Еш кӱлешлыкым ситарашлан окса кӱлеш (Притчи 30:8). Библий почеш «окса... аралтышым пуа» (Экклезиаст 7:12). Окса шотышто мутланаш куштылго огыл лийын кертеш. Туге гынат тиде теме нерген ӱчашыде мутланаш тыршыман (Ефесян-влаклан 4:32). Окса кучылтмо шотышто марий ден вате икте-весылан ӱшанышаш да икте-весын шонымыжым шотлышаш улыт.

МОМ БИБЛИЙ ОЙЛА. «Тендан кокла гыч иктаж-кудыжо башньым ыштынеже гын, чоҥен шукташ мо кӱлешым да окса ситышашым шотлаш ондак ок шич мо?» (Лукан 14:28). Кузе оксам кучылташ, тыланда ондак мутланен келшыман (Амос 3:3). Шоналтыза, мом тыланда чынак налаш кӱлеш да мыняр оксам пытарен кертыда (Притчи 31:16). Окса улмылан кӧра веле вигак иктаж-мом налман огыл. Оксам кӱсын налме олмеш мыняр улмо дене илаш тыршыза (Притчи 21:5; 22:7).

ПАЙДАЛЕ КАҤАШ-ВЛАК

• Тылзе мучашеш окса кодын гын, пырля шоналтыза, кузе нуным кучылташ лиеш

• Кодшо тылзын окса ситен огыл гын, шоналтыза, кузе нуным аныклен кучылташ лиеш. Мутлан, кевытыште ямдылыме кочкышым налме олмеш шке ыштен кертыда ыле

МОМ БИБЛИЙ ОЙЛА. «Ме Господь ончылно веле огыл сай ышташ тыршена, а еҥ-влак ончылнат» (2 Коринфян-влаклан 8:21). Мыняр оксам ыштен налат да мыняр кучылтат, пелаш деч ит шылте.

Окса шотышто кӱлешан решенийым лукмо годым пелашет дене эре каҥаше (Притчи 13:10). Окса нерген чон почын мутланымаш ешыште тынысым аралаш полша. Ыштен налме оксатым шкендынлан огыл, а еш оксалан шотло (1 Тимофейлан 5:8).

ПАЙДАЛЕ КАҤАШ-ВЛАК

• Тендан кокла гыч кажныже шке мыняр оксам кучылт кертеш, мутланен келшыза

• Окса кучылтмо шотышто ончылгоч мутланыза, проблеме лекме марте ида вучо