം, മറ്റു ദൈവങ്ങളെ ആരാധിക്കാനാണ് വ്യാജമതങ്ങൾ ശ്രമിച്ചിരിക്കുന്നത്. ഇതിനെ ആത്മീയമായ അർഥത്തിലുള്ള “പരസംഗം” എന്നാണ് ബൈബിൾ വിളിക്കുന്നത്. (ലേവ്യപുസ്തകം 20:6; പുറപ്പാടു 34:15, 16) ത്രിത്വദൈവത്തിലുള്ള വിശ്വാസം, മരണശേഷമുള്ള ആത്മാവിന്റെ അമർത്യത, ആരാധനയിൽ വിഗ്രഹങ്ങൾ ഉപയോഗിക്കൽ തുടങ്ങിയവയുടെ ഉത്ഭവം പുരാതന ബാബിലോണിൽനിന്നാണ്. അത് ഇന്നുള്ള സകല വ്യാജമതങ്ങളിലും പടർന്ന് പന്തലിച്ചിരിക്കുന്നു. കൂടാതെ, ഈ മതങ്ങൾ തങ്ങളുടെ ആരാധനയെ ഈ ലോകത്തോടുള്ള സ്നേഹത്തോട് കൂട്ടിക്കലർത്തിയിരിക്കുന്നു. ഇത്തരം അവിശ്വസ്തതയെ ആത്മീയപരസംഗം എന്നാണ് ബൈബിൾ വിളിക്കുന്നത്.—യാക്കോബ് 4:4.
വ്യാജമതത്തിൽ കുന്നുകൂടിയിരിക്കുന്ന ധനവും അവയുടെ പ്രതാപപ്രകടനവും, “ധൂമ്രവർണവും കടുഞ്ചുവപ്പു നിറവുമുള്ള വസ്ത്രങ്ങൾ ധരിച്ചും പൊന്ന്, രത്നം, മുത്ത് എന്നിവയാൽ അലങ്കൃതയായ” മഹതിയാം ബാബിലോണിനെക്കുറിച്ചുള്ള ബൈബിൾവിവരണത്തോട് കൃത്യമായി യോജിക്കുന്നു. (വെളിപാട് 17:4) ‘ഭൂമിയിലെ സകല മ്ലേച്ഛതകളുടെയും’ അല്ലെങ്കിൽ ദൈവത്തെ അപമാനിക്കുന്ന സകല പഠിപ്പിക്കലുകളുടെയും പ്രവൃത്തികളുടെയും ഉറവിടമാണ് മഹതിയാം ബാബിലോൺ. (വെളിപാട് 17:5) മഹതിയാം ബാബിലോണിനെ പിന്തുണയ്ക്കുന്ന “വംശങ്ങളും പുരുഷാരങ്ങളും ജനതകളും ഭാഷക്കാരും” ആണ് വ്യാജമതത്തിലെ അംഗങ്ങൾ.—വെളിപാട് 17:15.
മഹതിയാം ബാബിലോൺ ആണ് “ഭൂമിയിൽ അറുക്കപ്പെട്ട ഏവരുടെയും” രക്തത്തിന് ഉത്തരവാദികളായിരിക്കുന്നത്. (വെളിപാട് 18:24) ചരിത്രത്തിലുടനീളം, അവർ യുദ്ധങ്ങൾക്ക് കാരണമാകുകയും തീവ്രവാദപ്രവർത്തനങ്ങൾ ആളിക്കത്തിക്കുകയും ചെയ്തിരിക്കുന്നു. മാത്രമല്ല, സ്നേഹത്തിന്റെ മൂർത്തിമദ്ഭാവമായ യഹോവയെക്കുറിച്ച് ആളുകളെ പഠിപ്പിക്കുന്നതിൽ പരാജയപ്പെടുകയും ചെയ്തിരിക്കുന്നു. (1 യോഹന്നാൻ 4:8) ഇത് അനേകം രക്തച്ചൊരിച്ചിലുകൾക്ക് വഴിവെച്ചിരിക്കുന്നു. അതുകൊണ്ട്, ദൈവത്തെ പ്രസാദിപ്പിക്കാൻ ആഗ്രഹിക്കുന്നവർ വ്യാജമതത്തിൽ നിന്ന് തങ്ങളെത്തന്നെ വേർപെടുത്തിക്കൊണ്ട് ‘അവളെ വിട്ട് പോരേണ്ടത്’ ആവശ്യമാണ്.—വെളിപാട് 18:4; 2 കൊരിന്ത്യർ 6:14-17.
a “എനിക്ക് എങ്ങനെ സത്യമതം കണ്ടെത്താൻ കഴിയും?” എന്ന ലേഖനം കാണുക.