3-ШО КЫДЕЖ
Кузе нелылыкым сеҥаш
«Эн ондак икте-весыдам тыршен йӧратыза, вет йӧратымаш шуко языкым леведеш» (1 Петрын 4:8).
Еш илышым тӱҥалме годым у нелылык лиеш. Тендан шижмашда, шонымаш да илыш ончалтышда ойыртемалт кертыт. Тыгак вес амал-влаклан кӧра нелылык лийын кертеш.
Мутат уке, иктаж-могай проблемым сеҥаш куштылго огыл, но Библий тидлан вийым пышташ тарата (Матфейын 5:23, 24). Нелылыкым сеҥымаште эн сай полыш — библийысе принцип-влак.
1 НЕЛЫЛЫК НЕРГЕН МУТЛАНЕН НАЛЗА
МОМ БИБЛИЙ ОЙЛА. Уло «жап ойлаш» (Экклезиаст 3:1, 7). Нелылык нерген мутланаш жапым ойырыза. Каҥашыме ситуаций шотышто могай шонымет ден шижмашет уло, пелашетлан чон почын каласе. Пелашетлан эре «чыным ойло» (Ефесян-влаклан 4:25). Мутланыме годым кӧргыштет чыла шолеш гынат, шкем кидыштет кучаш тырше. Тыматле мут ӱчашымашым чараш полша (Притчи 15:4; 26:20).
Иктаж-мо дене от келше гынат, порын ойлаш тырше да пелашетлан йӧратымаш ден пагалымашым ончыкто (Колоссян-влаклан 4:6). Нелылыкым сеҥымаште жапым ида шуйкале да нимом шылтыде мутланыза (Ефесян-влаклан 4:26).
ПАЙДАЛЕ КАҤАШ-ВЛАК
-
Нелылык нерген мутланашлан келшен толшо жапым ойырыза
-
Пелашетым ойлымыж годым тӱткын колышт. Вара шке шоныметым ойлен кертат
2 КОЛЫШТМО ГОДЫМ УМЫЛАШ ТЫРШЫЗА
МОМ БИБЛИЙ ОЙЛА. «Икте-весыдам... ныжылгын йӧратыза‚ пагалымаште икте-весыдам ончылтыза» (Римлян-влаклан 12:10). Тӱткын колышташ чот кӱлешан. Пелашетын ойлымыжым умылаш тырше, тыгодым «чаманыше... ӱҥышӧ лий» (1 Петрын 3:8; Иаковын 1:19). Колыштшыла веле кояш ит тӧчӧ. Лиеш гын, мутланымыда годым вес пашатым ӧрдыжкӧ кораҥде да тӱткын колышт. Уке гын, изиш варарак мутланаш кутырен келшыза. Шарне: те икте-весылан ӱчашыше огыл, а йолташ-влак улыда. Тунам тылат «ӧпкем кучаш ит вашке» библийысе каҥашым кучылташ куштылгырак лиеш (Экклезиаст 7:9).
ПАЙДАЛЕ КАҤАШ-ВЛАК
-
Пелашетын ойлымыж дене от келше гынат, тудым эре тӱткын колышташ тырше
-
Пелашетын мутшым веле огыл колышт, тыгак шижмашыжым умылаш тырше
3 РЕШЕНИЙДА ПОЧЕШ ЫШТЫЗА
МОМ БИБЛИЙ ОЙЛА. «Кеч-могай тыршен ыштыме паша пайдам конда, а кушто яра мутланымаш, тушто нужналык веле» (Притчи 14:23). Кузе нелылыкым сеҥаш лиеш мутланаш гына огеш сите. Тыгак решений почеш ышташ кӱлеш. Тиде шуко вийым налеш гынат, лектышыже сай лиеш (Притчи 10:4). Те пырля тыршаш тӱҥалыда гын, шке пашаланда «поро суапым» налыда (Экклезиаст 4:9).
ПАЙДАЛЕ КАҤАШ-ВЛАК
-
Нелылыкым сеҥашлан кӧ мом ыштышаш, мутланен келшыза
-
Жапын-жапын могай кӱкшытыш шуымыдам эскерыза